1 TIMOTHI 1 - KARANU KABI SAMTAM

¹ Nyiigo Keikapyii Saraa ninado nyiinii kamalum Krista Jisumah mwija taiswisii Krista Jisumah tiilamlwi kapyiimei hangninii tiisii kalei Pol dato.

² Kamalum kito Gunah sapfii mpou Timothi dakii: Pfii Saraa ninado nyii Bangpii Jisu Kristanii jumage kapyii ninado kamajung tei pyii matulo.

Kasang kasu tam rali kapyii kito tiiloi sulosii tam kakhat kapyii

³ Inii Mesidoniya ki gongtang karam jangpii tat leibangpii, n-go tiilosii katam takumpii, Inii n-go Ipisas kito bam matunyiile, mei kangkanii teikito kasang kasu kanat kanhii ralipyiisii leile, teimei gotei ntak ailosii nang tamlo.

⁴ Meinahnii likalu rasam sateichii meilui lung kapat apeipaomei mah zei kathang hangtei rat toi ailosii tamlo; kadapokii ai kakum hang aipiinii kamalum kito kalei Saraamah nga ngamatu supii kisiipou koikamoi tei pat matule.

⁵ Pyii kalei mwija aimah kaangnii lung kamatei kito kabi kasang kamajyii tikabui lungswi kito, ninado kasangpii kamalum kito kagong lungkasyii tei tiimakhii tang karam jangpiile.

⁶ Mei kangkanii aihang kito tat nrek poitusii kakadak rashii kito, ahnyii mah pwidi tei maga aitakle.

⁷ Ahnyii teinii Sa- raamah ajaitingshang rali kapyiimei tiinyiile, nlenii ahnyiinii hangkapii maning malumsii tam kaleimah kaang mak-kii ahnyiimah samtam hangtei kadapeipo katu tei ahnyiinii timakle.

⁸ Ajaitingshang ai meinahnii jum matou woleponii, ajaitingshang ai bile katu tei nyiinii tile.

⁹ Nlenii ajaitingshang ai mei jangpii tiimakle, nlenii ajaitingshang tiika- pakmei sateichii katam swikasumei, Saraago tikasumei, kem kamamei, matei kasumei, sateichii tiikama- hongmei jangpii, pwi pfiigo kagimei, meigo kagi kabamei,

¹⁰ Kashyii kahong tha katiimei, mei tiikasu kashyii tha katiimei, meipwi mei- nahgo karagamei, chuisii kasang kasu sakchyii kapyiimei mak-kii kasang kabi ralikapyii kito mazhii kasu tha katiimei jangpii ajaiting- shang ai tiibamle, katu ai mangailak tang karamle.

¹¹ Satoi pyiikati pumtei kava Saraamah kabi rasam n-gu tam matilosii gudakii pyii kabam tai swisiile.

Saraamah lungkasyii jangpii hakalang

¹² N-gu tiisangting kapyii nyii Bangpii Krista Jisugo Inii halangle, dapokii nga ngamatu tang karam jangpii mpounii n-gu kalaipyiisii malum kabuimei hangninii tiipyii takle.

¹³ Ndou kareiki Inii mpougo tam kamashyii, tiikamage katu sateichii kalet kalou tiisii leikado, Saraamah lungsyii kati tei Inii doutakle, kadapokii kamalum tei Inii doumakle. Teijangpii Inii dapei tiileipo katu tei Inii timakle.

¹⁴ Sateichii nyii Bangpiinii mpoumah jumage kapyii kamoi tei guphyii- ryiikii ruikaipyiile ninado Krista Jisugo nyiinii njasii hangninii tiikalu kito kamalum sateichii lungkasyii tei n-gu pyiitakle.

¹⁵ Jisu Kristanii kakui kama meigo keipyii tang karam jangpii sazyii pouryii gongpyiile katu ai malum wobuile sateichii nyiinii lukai tang karam jangpii tam kalei sam ai kasangle sateichii kem kama mei hang kak kiteito kem tiikaki tei I-le,

¹⁶ Nlenii mpougo malum wosii kalui kaga karing doutang karam mei jangpii nda tiikamangou hang- ninii tiisii, kem tiikakipii, n-gu kaswisii kalei kito mpoumah lung leh kati tei Krista Jisunii mangou kabui tiisii Saraanii n-gu lungsyiipyii takle.

¹⁷ Kalui tiikasu sagong, gakalak sateichii mikpii ngou kasu hangni- niisang hangninii roinii kalei Saraa dakii kalui gasii dzyii ka-nrou ninado tam kamatoi tei matulo Amen.

¹⁸ Gunah Timothi, gumah kaang kito Saraa sam katam meinii sung kareiki tam kabam samkang hang taiswisii, kakhatsam ai Inii godakii pyii leile. Nangnii bisii saryii tiikabui tiisii kabi kashyii titang karam lung- swi tei (teimah samkang hangtei) beitui tiisii jumlo.

¹⁹ Sateichii gumah kamalum ninado kamatei lungswi titang karam lungswi tei leilo. Mei kangkanii ahnyiimah kabi kashyii titang karam lungswi gotei shii supii ahnyii mah kamalum tei tiimaga aitakle.

²⁰ Ahnyii kak kito Heninios ninado Alekjendarle; tam kamashyii sam tam matulak tang karam jangpii ahnyiinii rali matulak tang karam jangpii, Inii ahnyiigo seitan dakii pyiitoi aitakle.