2 KORENMEI 3 - KARANU KABI SAMTAM

Sat tang karam karanu samtam mah kikaleimei

¹ Nyiinii nyii roinapii nyiigo nlai- loisii tam matoi leipo? mak-kii gonyii dakii kado, gonyii dato kado tam mbisii jukamati mah chiti tei mei kakimei kangkanii tiikalei takumpiinii, nyiinii tiitang karam leipo?

² Gonyii lungkii ryii kabam meihangnii titang karam ninado fiitang karam nyiimah chiti tei go- nyiile.

³ Gonyiinii Kristanii ryiikabam ninado nyiinii mpot magong kalei chiti hangninii takumle. Ai ainii mukdwipiinii ryiimakle, nlenii karing Saraamah rangii teipii ryiibamle sateichii atukok kikii makle, nlenii meinah mah malung kikii ryiibamle.

⁴ Nyiinii ai ai tam leile, dapo- chiinii Krista paikito nyiinii Saraa dakii maning kamalum tei leile.

⁵ Ai tha ai nyiinii tiimajyiile katu nyiinii nyii roinapii tam tang karam majyii tei nyii dato samah kado gale; nyiinii doukalu tiikamajyii tei Saraa datole.

⁶ Sat tang karam karanu samtam mah nga kangamei tiitang karam tiikamajyii tei mpounii nyiigo pyiile, ainii ryii kabam ajaitingshang tei- makle, nlenii rangii mahle. Kadapokii ryiikabam ajaitingsang teinii katai tei poigongle, nlenii rangiinii karing tei pyiile.

⁷ Ajaitingshang tei atukok kikii gek dowkai wotakle sateichii teitei pyii katu tinglang kak, Saraa mah pumtei kava humpyii takle. Moses ju kito kava tei nkhiihumsii leikado, teitei teibeidi jusii Isrelmeinahnii Moses gamkii mik jupeiwo lak takle. Katai pung kagong ajaitingshang teinii pumtei kava teiziikapii gong- tak leponii.

⁸ Rangiimah pumtei kava teinii teidoito kadaziikapii dikisii gong tangpo?

⁹ Kadapokii tiikamaga mah ajaitingshang kitei pumtei kava leileponii, kasang kamajyii kitei pumtei kava kadaziikapii kitangpo?

¹⁰ Aitoinii kisii vakabi pumtei kava jangteipii karei tinglangki vakabi pumtei kavatei tat tutak lesii nyiinii tam wobuile.

¹¹ Kadapokii gatu tang karam kitei pumtei kava tei leileponii, kalui kaga kiteinii pumtei kavatei kadaziikapii kisii leitangpo?

¹² Nyiinii maning kamalum ai kalei taiswisii, nyiinii hangkapii lungdile.

¹³ Nyiinii, vakabi tei gabui buihumsii gakatu tei Isrelmeinahgo mangoulak tang karam jangpii mpou gamkii ju kasong peira kaikalei, Moses takum makle.

¹⁴ Ahnyiimah lungswi tei gomnei aitakle, sateichii sat tang karam karei samtam mah larekbung tei ahnyiinii fiitang karam kito njoi katu ju kasong peira teipii ahnyiimah lungswi tei tingnei katangpii gomnei wotakle. Ju kasongmah peira teinii mei hang- ninanii Krista dakii roinii nja kaleitainii poitoi wobuile.

¹⁵ Tingnei katangpii ahnyiinii Moses mah ajaitingshang tei kafiita, ju kasong peira teinii ahnyiimah lungswi hangtei gomneisii bamle.

¹⁶ Nlenii teitei poitoi wobuile, kabi rasam teinii Mosesmah kaang kito katam takumpii: “Mpoumah ju kasongmah peira tei poitoi takle mpounii Bang- piida nryii kagong tinglang kak.”

¹⁷ Aitoinii, Bangpii teinii rangiile, sateichii Bangpii mah rangii kaleini hang kitei, laat kabam arangra katii tei leile.

¹⁸ Sateichii nyiihang ai jusong supiinii Saraamah pumtei kava gotei jusii, mpoumah njoi kikii pumtei kava hangninii kito hangninii kikii tiikalikai aitakle, kadapokii rangii tiisii kalei Bangpii dato ai ai gongle.