1 KORENMEI 7 - KARANU KABI SAMTAM

Kalakna katii, kalakna tiikasu sateichii nounaa n-noukatu

¹ Aitoinii gonyiinii ryii kamagong mah kaang ki teito sapfiimei hangninanii sapwimeigo dengsang deng kasu bile.

² Nlenii sapwimei sapfiimei kashyii kahong tha katii mah kahem kalei jangpii sapfiimei hangnii mpou mpou nou bam tang karamle sateichii sapwimei hangnii mpoupei naa nsang nsang bam tang karamle.

³ Naanii nougo pyii kamajyii tei pyii matulo. Sateichii tei takumpii nou teiniido mpou peimah naadakii pyii matulo.

⁴ Kadapokii nou teinii mpoupei mah pum gotei apum tiimakle, nlenii naa teiniile; sateichii tei takumpii naa teinii mpou pum gotei apum tiimakle, nlenii mpou nou teiniile.

⁵ Gonyiinii kariita tinglang pyii kabui tiisii tinglang shangniikii jangpii gonyiinii mazhii kalu tei supii; gonyii hangninanii hangniniigo nam sulo; sateichii gonyii roinapii gonyii pumgo pung matwi pung majyii tang kasu jangpii seitannii gonyiigo hem kasu tiisii gonyiinii nlailoisii kadouloi katu bile.

⁶ Nlenii Inii tam kalei ai azha makle, nlenii karasok tam leile,

⁷ meihangnii gu takum matu katu Inii mareile, nlenii mei nsang nsang- nii mpou mpou mah luha tei Saraa dato doutakle, mei hangninanii luha hangninii sateichii kaki hangninanii luha kaki hangninii doutakle.

⁸ Aitoinii Inii kalakna tiikasumei dakii sateichii kamipwimei dakii tam leile, gonyiinii gu takumpii kalakna tiisupii leileponii bile.

⁹ Nlenii gonyii- nii gonyii pum pungmatui pung majyiipei lakle leponii, marei majang mah mishong teipii rusii kabam sungnii kalakna tiikalei teinii bibwile.

¹⁰ Kalakna tiikaleimei dakii Inii kakhatsam ai pyii leile, Inii makle, nlenii Bangpiiniile, katunii nounii naago n-nou matu sulo.

¹¹ Nlenii mpoupeinii n-nou aileponii, kalakna tiisupii bam matulo, makchiinii mpoupei mah naago njaloi matulo, sateichii naa teinii mpou nougo n-noulak tang karamle.

¹² Sateichii mei kaki kakimei dakii Inii tam leile, Bangpiinii makle, kangsanapii hangninanii malum kasu nou leileponii sateichii mpoupei teinii mpougo kaswisii lung tang karam jangpii mazhiile leponii, mpounii mpoupeigo n-noulak tang karamle.

¹³ Sateichii sapwimei kata hangninanii malum kasu sapfiimei hangninii ki gongwo leponii, sateichii naa teinii mpoupeigo kaswisii lung tang karam jangpii mazhiiwo leponii, sapwi mpei teinii mpougo n-noulak tang karamle.

¹⁴ Kadapokii malum kasu naatei mpou nougo kapang kalu teipii Saraa doito lukai majyii takle, sateichii malum kasu noutei kama- lum naaki gong kalu teipii Saraa doito lukai majyii takle, aitiisii tiisu leponii, gonyii nahmei tei meidamei takum tangle, nlenii aitii katu taiswisii gonyii nahmei tei Saraa doito lukaimajyii takle.

¹⁵ Nlenii malum kasu nou mak-kii naa teinii kamalum nou mak-kii naago tei n-nou nyiileponii n-nou matulo, tei kakum hang kitonii kamalum nou mak-kii naateinii pei kabam kang- teito laat takle, kadaponii Saraanii gonyiigo majungsii lung matu tang karam jangpii latto takle.

¹⁶ Ka- dapokii nou, nangnii gonaago keipyii tangle keipyiiwo lakle katu kada takumpii tipo? Sateichii naa, nangnii gonougo keipyii tangle keipyii lakle katu kada takumpii tipo?

Saraanii n-go lat kalu tei taiswisii lunglo

¹⁷ Bangpiinii mei nsang nsang dakii pyii kabam luha, sateichii ahgo lat kalu teitei swisii meihangnii lung matulo, ai charsh hang dakii pyii kalei gumah ajai teile.

¹⁸ Saraanii lat kaleitai Jehudimei mah ajai taiswisii tiigyii malem kalei mei hangninanii lukai takleponii, ahnii tiigyii malem kalei mah siiti tei poitoi lak tang karamle, sateichii Saraanii kalat tei Jehudimei mah ajai taiswisii tiigyii malem kasumei hangninanii lukai tak leponii, ahnii tiigyii malem lak tang karamle.

¹⁹ Kadapokii mei hangninanii Jehudimei mah ajai taiswisii tiigyii malem kido tiigyii malem mak kido samah kado makle, nlenii Saraa mah kakhatsam gotei majai katu teile.

²⁰ Saraanii kalat tei lukai kalu tinglang kak ahnii kada takumpii leipo tei takumpiinii mei- hangnii lei matulo.

²¹ Saraanii n-go kalat kak, nang ki kabangnah tiileipo? Bitakle, lungnaang sulo, nlenii gomah laat mpat kapyii tei nangnii douwo buileponii, teitei kisii poisii tha tiilo.

²² Kadapokii ki kabang nah tiilei- bangpii Bangpiinii lat kalu ahteinii Bangpii mah arangra katiimeile, tei takumpii arangra katiimei hangninii tiisii lat kalumei teinii Krista mah ki kabangnahle.

²³ Gonyiigo mai pyiisii lyii wotakle; meinah mah ki kabangnah tiitu sulo.

²⁴ Teipiinii kangsanamei, mpou mpougo lat kapyii kiteito meihangnii Saraago kaswisii sangtingsii leimatulo.

Kalakna tiikasumei ninado kamipwimei jangpii katam

²⁵ Aitoinii kalakna tiikasumei mah kaang kito, Inii Bangpiimah kakhatsam tei doumakle, nlenii Bangpiimah lungsyii kapyii teipii malum kabuimei hangninii tiisii Inii gumah kamaning tei mati leile.

²⁶ Aitoi toi mah mage gotei maning mashak gongsii, mei hangninii jangpii mpou mpounii lung kalei takumpii teitiisii kalei teinii bilesii Inii maningle.

²⁷ Nang nou tiitakpo? Tei leponii n-nou tang karam jangpii maning sulo. Nang nou tiimakpo? Nou tiitang karam jangpii fiisulo.

²⁸ Nlenii nangnii kalakna tiiwo leponii gomah kem gale, sateichii sapwimei hangninanii mpoupei mah kem gale. Teitii kido kalakna tiikalumei teinii sazyii pouryii mah kamage kalak tei doutangle; sateichii Inii gonyiigo tei kito keipyii tangle.

²⁹ Kangsanamei, Inii katam tei kadagopokii, aile: tinglang dwitakle; teijangpii aitoi sekpiinii nou kabam mei teinii kaga takum matulo,

³⁰ sateichii kemsii hat kaleimei teinii kemsii hat kasu takum matulo; sateichii ranga kaleimei teinii ranga kasu takum matulo, sateichii mah lyiisii kaleimei teinii mah kaga takum matulo,

³¹ sateichii sazyii pouryii mahgo kaswi kaleimei teinii teigo tei kaswi kasu takum matulo. Kadapokii sazyii pouryii ai bam mathang lak takle.

³² Gonyiinii lungnaang supii kalei Inii mareile. Kalakna tiikasumei teinii Bangpii dzyii karanga tei kada takumpiinii tiitangposii Bangpii tha tiitang karam jangpii lungnhiile;

³³ nlenii kalak tiikalei sapfii mpou teinii mpou nougo kada takumpii dzyii karanga tiitangposii sazyii pouryii mah mahpot jangpiinii lungnhiile,

³⁴ sateichii mpou mah tiikanyii lungswi tei nja takle. Sateichii kalakna tiikasu sapwi mpei mak-kii ralhiipei teinii pumlam todo rangii lam todo kada takumpii matei tangposii Bangpii mah tha katii kito lungnhiile. Nlenii kalakna tiikalei sapwi mpei teinii mpoupei mah naago kada takumpii dzyii karanga tiitangposii sazyii pouryii mah lungswi kito lungnhiile.

³⁵ Gonyii bitang karam jangpii ai ai Inii gonyii dakii tam leile, Inii gonyii phyiiryiikii mazhii kalak mphee kaile katu mah makle, nlenii tiikamajyii sateichii kasang tei gonyiigo Inii tiimatu kanyii jangpii, sateichii gonyii jangpii sii kamasak hangninii kado gasii matum madum tei gonyiinii Saraa nga ngatang karam jangpii pyiimatu tang karam jangpiiniile.

³⁶ Kapang tang karam jangpii n-nhiitak kalei nounaa mah kaang kito, sapfii mpou teinii n-nhiitak kalei ralhiipei dateito mpou ai jai bisutak lesii maning tak leponii, sateichii mpoumah marei majang swi tei tei mahungju takle ponii, sateichii mei hangna ai kapang tang karam taklesii mpounii maning takle ponii, mpounii kamaning kamarei taiswisii ahnei hangnanii kapang maleilo, aikito kem gale.

³⁷ Nlenii sapfiimei hangninanii, tiilinglo katu karat samah kado gasii, kapang lak tang karam jangpii swi sangtingsii satto leponii, sateichii mpounii kamaning kamarei tei mpounii tiigatpii pung- majyii pungmatui wobui leponii, sateichii kadapei tiitangpo katu tei mpou lungswi kito maningsii sat toleponii mpounii ralhiipei gotei kapang kasu teinii bile.

³⁸ Teipiinii kapang kalu sapfii mpou teido bile. Nlenii kapang kasupii teinii bibwile.

³⁹ Naa teinii ring kaleita nou tei naa kangkii peibamle; nlenii mpoupei mah naa tei tai kalei tainii mpou- peinii kamarei sapfii mpou kitei gong tang karam jangpii mpoupeigo laat aitakle; Nlenii Bangpii dato roiniile.

⁴⁰ Nlenii mpoupeinii teitiisii leile leponii, mpoupei kisii ntale katu tei gumah kamaningle; sateichii Inii Saraa mah rangii doulesii maningle.