1 PITAR 2 - KARANU KABI SAMTAM

Karing kuitu ninado kamatei lui

¹ Teijangpii kachui, kabijai katii, meigo kamaimhii, kalet kalou katii lat, sateichii kashyii kahong kiteito gonyii roinapii gonyii mpaa wosii,

² nahmei karanumei takumpii, tinglang kaleita kamatei rangiimah nadwi gotei mangwilo; dapokii tei sak kalu teipii gonyiinii dikakhii thang kakhii ninado keikapyii karing doukido malahle.

³ Nah karanumei takumpiinii nadwi gotei saryiisii mareilo.

⁴ Meinahnii mazhii supii rat toi kalei, nlenii Saraa mikjot kitonii kalai kalu, mai kateeng, ninado karing kuitu datei gonyiinii gonglo.

⁵ Jisu Krista paikito Saraanii mazhii kapyii sateichii rangiimah kakarat pot hangtei pyiitoi tang karam jangpii, kamatei atingmei hangninii tiitang karam jangpii, gonyii roinapii gonyii karing kuitu hang takumpii rangiimah kitei tiimakhiilo.

⁶ Kadapokii kabi rasam kito tamle, “julo, kalai kalu sateichii mai kateeng ki kha kimah kuitu hangninii Inii Zaiyon kikii kaibamle. Ahgo kamalum mei hang gotei tiisang tii nroulakle.”

⁷ Teijangpii gonyii malum kalumei jangpiinanii, mpou ai maiteengle, nlenii malum kasu ahnyii jangpii- nanii, “Ki katiimeinii maikaga kuitulesii mazhiikasu tei hangkak kito roukatii ndat takle.”

⁸ Sateichii kabi rasam kaki kito tamle, “Meigo pi pasui matutang karam kuitu, ahnyiigo tiikou tang karam kuitu kadi tei aile.” Ahnyiinii pi pasuile, dapokii ahnyiinii samtam tei swimakle; tei kakum tei ahnyii jangpii Saraanii reipii tiida kabam teile.

⁹ Nlenii gonyiigo kamyii kito mpounii sung kaga kava kikii lat mpat kapyii mpoumah kamadat tha hangtei saa mpat matutang karam jangpii, kalai kalumei lui, sagong- mah atingmei, kamatei lui Saraamah mei tei gonyiile.

¹⁰ Tinglang hang- ninii kinii gonyiinii Saraamah mei makle, nlenii aitoinii gonyii ai Saraamah mei tei takle, tinglang hangninii kinii Saraamah lungkasyii tei gonyiinii doumakle, nlenii aitoinii mpoumah lungkasyii tei gonyiinii doutakle.

Saraa mah kikaleimei

¹¹ Lungkasyiimei, gonyiinii sapum- nah tiisii ninado shangniikii jangpii lungkalei sazyii pouryii meinah tiisii! Tinglang kaleita gonyii mah rakot go saryii tiisii kalei, pumzaimah kamaning kamarei hangtei tiisulosii Inii gonyiigo khang leile.

¹² Gonyii kashyii tha katiimei lesii gonyiigo ahnyiinii tam tuleponii, gonyiimah tha kabi hangtei ngoukabui tiisii sateichii mpounii kagong piinei leimik nyiinii Saraago tam matoi wokabui tiisii lui kakimei hang kak kito gonyiimah jairali tei bitang karamle.

Sazyii kakoirakmei kang nkang tang karam

¹³ Bangpii ju jusii gonyii roinapii gonyii sazyii koiraksii kalei hang phyiiryiito kasat, sagong go kado,

¹⁴ mak-kii kashyii tha katiimeigo apow ruimatu tang karam jangpii sateichii kabi katiimeigo tam matoi matutang karam jangpii mpounii kalai kabam Governor hang kang nkanglo.

¹⁵ Kadapokii kasang kabi katii teipii kapang kamangmei mah tikasu ngoukasu tei malhiisupiinii leimatu katu tei Saraamah kama- ning kamazhii teile.

¹⁶ Laat kabam arangra katiimei takumlo, teitii kado gonyiimah laat kabam arangra katii kashyii kahong go gomtwum tang karam jangpiinii jum sulo, nlenii Saraamah kikaleimei takumpiinii lunglo.

¹⁷ Meihang go sadzyii ngariit tiilo, kangsanameigo lungsyiilo, Saraago hinglo sateichii sagong go sadzyii ngariit tiilo.

Kristanii kamage kalak kapung mah nda

¹⁸ Kikaleimei, kabi ninado lung kamanoi gonyiimah apum mei dakii roinasupii manghiirang rangsii kalei apum mei dakiido gonyiimah matum madumpii sadzyii ngariit katii tei njasii gonyii roinapii gonyii mah apum mei kang nkang tang karamle.

¹⁹ Kadapokii Saraamah kamaning kamarei taitei gonyiinii switang lesii sat tosii gonyiinii doumajyii kasu kadwi karatmah kamage tei gonyii- nii lung manoisii leh woleponii, Saraanii gonyiigo satoi pyii tangle.

²⁰ Kadapokii gonyiinii tiima kalei jangpii doukamajyii kalak kathai hangtei gonyiinii lung manoisii leh wokalu kito, tam matoitang karam kabi kadapei leipo? Nlenii gonyiinii kasang kamajyii katii kito gonyiinii kamage kalak tei lung manoisii leh woleponii, Saraanii gonyiigo satoi pyii tangle.

²¹ Kadaponii aikikii gonyiigo Saraanii latto takle; kada- pokii gonyiinii Kristamah pikang tai swimatu tang karam jangpii, gonyii dakii nda tiimangousii, gonyii jangpii Kristaniido kamage kalak tei pungpyii takle.

²² Mpounii kama tiisang tiimakle, sateichii mpou mwi kito kachuisam kapat meikado shiimakle.

²³ Mpougo kalet kalou katii tinglang kak, kalet kalou katii teipii mpounii khekalat makle; mpounii kamage kalak kadou tinglang kak, mpounii tiimahing katu tiimakle, nlenii kasang kamajyii samtak katii Saraa gotei mpounii malumle.

²⁴ Kem kito tai aisii nyiinii kasang kamajyii kito ringtang karam jangpii mpou sekpiinii Krosh gamto mpoumah pumpot kikii nyiimah kakui kama hangtei pungpyii takle; mpoumah rajam jam teipiinii gonyiigo tii mbipyii takle.

²⁵ Kada- pokii gonyiinii Jaonah takumpii maga aisii tat tutakle, nlenii aitoinii Jaokakoipii ninado gonyii rangiigo jukapyiipii Kristada gonyiinii nlai gong takle.