2 KORENMEI 9 - KARANU KABI SAMTAM

Mah kagamei jangpii tiikaha

¹ Kadapokii Judiya kito kalei kamateimei dakii tiikahamah kaang kito Inii gonyii dakii ryiimak kido bile.

² Kadapochiinii gonyiinii tiiha kanyii tei Inii tile, teipiinii Inii gonyiimah kaang kito Mesidoniya kito kaleimei doito detdile, katunii Akaiya kito kalei kangsanameinii, ntaikumto tiiha tang karam jangpii datii wotakle sateichii gonyiinii lungliitsii tiikanyii teipiinii ahnyiigo lung tiimatu pyiitakle.

³ Aitoinii gonyii jangpii ai kaang kito nyiinii detkadi tei kakadak samtam tiimatulak tang karam jangpii, nlenii Inii tam kabam takumpiinii gonyiinii gonyiimah tiikaha tei tiikada tang karam jangpii, ai kangsanamei hang aigo Inii lang magong leile.

⁴ Nlenii Mesidoniya kito kalei mei kangkanii n-gu kaswi gongsii gonyiinii tiida kasu tei gong ngouwo leponii, gonyii- mah ka-nrou tei toi aisii, nyiinii kadaziikapii nrou tangpo; kadaponii gonyiigo malum gatsii kalei kiteito!

⁵ Teijangpii gonyiinii pyiitanglesii tam kabam tei, reipii tiida matu tang karam jangpii ai kangsanamei hang aigo gudoi reisii gonyii dakii lang magong matusu shyii taklesii Inii maning takle. Teitii leponii Inii kagong kaktei tiikada kabui jangpii sateichii gonyiinii pyiisu shyiile katu jangpii pyiisupanii, gonyiinii pyii kanyii jangpii pyii leile katu tei mangou kabui jangpii.

⁶ Kaangnii aile; chengniikii rali kakai mei teinii chengniikii rachet tangle, sateichii moisii rali kakaimei teinii moisii rachet tangle.

⁷ Mei- hangnii kamadak katupii mak-kii tiikamajyii hangninii kangto tiisu- piinii, mpounii sat kalu kamaning taiswisii, mei nsang nsangnii pyii- tang karamle; kadapokii nta ntasii kapyiimeigo Saraanii lungsyiile.

⁸ Gonyiinii gonyii jangpii kamarei hangtei tinglang kaleita doumatu tang karam jangpii sateichii kabi tha hang jangpii buikatusung kisii dou- matu tang karam jangpii, gonyiinii kamareisung kisii Saraanii pyiiwo buile.

⁹ Aitiisii ryii kabam takumpii: “Mpounii marouhou mpatle, mpounii mah kagameigo pyiile; mpoumah kasang kamajyii tei kalui tiimakle.”

¹⁰ Sateichii lwi karalimei dakii lwirou ninado chiitak jangpii tiirok kapyii Saraa teinii gonyiimah lwirou hangtei pyiido pyiitangle, tiido tii- madipyii tangle sateichii gonyiimah kasang kamajyiimah rachet tei bimatupyii tangle.

¹¹ Tinglang kaleita kamathii katu gasii meigo pyiiti kabui jangpii mpounii gonyiigo tii- manipyii tangle, kadapokii teitei- piinii nyii dato ahnyiinii doukalu gonyiimah kapyii hang jangpii mei hangkanii Saraago hakalang tam tangle.

¹² Kadapokii gonyiinii tiikalei ngam aipii kamateimei mah tang- kasu hangtei tiikaha roinii makle, nlenii Saraago hakalang katam hangkii kitei todo kisii tokryii nlem matule.

¹³ Sateichii gonyiimah ngamnii pung kagong maning kariirhii kaga aijangpii, gonyiinii tam kalei Kris- tamah kabi rasamgo gonyiinii katam kaswi jangpii, sateichii gonyiinii ahnyiigo ninado kakimei hang go kamathii katu kaga pyiikati njai jangpii, mei hangkanii Saraago tam matoi tangle.

¹⁴ Sateichii kaki jumage kapyii satoi tei Saraanii gonyiigo mangou kapyii jangpii gonyiinii tuksii lungkasyii teipii ahnyiinii gonyii jangpii riita tangle.

¹⁵ Saraamah tampei kalak luha jangpii mpougo tam matoilo!