2 KORENMEI 4 - KARANU KABI SAMTAM

Meinah mah kasui ninado Saraa mah teimaham

¹ Saraanii mpoumah lungsyii kapyii kito aitha ai tiilosii nyii dakii pyiitakle, teijangpii nyiinii lung taimakle.

² Kamakum ninado ka- nrou kasangam tha hangtei nyiinii tiiloi sutakle; meigo satui sadzyii katii kachui tha tei nyiinii tiimakle sateichii Saraamah samtam gotei tamtaisii tam makle. Nlenii kasang- mah kava kito nyiinii Saraa doito lungsii kabi kashyii tikabui meihang- mah lungswi kikii nyiinii nyii roinapii tam matoi matule.

³ Kadapokii nyiinii tam ralipyiisii kalei kabi rasam ai ju sungnei aitakleponii rangii taisii kaleimei dato roinii ju sungwo takle.

⁴ Ahnyiinii malum makle, dapokii sazyii pouryii mah sara kashyii teinii ahnyii lungswi tei kamyii kikii kai aitakle. Saraamah njoi karei takum sek katu Kristamah pumtei kavamah kaang kabi rasam kito kagong, ahnyii phyiiryiito vakalei kava tei mpounii ahnyiigo mangou sutakle.

⁵ Kadapokii nyiinii tam rali kalei ainii nyii roinapii nyiigo makle, nlenii Jisu Krista ai Bangpiile katupii, sateichii Jisu jangpii nyii ai gonyii nga kangameile katupii tam ralipyii leile.

⁶ Tii mpat kareiki Saraanii kakhatle, “Kamyii kito kava tei vamatulo.” Aimah njoi Saraa ainii mpoumah kava tei nyii lung kitodo vamatule. Kava ainii Krista ju kito vakalei Saraamah pumtei kava tei nyiigo timatule.

⁷ Nlenii kaki dikaki pumtei tei nyii dato supiinii, Saraa dato leile katu tei mangou tang karam jangpii rangiimah mai kating ai kabam mei doukalu nyiihang ainii rangrhiili takumle.

⁸ Meinii nyiigo bamlyii kito tiikamage pyiile, nlenii ahnyiinii nyiigo nampei womakle; nyiinii sung kaga kadou kadoule, nlenii nyiinii nyiimah maning kamalum tei maga makle;

⁹ nyiigo ngou karoumei hangkii leile, nlenii nyiinii kang gasii toumakle; sateichii tinglang daziikii kito nyiigo deng mashyii ai kido, nyiigo tiimaga aimakle.

¹⁰ Jisu mah katai tei taiga kabui nyii pum kikii tinglang kaleita nyiinii pungtat leile, kadapokii mpoumah karing tei nyii pum kito ngou matu tang karam jangpii.

¹¹ Mpoumah karing tei taiga tang karam nyii pum ki aito ngou matu tang karam jangpii, nyii tiilung mata tei Jisu jangpii katai mah sadoi kashyii kito nyiinii leihumle.

¹² Teijangpii katai teinii nyii dato tha tiisii leile, nlenii karing teinii gonyii dato leile.

¹³ Kabi rasam kikii ryiibamle, “Inii Saraago malumle, teijangpii Inii tamle, njoi katu kamalum tei nyii dato bamle; nyiiniido malumle, teijangpii nyiinii malhii leile!”

¹⁴ Kadapokii Saraanii Bangpii Jisugo tiimaringpyiile katu tei nyiinii tile. Mpounii Jisugo tiimaring kapyii takumpii, nyiigodo mpounii tiima- ringpyii tangle katu tei nyiinii tile; sateichii mpounii gonyiigo kaswisii nyiigo Jisunii kalei niteikii pang gongpyii tangle.

¹⁵ Kadapokii Saraa- mah jumage kapyii tei mei moida kisii kisii gongtang sekchii, Saraamah pumtei kava kiteikii kisii hakalang- mah kariita tei nyiinii pyiitangle, ai kalei kaga hang ai gonyiimah kabi jangpiiniile.

Kamalum kito karing

¹⁶ Aijangpii nyiinii lung taisang taimakle, nyii pumzainii adoidoi huilatsii leikado, nyii rangii teinii tingnei tingneikii tiiranu aitakle.

¹⁷ Kadapokii ai kacheng ninado shangniikii jangpii nyiinii doukalei kamage ainii nyiinii doukalei kamage ai sung disang dikisii nyii jangpii dikaki kalui kaga pumtei kava tei pung gongpyii tangle.

¹⁸ Kadapokii nyiinii mik leeng kalei teinii mikpii ngoukalei gotei makle, nlenii mikpii ngoukasu mah goteile. Mikpii ngou kabui pot teinii shangniikii jangpiile, nlenii mikpii ngoupei wokalak teinii kalui gale.