2 KORENMEI 1 - KARANU KABI SAMTAM

¹ I-Pol, Saraanii kamaning kamarei kito Krista Jisu mah Tiilamlwi kapyiimei hangninii tiisii kalei sateichii nyii kangsanapii Timothi dato, Koren kito Saraanii lat mpat kalumei sateichii Akaiya sazyii lungto kalei kamalum meihang dakii:

² Nyii Pfii Saraa sateichii Bangpii Jisu Kristanii Jumage kapyii ninado kamajung tei gonyiigo pyii matulo.

Polnii Saraago hakalang

³ Nyii Bangpii Jisu Krista mah Saraado, Apfiido tiisii kalei, lungsyii kati mah Apfii sateichii tiikaha hang kapyii Saraa, Ah gotei tam matoile!

⁴ Nyiimah kaset kalak hang kito mpounii nyiigo tiihale. Teijangpii Saraanii nyiigo kapyii tiikaha aipiinii, kaset kalak kito kalei kakimei hang gotei nyiinii tiiha wobuile.

⁵ Kadapokii Krista mah kamage kalak hang kiteito nyiinii njai poi njoi katu takumpiinii, Krista paikito Saraamah tiikaha kadi tei nyiinii njai dou njoile.

⁶ Nyiinii kamage kalak kadouta, gonyiinii tiikaha tei doule ninado rangii tei tiisangting pyiile; sateichii nyiigo tiikahata, nyiiniido doukalei kamage kalak hang tei, gonyiiniido lung lumsii pungwo kabui mah njoi katu tiikaha tei gonyiinii doule.

⁷ Gonyii jangpii nyiinii maning kamalum tei nlaisang nlai makle; kadapokii nyiimah kamage kalak hangtei go- nyiinii njai poihai katu takumpiinii, nyiimah kazangjyii kitodo gonyiinii njai tei poihai tangle.

⁸ Nyii kangsanamei, Asia kito nyiinii doukatu kaset kalak kadi tei nyiinii gonyiigo timatunyiile. Nyii phyiiryiikii kai kapyii kaset kalak tei diju masui jusii nyiinii ringtang karam mah maning kamalum teido gatakle.

⁹ Taitang karam tinglang tei nyii phyiiryii gongtakle katu tei nyiinii titakle. Nlenii nyiinii nyii phyiiryiikii malum matulak tang karam jangpii, nlenii kataigo tiima- ring kapyii, Saraa gotei roinii malum matu tang karam jangpii ai ai pat takle.

¹⁰ Tei kakum taitang karam mah ngoukahing sadoi kashyii hang kito mpounii nyiigo keipyii takle, sateichii mpounii nyiigo keipyii tangle; sateichii mpounii nyiigo nlailoisii keipyii tangle katu nyiimah maning kamalum tei mpou phyii- ryiikii pyii aitakle.

¹¹ Gonyiimah kariita teipii gonyiiniido nyii jangpii tiiha tang karamle, dapokii nyii jangpii riita khangkalei hangtei khepyii matu tang karam, sateichii Saraanii nyiigo satoi pyiimatu tang karam, sateichii mei moinii rok sa- goisii nyii jangpii mpougo hakalang tam matu tang karam jangpiile.

Pol mah kasang lungswi

¹² Kadapokii det tiikalei teinii aile; kabi kashyii tikabui nyii lungswi mah sakchyii, katunii, sazyii pouryii aito nyiinii tiilung lung kamatwi sateichii arou tiisii nyiinii gonyiigo ahai areng kabam kito, Saraanii pyiikabam kamatei ninado kasamsang teipii apum tiile, sazyii pouryiimei mah swirek kabi teipiinii makle; nlenii Saraamah jumage kapyii teipiiniile.

^13-14 Gonyiinii fii kabui ninado tikabui tei roinii nyiinii gonyii dakii ryii leile. Nlenii aitoi gonyiinii nyiigo chengniikii roinii tisii leikado, gonyiinii nyiigo masangsii tigongtu tanglesii Inii maning malumle. Kada- ponii nyii Bangpii Jisumah leimik piinei nyiinii gonyii jangpii detdi tang karam takumpii gonyiiniido nyiijang- pii detdi matu tang karam jangpii.

¹⁵ Ai hang ai madou kasu tiilak takle katu tiwosii teijangpii Inii gonyiida gongtang lesii karei kito maningsii leile; gonyiinii sadoi kabi tei maziina tiisii doumatu tang karam jangpii.

¹⁶ Inii Mesidoniyaki gong tang karam jangpii tat tang karam gu pwidi lamto Inii gonyiida kahaikai tangle sateichii Mesidoniya kito gonyiida nlaikai gongsii, teito Judiya ki gong tang tang karam jangpii n-gu pwidikii gonyiigo kapao mpyiinyiisii leile.

¹⁷ Inii ai kamaning kito tiitang karam jangpii sat kalu lungswi kaga tei mangou aitakpo? Mak-kii Inii kamaning tei, gudato nle, nlesii mak-kii makle, maklesii njoisii binakii tam tang karam jangpii, Inii pumzai taiswisii tiileipo?

¹⁸ Saraanii madousupii kasang tamsii kalei takumpii, gonyii dakii Inii katam samtam teinii nle, nle sateichii makle, makle katu tei makle.

¹⁹ Kadapokii Silvanasnii, Timothinii sateichii Inii gonyii kak kikii tam rali kapyii Saraa nah sapfii mpou Jisu Krista, teinii “nle” katu sateichii “makle” katupii tei makle; nlenii mpounii Saraa mah “nle” katupii teile.

²⁰ Kadapokii Saraa mah riishii hang go “nle” katupii mpoule. Teijangpii nyiinii Saraago tam kamatoi kak Jisu Krista paikito ‘Amen’ tei nyiinii tamsang tamle.

²¹ Gonyiigo njasii nyiigo tiikapyii ninado nyiimah tiilung ai Kristago hangninii tiisii nja katu kito tiisangting kapyii tei Saraa ah sekle, nyiigo poi mpat tham kapyii tei Saraa ah sekle;

²² mpounii nyii phyiiryiikii apum katii mah siiti tei kaipyiibam takle, sateichii mpounii nyii jangpii poi ndwi kabam hangtei soisupii pyii mashang tang karam mah kamazhii ai hangninii takumpii, mpounii mpoumah rangii kamatei tei nyiilung kikii pyiibam takle.

²³ Gumah sakchyii tiisii Saraago Inii latle, Ahnii gulung tile! Inii Koren ki gonglak taklesii sat kalu tei gonyiigo tiikamageloi lak tang karam jangpiiniile.

²⁴ Nyiinii gonyiimah kamalum phyiiryiito apum tiitang karam jangpiinii makle, nlenii gonyiigo nta matu tang karam jangpii nyiinii gonyiigo kaswisii tha tiileile. Kadapokii gonyiinii kamalum kito sangtingsii satsii leile.