2 KORENMEI 8 - KARANU KABI SAMTAM

Judiya kito kaleimei mah kagamei jangpii kapyii

¹ Kangsanamei, Saraamah jumage kapyii teinii Mesidoniya mah Charsh hang kiteikii tiikamangou tei nyiinii gonyiigo timatunyiile.

² Katunii, Mesidoniya kito kalei nyiigo njoi katu kamalum meihangnii tampei kalak kamage kalak tei dousii bamle, nlenii tinglang kaleita ahnyiinii hangkapii ntasii bamle. Ahnyii teinii tampei kalak tiisii mahdo gasii bamle, nlenii ahnyiinii meigo lungsyii tile.

³ Kadapokii ahnyiinii pyii m-moi kabuita pyiile sateichii ahnyiinii pyii kabui kangam sungdo kisii ahnyiinii pyiile.

⁴ Ahnyiinii tiikanyii ahnyiimah kamaning kamarei kito, Judiya kito kalei kamalum meigo tiiha tang karam mah tinglang kabi tei dou njoitang karam jangpii lungliitsii katam tei njasii ahnyiinii nyii dato khangle.

⁵ Teiteinii nyiinii maning malum kabui sungdo kile! Karei kito ahnyiinii ahnyii roinapii Bangpii dakii pyiile; sateichii tei taito Saraa mah kamaning kamarei kito ahnyiinii ahnyii roinapii nyii dakiido pyiitakle.

⁶ Teijangpiinii tha ai tiima- khii kapyiipii Taitasgo teitei tiijou pisii lungsyii kati tha ai gonyii kak kito tiimashang kabui tiisii gonyiigo tiihalosii nyiinii katui leile.

⁷ Mahlyii hang kito gonyiinii Kristen kaki- meihang doireile: Gonyiinii Krista dakii kamalum kito, Gonyiinii kabi rasam tam ka-mpat kito, gonyiinii kasang swirek kati kito, gonyiinii nga ngakanyii kito, sateichii gonyiinii nyii jangpii lungkasyii kito. Teijangpiinii Kristenmei mah lungkasyii tha ki aitodo Inii gonyiigo kakimei doi reimatu nyiile.

⁸ Ai ai kakhatsam hangninii takumpiinii Inii tam makle, nlenii Mesidoniya kito kalei charsh charsh hangnii kadaziikapii lungliitsii pyii leipo katu kamangou teipii gonyiimah lungkasyii ai kadaziikapii kasangpo katu tei Inii fii-mpat tang karam jangpii Inii tiileile.

⁹ Kadapokii nyii Bangpii Jisu Kristamah jumage kapyii tei gonyiinii tile, katunii mpounii mah nisii leikado mpoumah mah kaga teipii gonyiinii mahni kabui tiisii, gonyii jangpii mpounii mah kagamei tiipyii takle.

¹⁰ Sateichii ai kaang kito Inii gumah kamaning tei mati leile, katunii gonyiinii ndou ntaikum tiikahao ai aitoi tiimatui tiimashang kaleinii gonyii jangpii bisang bibwile, tiitang karam jangpii roinii gonyiinii karei makle, nlenii tiitang karam jangpii lungswi karing teido gonyiile.

¹¹ Teitiileponii, tei gotei kaswisii tatjou tulo sateichii tha tei tiimashang ailo! Gonyiinii tiinyiisii raang kalu takum- piinii teitei gonyiinii tiimashang nyiile sateichii gonyiinii aitoi kabam teipii kaswisii teitei tiilo.

¹² Nangnii ntasii pyii leponii, nangnii kagatai tei swisupiinii, nangnii pyii kabam kangam taiswisii nangnii kapyii tei Saraanii lukaipyii tangle.

¹³ Gonyii phyiiryiikii pot kamaswi kai kalei aipii mei kakimei hang gotei Inii tiimathang pyiitang karam jangpii tiikatu mah makle;

¹⁴ nlenii gonyiinii aitoitoi moisii kabam tai- swisii, gasii kamagesii kalei ahnyii gotei gonyiinii tiiha tang karamle. Teitii leponii, gonyiinii gasii kama- gesii kalei kak sateichii ahnyiinii moisii kalei kak, ahnyiinii gonyiigo tiiha tangle. Aitiisii hangna gotei masamsii tiitang karam jangpiile.

¹⁵ Aitiisii ryii kabam takumpii, “Moisii poi nkom kalu ah teinii samah kado mashak makle, sateichii chengniikii poi nkom kalu ah teinii tang kalak tei tiimakle.”

Taitas ninado mpoutai swikalei kangmei

¹⁶ Nyiinii gonyiigo tiiha nyiisii kalei mah lungnhii tei Taitas lung kikii kaipyiisii kalei Saraa gotei nyiinii halangle.

¹⁷ Kadapokii nyiimah kakhang tei mpounii lukai kapyii roinii makle, nlenii mpou roinapii hangkapii lungkanhii taiswisii mpounii mpoumah kamaning kito gonyiida gong tanglesii satto takle.

¹⁸ Kabi rasam tam ralikapyii tha katii jangpii Charsh hang kak kito meihangnii tiigatpii jutisii kalei kangsanapiigo kaswisii mpougo nyiinii lang magong leile.

¹⁹ Sateichii tei roinii makle, nlenii Bangpiimah pumtei kava jangpii sateichii nyiinii tiiha kanyii tei mangou tang karam jangpii, lungkasyii tha ai nyiinii tiipat tang karam kito nyiigo ka- swisii tat tang karam jangpii mpougo charsh hangnii kalai wotakle.

²⁰ Nyiinii jumkalei sana tiikaha aimah kaang kito mei kaniido nyiigo tam mashyii matulak tang karam jangpii nyiinii machyiigatle.

²¹ Ka- dapokii Saraa doito roisupiinii, mei doitodo kadatei kasangpo katu ai nyiinii tiitang karam teile.

²² Teijangpii ahnyiigo kaswisii nyiinii nyii kangsanapiigo lang magong leile, nyiinii mpougo tha hangkii kito jaijusii mpounii hang- kapii tiihasang tiiha nyiisii kalei tei nyiinii kadoutakle. Sateichii aitoinii mpounii gonyiigo hangkapii maning kamalum ai kalei taiswisii, mpounii kisii tiiha nyiisii bamle.

²³ Taitas jangpiinii, mpounii gupale sateichii gonyii jangpiinii n-gu njoisii tha ka- tiimeile, kangsanamei ainii Charsh mah sampao kapung Kristamah pumtei kava teile.

²⁴ Teijangpiinii gonyiimah lungkasyii ninado gonyii- mah kaang kito nyiimah detkadi ai Charsh hang doito maning riirhii katu tei gasii kasangle katu ai mangou tang karam jangpii aimei dakii mangou pyiilo.