2 PITAR 1 - KARANU KABI SAMTAM

Jukamati

¹ Jisu Krista kikalei ninado tiilamlwi kapyiimei tha tiisii kalei Saimon Pitar Inii nyii Saraa, nyii Bangpii Jisu Kristamah kasang kamajyii kito nyiigo kaswisii maikateeng njoi katu kamalum dou njoi kalumei hang dakii:

² Saraago sateichii nyii Bangpii Jisugo mashangsii kati kito jumage kapyii ninado kamajung tei gonyii dato moibui matulo.

Saraanii lat kapyii ninado kalai kapyii

³ Mpoumah pumtei kava ninado bikakimah njai dou njoi matutang karam jangpii, nyiigo lat kapyii, Saraa ahmah kamatei teimaham teinii Saraa kamaning mah kasang tiilung lungtang karam jangpii, mpougo kati paikito nyiinii doukamajyii tei nyiigo pyiitakle.

⁴ Hangkapii kadi ninado pyiitangle sii riishii tiikabam maika- teeng luha hangtei aitiisii mpounii nyiigo pyiile, kadapokii luha aihang paikito sazyii pouryii lungto kalei tiikamashyii pumzai mah kamarei ka-ntha kiteito gonyiinii nlek matu tang karam jangpii, sateichii nunuto kalei kamatei baichem mah njai tei gonyiinii dou njoimatu tang karam jangpiile.

⁵ Kaang aijangpii gonyii- mah kamalum kiteikii tha kabi, gonyiimah tha kabi kiteikii swirek kati,

⁶ gonyiimah swirek kati kiteikii gonyii roinapii gonyii pumpotgo jum kamajyii jum kamatwi, gonyii pumpotgo jum kamajyii jum kamatwi kiteikii lung leh kati, gonyiimah lung leh kati kiteikii Saraa kamaning.

⁷ Gonyiimah Saraa kamaning ki- teikii asanamei takumpii kakukabi, sateichii gonyiimah asanamei ta- kumpii kaku kabi kiteikii lungkasyii tei kai mpam kalu tiilo.

⁸ Kadapokii aihang ai gonyiimah tiisii tangkasu tiisuleponii, nyii Bangpii Jisu Kris- tago matwi mashangsii titang karam jangpii aihang ainii gonyiigo tiikamahat ninado ti mati matu kasu tei tiilakle.

⁹ Kadapokii aihang ai kagamei hang teinii, mpoumah karei kem hang kito tiimatei kapyii tei mangai aisii, mananghotsii kalei roi- nii kangou mik kachetmei takumle.

¹⁰ Teijangpiinii kangsanamei, go- nyiigo lat kapyii ninado kalai kapyii tei katika tang karam jangpii kisii teibuisii tha tiilo, kadapokii gonyiinii tei tiileponii, gonyiinii madou kado kousang koulakle.

¹¹ Kadapokii aitii- sanii nyiimah Bangpii ninado nyiigo keikapyiipii Jisu Kristamah kalui kaga sagong sazyiiki liit tang karam majyii tei gonyiigo pyiitangle.

¹² Teijangpii gonyiinii aihang go tisii ninado gonyiinii doukalu kasang kiteito sangtingsii laikado, aihangmah kaang kito Inii gonyiigo tam maning tangle.

¹³ Inii ring kaleitanii gonyiigo tam maningsii kalei ai gujangpii ma- jyiilesii Inii maningle.

¹⁴ Kadapokii nyii Bangpii Jisu Kristanii gudakii mangou kapyii takumpii, gumah pumrong ai kalangsii matou aitangle katu Inii tile.

¹⁵ Sateichii Inii majutu kalei taito aihang ai gonyiinii maning gong kabui tiisii Inii tiikabuita tiitangle.

Krista mah pumtei kavago mikpii kangoumei

¹⁶ Kadapokii nyiinii nyii Bangpii Jisu Kristamah teimaham ninado gongkalei tei gonyii dakii kamati tinglang kak meinahnii likalu rasam hang taitei nyiinii swimakle, nlenii nyiinii mpoumah teimaham kadi tei mik sekpiinii kangoumei hang takle.

¹⁷ Kadapokii mpounii Pfii Saraa dato sadzyii ngariit katii ninado “Ai ai Inii lung kamaang, lungkasyii gunah sapfii mpou teile!” Sii tam kalei rok tei kasagoi pumtei kava dato mpouda kagong tinglang kaktei nyii leile.

¹⁸ Sateichii nyiinii mpougo kaswisii kamatei zang gamto kabam kak, rok ai sating gamto kahum nyiinii shiile.

¹⁹ Teijangpii Lungkakalingmeinii saa ka-mpat Saraamah samtam gotei nyiinii kisii sangtingsii maning malumle, tingvaliit kasuta sateichii tingchoimah sageiti tei gonyii lung kito pat kasuta kamyii kito vakalei thaomigo gonyiinii lung kaliit takumpii gonyiinii aigo tiigatpii jum wolo.

²⁰ Kabi rasam mah adoisam reipii saa ka-mpat ainii rangii kama- teimah tiikaha tei haisupii mpou roinapii meikaniido poitaam wolakle.

²¹ Kadapokii Saraamah adoisam reipii saa ka-mpat ai meinah mah kamaning kamazhii kito patsang patlei makle, nlenii rangii kamateinii dengpyiisii meinahnii Saraa dato tamle.