2 KORENMEI 13 - KARANU KABI SAMTAM

Polnii Korenmei dakii kalui tiisii katam sam

¹ Aitoinii Inii gonyiida roigong tang karam aipii hangtum kashangle, meigo tam kamashyii sam hangtei mei hangna mak-kii hangtum mah sakchyii teipii jumtang karamle kabi rasam kito katam takumpii,

² asung kareiki kem kama tiikalei mei dakii sateichii kakimei hang dakii tiiloikai sulosii Inii tam takle, sateichii Inii hangna kashang tiisii kagong tinglang ki kak Inii tiikalei takumpiinii, aitoi Inii gong haikasu tinglang ki tiiloi sulosii Inii tamloi leile. Inii nlailoisii kagong kinii mei kaniido kadwi karat kiteito nlek wolakle.

³ Kristanii gudato tamsii leile katu tei maning kariirhii katu tei gasii tiikamangou tei gonyiinii kamarei taiswisii gonyiigo mpounii kaswisii lung kalei tinglang kak, mpou ai suimakle, nlenii gonyii dato tei mahamsii leile.

⁴ Kadapokii kasui kiteito mpougo gi aitakle, nlenii Saraamah teimaham teipii ringsii leile. Kadapokii nyii ai mpou dato suile, nlenii gonyiigo kaswisii lung katu kito Saraamah teimaham teipii nyiinii mpougo kaswisii lung tangle.

⁵ Gonyii mah kamalum kito gonyiinii satsii leimanii leimakpo, katu jutang karam jangpii, Gonyii roinapii jaijulo. Kristanii gonyii dato leile katu gonyiinii timakpo? jaikaju tei gonyiinii kasangpii kadoupeilak kasuta!

⁶ Nyii ai tiidou kalakmei makle katu tei gonyiinii titangle katu Inii malumle.

⁷ Nlenii jaikaju tei nyiinii doukalu takumpiinii ngou matu tang karam jangpii makle, nlenii jaikaju tei nyiinii tiidou kalak takumpii ngoutusii leikado, gonyiinii kasangtei tiimatu wokabui tiisii, gonyiinii tiima kasu tiisii nyiinii Sa- raago riita leile.

⁸ Kadapokii nyiinii kasang gotei mazhii kasu samah kado tiipei wolakle, nlenii kasang jangpii roiniile.

⁹ Kadapokii nyiinii suisii kalei tinglang ki sateichii gonyiinii teisii kalei tinglangki, nyiinii ntale, nyiinii riita kalei teinii gonyii mah bibwi tang karam jangpiile.

¹⁰ Tiikou tang karam jangpii supii tiimadi tang karam jangpii Bangpiinii n-gu pyii kabam teimaham taiswisii Inii gonyiida kagong kak ngou kahing tiisii tiikasu tiisii gonyii dato Inii dhiisii kalei kak Inii ai ai ryiile.

¹¹ Sateichii aitoinii gukangsanamei, bisii bamlo! Bimatui bimasang kabui tiilo! Inii khangkalei hangtei shiilo; hangninanii hangniniigo kaning bisii, majung makungsii lunglo; teitii leponii, lungkasyii ninado kamajung kamakung mah Saraa teinii gonyiigo kaswipyii tangle.

¹² Kamatei kamatwum teipii hangninanii hangniniigo salam tiilo. Kamateimei hangnii gonyiigo salam pyii leile.

¹³ Bangpii Jisu Krista mah jumage kapyii, Saraamah lungkasyii ninado rangii kamateimah kaswikapyii tei gonyii hang go kaswipyii matulo.