1 PITAR 4 - KARANU KABI SAMTAM

Kristenmei mah kasatai tiilung

¹ Teijangpii Kristanii pumzai kito kamage kalak pung kapyii taiswisii gonyii roinapii gonyiido mpounii kamaning lungswi teigotei njoisii saryiinat takumpii kai wolo; kadapokii pumzai kito kamage kalak doukalei mei teinii kem kito mpat kapyii tei doutakle;

² teipiinii gonyiinii gonyiimah mashak kalei tiilung tei sazyii pouryiimah kamarei ka-ntha taiswisii lungkai supii, Saraanii kamaning kamazhii tai- swisii lung tang karamle.

³ Jehu- dimei kasu lui kakimeinii kamarei hangtei tat tukalei tinglang kareiki gonyiinii tiikalei teipiinii buitakle. Dapokii matei kasu, pumzaimah kamarei ka-ntha, jousak kapanhii, meinah jai tiikasu, kajoushii katu, ninado ka-nraang tingtumah param hang go kamata kito gonyiimah tiilung tei lungtoi aitakle.

⁴ Sateichii aitoinii tei kakum hangkapii kem katii jaishang kitei ahnyiigo gonyiinii nja kasu tinglang kak ahnyiinii sung gatakle, teipiinii ahnyiinii gonyiigo tam mashyiile,

⁵ nlenii karing godo katai godo samtak tiitang karam jangpii tiidasii kalei Saraa dakii tiikabam tha hangtei ahnyiinii mangou tangle.

⁶ Kadapokii meinah takumpii pumzai kito samtak tii aikido ahnyiinii rangii kito Saraa takumpii ring kabui jangpii kataimeida katangdo kabi rasam tei tam ralipyii takle.

Saraamah mahbam tiigatpii kajumei

⁷ Mahlyiihang mah kalui tei natakle, teijangpii gonyii roinapii gonyii pumpot jum majyii jum matuiwolo, sateichii riita wokabui tiisii sakai wolo.

⁸ Mahlyiihang phyii- ryiito gonyii hangninanii hangni- niigo kalungsyii katu kito lung liitlo; kadapokii lungkasyii teipiinii kem hangkii gomtwum pyiile.

⁹ Tiikarou gasii hangninanii hangniniigo pyiichii pyiisakti sii kalungsyiilo.

¹⁰ Mei nsang nsangnii Saraa dato luha doukalu taiswisii, gonyii hangninanii hangniniigo Saraamah kataam kataam luhamah kabi mahbam kajumei takumpii jum tang karamle.

¹¹ Tam ralipyiisii kaleimei teinii Saraamah samtam takumpii tam ralipyii tang karamle; nga ngasii kaleimei teinii ahgo Saraanii pyiisii kalei teimaham teipiinii nga ngatang karamle, dapokii teipiinii mahlyii hang kito Saraago Jisu Krista zei kito tam matoi tang karam jangpiile. Mpou dato kalui kaga pumtei kava ninado teimaham tei leile, Amen.

Krista jangpii kamage kalak kapung

¹² Lungkasyiimei, gonyiigo jaiju tang karam jangpii gonyii phyiiryii gongkalei mi karumah kamage kiteito asung kaga tha gonyii dato pat leitakle katupii sung gasulo.

¹³ Nlenii Kristamah pumtei kava mati kamangou kak, gonyiinii kisii ntasii ranga tang karam jangpii, Kristanii kamage kalak kapungmah njai dou njoisii kalei gonyii ntalo.

¹⁴ Gonyiinii Krista tai kaswi jangpii, gonyiigo kalet kalou tiileponii, gonyii sadoi bile, kadapokii pumtei kavamah sateichii Saraamah rangiinii gonyii phyiiryiito leile.

¹⁵ Nlenii gonyii mei kaniido meigo kagimei mak-kii, kara- gamei, mak-kii kama tha katiimei, mak-kii mei kakimeimah samki hai katimei katii jangpiinii kamage kalak tei punglak tang karamle.

¹⁶ Nlenii gonyiinii Kristen mei hang- ninii tiikatu jangpii kamage kalak tei pungsii lei leponii, teikito nrou sulo, nlenii teimah zei kito ahnii Saraago tam matoi matulo.

¹⁷ Kadapokii Samtak tiihao tang karam tinglang tei gongtakle, satei- chii Saraamah mei sek gotei samtak tiirei tangle. Samtak tei nyiidato tiihao takleponii, Saraamah kabi rasamgo malum kasumei mah kamaswi teinii kadapei tangpo?

¹⁸ Sateichii “Kasang kamajyiimeigo kamage gatsii keipyii leponii, Saraa maning kasu sateichii kem kama katiimeinii kadaki gong tangpo?”

¹⁹ Tei jangpii Saraamah kamaning kamazhii taiswisii kamage kalak pungsii kaleimeiniido malum kabui Saraa dakii kabi tha tiisii ahnyiimah rakot tei pyii matulo.