2 PITAR 2 - KARANU KABI SAMTAM

Kasang kasu ralikapyiimei mah sadoi kashyii

¹ Nlenii meinah kak kito kasang kasu lungkakalingmeido patle, teitakumpii, gonyii kak kito kasang kasu ralikapyiimeido pat tangle. Ahnyiigo lai mpat kapyii pumpii gotei ahnyiinii mazhii supii, tiika- mashyii kasang kasu kanat kanhii hangtei ahnyiinii pung gong tangle, sateichii ahnyii roinapii ahnyiinii ahnyii phyiiryiikii binasek-kii tiikamashyii tei pung gong tangle.

² Sateichii mei hangkanii ahnyiimah jaikashyii tha taitei switangle; sateichii ahnyiinii tiikalei tha jang- teipii, kasangmah pwidi gotei kakimei hangnii tam mashyii tangle.

³ Ahnyiimah lukanyii kito kasang kasu ralikapyii meinii kasang kasu kanat kanhii hang tei gonyii dakii tamsii gonyii phyiiryiito liipat tei fiitangle. Ndoukato ahnyiimah sam- tam tiitang karam tei tiikadabam takle sateichii ahnyiigo tiimaga tang karampii Saraa teinii zyiisii bam makle!

⁴ Kadapokii sating gamlui hangnii kem tiikalei tinglang kak Saraanii ahnyiigo khepyii suleponii, nlenii samtak tiitang karam jangpii kaika- bam ai mei aigo mibam kikii toikaisii kamyiimah ahom kikii pyiitoi aile- ponii,

⁵ Sateichii ndou karei sazyii pouryiigo mpounii keipyii supii, mpounii Saraa haikasu meimah sazyii pouryii phyiiryiikii dwi kadi pat matu katu tinglang kak, kasang kamajyii sam saa ka-mpat Nohago mei kakimei sanahgo kaswisii ma- shakpyii leponii;

⁶ Sateichii Sodom ninado Gomara namdi hangna gotei buinei mimatusii tiikamaga katang tei ahnyiigo mpounii samtak tiile- ponii, sateichii Saraa haikasumei hang phyiiryiikii pat tang karam mah nda tiikamangou tei ahnyiigo tiimatu leponii;

⁷ Sateichii kaikashyii- mei mah jaikashyii teipii hangkasii tiikamage kapyii kasang kamajyiipii Lotgo keipyii leponii,

⁸ Kadapokii kasang kamajyiimei teinii ahnyii kak kito lungsii, tiikalei ahnyiimah tha tei ngoukalu ninado shiikalu kito tingnei tingneikii mpoumah kasang kamajyii rangii gotei ajaitingshang taiswi kasu ahnyiimah tha teipii tiikamage pyiile.

⁹ Teijangpiinii sam- tak tiikasuta kada takumpii kasang kamajyiimeigo jaikajumah kamage kalak kito keipyii tangpo sateichii kakui kama meigo kada takumpii tiikamage pyii tangpo katu tei Bangpiinii tile.

¹⁰ (a) Routiisii matei kasu pumzaimah kamarei ka-ntha mah tha hang tiisii kaleimei ninado Saraamah teimaham go maning kamajaangmei jangpiile. (10b) Ai kasang kasu ralikapyiimei hang teinii lungdile sateichii detdile, ahnyiinii sagoi gamto kalei pumtei kava kadi hang gotei tam mashyii hingmakle;

¹¹ kasang kasu ralika- pyiimei sung kisii tei kaki ninado kisii dikaki sating gamlui katangdo, Bangpii doito ahnyiigo kalet kalou tiilei makle.

¹² Nlenii meinahnii jumsii gitat tang karam swikaga saramkownah takumpii ahnyiinii samah kado tisupii tam mashyii kalei, ahnyii gotei saramkownah takumpii tiimaga tangle;

¹³ Sateichii ahnyiinii kamage kalak tii ka-mpat jangpii ahnyiigo kamage kalak teipii pow ruitangle. Tingna kava kito mah kata hangninii tiisii ahnyiimah pum- zainii kamarei ka-ntha hang gotei kashaat pyiitang karam tei ahnyii jangpii kasamou teile; ahnyiinii gonyiigo kaswisii malotdo chii njoile, nlenii ahnyiimah jairali teinii ka-nrou ninado kasangam teile. Gonyiigo kasang kasu sam tamsii hem kalei kiteito ahnyiinii samousii bamle!

¹⁴ Ahnyiinii meinou meinahgo ma- shung maha kanyiimah mikjot teipii tokryiile, sateichii mik tei kem kito shaatsang shaat makle. Ahnyiinii kasui rangiigo mphee kikii chyiikaile, ahnyii lung tei lukanyii teinii apum tiiwo takle; ahnyii teinii Saraanii sheeng kalei nahmei teile.

¹⁵ Kasang pwidi gotei rat toi aisii ahnyiinii dhiisii tat tutakle, kashyii tha katii kito liipat kamarei, Beor nah sapfii mpou Balam mah pwidi tei ahnyiinii swiwo takle.

¹⁶ Nlenii mpoumah takoi teinii swikaga kapang tha tii aitang karam kito mpougo namwole. Lat pat kasu takoi teinii meinah mah rok teipii tam mpatsii Balam mah tiirakarhii tei nam wotakle.

¹⁷ Ahnyii ai dwi kaga dwipok ninado tingkai tingrotnii gwipung kalu kamong takumle; ahnyii jangpii Saraanii tuk kaki kamyii kiteikii bam tiikadabam takle.

¹⁸ Kadapokii swikaga kapang det kadi sam tamsii, kama kito lungsii kaleimei hang dato nlek wosii lungpat haosii kaleimeigo pumzaimah kamarei ka-ntha hang- teipiinii hemle.

¹⁹ Kasang kasu ralikapyiimei teinii ahnyiigo arangra katii pyii tanglesii riishii tiipyiile, nlenii ahnyii sekpiinii kashyii ka- hongmah kikaleimei tiisii leile; kadaponii mei katago apum tiikalu mah kata hangninii teinii ahgo kikaleimei tiimatule.

²⁰ Kadapokii ahnyiinii nyii Bangpii ninado nyiigo keikapyiipii Jisu Kristago tikalu kito sazyii pouryiimah kashyii kahong tha hang kito nlek kalu taito, ahnyiigo kashyii kahong tha kiteikii nlailoisii jum wosii apum tii woleponii, ahnyii jangpiinii nukarei kimah sung kana kitei kisii shyiibui takle.

²¹ Kadaponii kasang kama- jyiimah pwidi tei ahnyiinii tiwo taklepokii, ahnyii dakii pyii kalei kamatei kakhatsam kiteito tat nrek katu sungnii, teitei ahnyiinii tikasu teiniipou ahnyii jangpii kisii bibwi tangle.

²² Kasang samrou kito katam taiswisii ahnyii dato pat takle, katunii, “Achyiinii mpoumah marui tei chiiloile,” sateichii “dwi shyii matei kalei bak pwi teinii nlailiit makhang kito ningloi leile.”