1 THESOLONIKAMEI 5 - KARANU KABI SAMTAM

Bangpii gong tang karam jangpii tiidalo

¹ Nlenii tinglang hangmah kaang kito, kangsanamei, gonyii dakii ryiitang karam kabi gale.

² Kada- pokii karagameinii tinghum kagong takumpii Bangpii mah leimik teinii gong tangle katu tei gonyiinii tiigatpii tile.

³ “Ahnyiinii majung takle sateichii doikadang gale,” katu tinglang kiteito tisang tisupii sapwimeinii nah kamanaa ki tiikapi takumpii tiikamaga tei ahnyii phyiiryii gongtangle; teito ahnyiinii nleksang nlekpei wolakle.

⁴ Nlenii kangsanamei, teipiinei karagamei takumpii gonyiigo tii asung gamatu tang karam jangpii, gonyiinii kamyii kito bam makle.

⁵ Kadapokii gonyii hangnii kava ninado tingnamah nah sapfiimei hangle, nyiinii tinghum mak-kii kamyii mah nah sapfiimei makle.

⁶ Teitii leponii kakimei ta- kumpii nyiinii zyiisude, nlenii nyiinii mikraksii lung manoile,

⁷ Kadapokii zyii kaleimei teinii tinghum zyii leile, sateichii jou kapanhiimei teinii tinghum panhii leile.

⁸ Nlenii nyiinii tingnamah katu taiswisii, nyiinii lung manoile sateichii kamalum ninado lungkasyiimah kokryii ninado keikapyii karing doutang karam ma- ning kamalum mah saryii phyiihung tei nyiinii kai wode.

⁹ Kadapokii Saraanii nyiigo rakarhii tei doumatu tang karam jangpii kalai makle, nlenii nyii Bangpii Jisu Kristamah paikito keikapyii karing tei doumatu tang karam jangpii kalaiwo takle.

¹⁰ Nyiinii ringsii leikado, zyii kado, nyiinii mpougo kaswisii lung njoitang karam jangpii mpounii nyii jangpii taipyii takle.

¹¹ Gonyiinii tiikalei takumpii, gonyii hangninanii hangniniigo lung tiimakhii pyiilo sateichii hangninanii hangniniigo tiimakhii halo.

Kalui tiisii tamrali kapyii ninado salam kapyii

¹² Nlenii kangsanamei, gonyii kak kito tha tiisii kalei, Bangpii zei kito gonyii phyiiryiito kalei sateichii gonyiigo kristenmei mah tiilung kito tampyii ralipyiisii kalei ahnyii gotei tiigatpii titang karam jangpii,

¹³ sateichii ahnyiimah tha jangteipii lungsyiisii ahnyiigo kisii disii sadzyii ngariit tiitang karam jangpii, nyiinii gonyiigo khangleile. Gonyii kak kito majungsii bampyiilo.

¹⁴ Sateichii kangsanamei, nyiinii gonyiigo tam katwi leile, kamahat meigo mahat sulosii tampyii ralipyiilo, rangii kasuimeigo lung tiimadi pyiilo, kasuimeigo tiihalo sateichii ahnyiihang dato lungleh tilo.

¹⁵ Kashyii jangpii kashyii teipiinii mei kaniido powrui kalat matu sulo, nlenii hangninanii hangninii jangpii sateichii kalei kaga jangpii kabi tiitang karam jangpii tinglang kaleita fiilo.

¹⁶ Tinglang kaleita ntalo;

¹⁷ Taksupii riitalo;

¹⁸ tinglang hang kito hakalang tei tamlo, kadapokii ai ai gonyii jangpii Krista Jisu dato Saraamah kamaning kamarei teile.

¹⁹ Rangiigo mazhii kasu tiisulo.

²⁰ Saraa sam tam ka-mpat tei ma- ning majang sulo.

²¹ Nlenii mahlyii hangtei ajai julo, kabi tei tiigatpii jumlo,

²² kashyii jai hang kiteito ryii wolo.

²³ Kamajungmah Saraa pumsek teinii gonyiigo mashangsii tiima- teipyii matulo; sateichii nyii Bangpii Jisu Kristanii kagongki gonyiimah rangii, rakot ninado pumrong hangtei sajek gasii bisii bam matulo.

²⁴ Gonyiigo lat kapyiipii mpou teinii malum wobuile, mpounii teitei tiido tiipyii tangle.

²⁵ Kangsanamei, nyii jangpiiniido riitapyiilo.

²⁶ Kamatei bah kajum katu tei kaswisii meihang go salam tiilo.

²⁷ Chiti ai kangsanamei hang dakii fiimatu tang karam jangpii Inii Bangpii zei kito khangleile.

²⁸ Nyii Bangpii Jisu Kristamah jumage kapyii tei gonyiigo kaswipyii matulo.