2 KORENMEI 6 - KARANU KABI SAMTAM

¹ Nyiinii Saraago kaswisii tha tiisii leile, teijangpii Saraa mah jumage kapyii tei matapii kadaktoi sulosii nyiinii gonyiigo khang leile.

² Kadapokii Saraanii tamle: “Kamazhii tinglang kito Inii n-go shiipyiile sateichii n-go keipyii tang karam mah leimik tei gujangpii kagong kak Inii n-go tiihale.” Julo, aitoi kamazhii tinglangle; julo, keipyii tang karam mah leimik tei aitoile.

³ Nyiimah tha kito kama tei mei kata hangninii kaniido doumatulak tang karam jangpii, mei kata hang- niniimah pwidi kikiido doikadang tei nyiinii kaimakle.

⁴ Nlenii kamage, kalak kanhii ninado sadoi kashyii hang kito, leh kati teipii, nyiinii katii kapung hang kito nyii ai Saraa nga kangameile katu tei nyiinii ma- ngoule.

⁵ Nyiigo datle, kabang kikii bangle sateichii nyii phyiiryiikii mei moinii koi nrung patle, nyiigo tha katei tiimatusii, maziit kasu ninado moi kamazyii tei nyiigo pyiile.

⁶ Nyiimah kamateipii, swirek katipii, leh katipii sateichii Saraa nga ka- ngameile katu tei nyiinii nyii roinapii meigo mangoule...rangii kamateipii, nyiimah kasang lungkasyiipii.

⁷ Nyiimah kasang samtam teipii sateichii Saraamah samtam teipii nyiimah saryii baitui takumpii, meigo saryii tiitang karam ninado dangtang karam jangpii kasang kamajyii tei nyii dato bamle.

⁸ Nyiigo sadzyii ngariit tiile sateichii tiido tii-nrou tiisangam pyiile; nyiigo kalet kalou tiile ninado tamdo tam matoile. Nyiigo kachuimei takumpii tiile, nlenii nyiinii kasang tei tamle,

⁹ Nyiigo juti kasumei takumpiinii tiile, nlenii meihangnii nyiigo tiigatpii tiipyiile, nyiigo kataimei takumpii tiile, nlenii gonyiinii ngousii kalei takumpii, nyiinii ringsii bamle. Nyiigo tiikamage pyiile, nlenii nyiigo girang aimakle.

¹⁰ Nyiigo swi tiika- mage kado, tinglang kaleita nyiinii ntale; nyiinii mah kagamei takumle, nlenii mei hangkiigo nyiinii mah tiimani pyiile; nyiinii mah kado kaga takumle, nlenii kasangpii nyiinii mahlyii hangtei bamle.

¹¹ Koren kito kalei kanghemei! Gonyiigo nyiinii madupii tam takle; gonyii jangpii nyii lung disii laatpyii bam takle.

¹² Gonyii dakii nyiilung laatpyii kasu ai nyiinii makle, nlenii nyii dakii gonyii lung laatpyii kasu tei gonyiiniile.

¹³ Aitoinii gonyii ai gunahmei takumpii Inii tam leile: Gonyii jangpii nyiinii maning kalei takumpiinii njoisii gonyiinii nyii dakii mangoulo. Gonyii lung disii laatpyiilo!

Karing Saraa mah kitei nyiile

¹⁴ Malum kasumeigo masam katu takumpiinii kaswisii tha tiisulo, kadapokii teitei tiipeiwo lakle. Kasang kamajyii nei kakui kama tei kada takumpiinii kaswisii tha tiiwo tangpo? Kava nei kamyii tei kada takumpiinii kaswisii lungwo tangpo?

¹⁵ Krista nei seitan tei kada takumpii mazhiiwo tangpo? Kamalum mei hangninanii malum kasumei hang- niniigo masam katu kadapei leipo?

¹⁶ Saraamah Saraa kamaning ki tei nei tingtu hangteinii kadapei kamazhii leipo? Kadapokii nyiinii ringsii kalei Saraamah saraa kamaning ki teile; Saraanii tam kabam takumpii: “Ahnyii lung kito Inii lung tangle, sateichii ahnyii kak kito Inii nlai tangle, sateichii Inii ahnyii mah Saraa tei tiitangle ninado ahnyiinii gumei tiitangle.”

¹⁷ Teijangpii Bangpiinii tamle, “Ahnyii kak kito gonyiinii sipat tosii thaam wolo, sateichii matei kasu tei hangninii kado deng sulo; teitii leponii Inii gonyiigo lukaipyii tangle.

¹⁸ Sateichii Inii gonyii Pfii tiipyii tangle, sateichii gonyiinii gunah sapfiimei ninado gunah sapwimei tei tiitanglesii katei kakhang Bangpiinii tamle.”