1 KORENMEI 6 - KARANU KABI SAMTAM

Kristenmei kak kito sam kapat

¹ Gonyii kak kito mei kata kangkanii njoi katu kangsanapii hangninii phyiiryiikii siiset kapat kak, ahnii kamatei meida masupiinii malum kasumeida samtak tiitang karam jangpii kadaziikapii mahing tangpo?

² Kamatei meinii sazyii pouryiimeigo samtak tiitangle katu timakpo? Sazyii pouryiigo gonyiinii samtak tiileponii, siiset kacheng gotei gonyiinii samtak tiipeiwo lakpo?

³ Nyiinii sating gamlui hang go samtak tiitangle katu gonyiinii timakpo? Teitii leponii ai sazyii pouryii mah mahlyiihang mah hang gonii kadaziikapii kitangpo!

⁴ Satei- chii tei kakum siiset hangtei gonyii dato pat leponii, charsh kito safii fiihai kasu meigo teihang tei samtak tiipyii matu tang karam jangpii go- nyiinii ahnyiida maatangpo?

⁵ Gonyiigo tii-nrou tang karam jangpii Inii ai ai tam leile. Kangsanamei kak kito samlat kamoigo samtak tiipyii tang karam kasakaimei hangninanii soi- supii leitangle,

⁶ Nlenii sanapii hang- ninanii hangninii phyiiryiikii mazhii supii samtak-ki tatsii bamle, teitei malum kasumeida maalei makpo?

⁷ Gonyii hangni ninago siiset kapung teinii gonyii jangpiinii kagale, teisungnii gonyii jangpii ma kalei teinii bibwi makpo? Teisungnii gonyii jangpii choiraga kalu teinii bibwi makpo?

⁸ Nlenii gonyii katangpiinii male ninado choiragale, gonyii kangsanamei kasang katang- pii!

⁹ Kasang kamajyii tha tiikasumei teinii Saraamah sating sazyii doulakle katu gonyii timakpo? Maningma sulo; kashyii kahong tha katii mak-kii, tingtugo kamata, mak-kii mashung kamaha, mak-kii pwimei pfiimei meijai tiikasu,

¹⁰ mak-kii karaga, mak-kii lukanyii, mak-kii kapanhii, mak-kii meisam tam kamashyii, mak-kii karagamei, ahnyii teinii Saraamah sating sazyii doulakle.

¹¹ Sateichii gonyii mei kangkanii teitakumpii leile. Nlenii nyii Bangpii Jisu Krista zei kito sateichii nyii Saraamah rangii kito gonyiigo shyiido shyii matei pyiitakle, tiido tiimateipyii takle sateichii tiido tiimajyii tiimatuipyii takle.

Saraa mah pumtei kava jangpii gonyiimah pum tei pyiilo

¹² Mei kangkanii tam tangle, “Inii mahlyii hang tiido mazhiile, nle, kasangle, nlenii mahlyii hangtei gojangpiinii bimakle.” Inii mahlyii hang tiido mazhii lesii tam buile, nlenii n-gonii mah kata hangninii kang nkangsii mbam lakle.

¹³ Mei kangkanii tam tangle, “Chiitak ainii moi jangpiile, sateichii moi ainii chiitak jangpiile.” Nle kasangle, nlenii hangna gotei Saraanii tiimaga tangle. Apum ainii sapwimei sapfiimei kashyii kahong tha tiitang karam jangpiinii makle, nlenii Bang- piigo nga ngatang karam jangpiile; sateichii Bangpiinii pumpot jangpii pyiichiile.

¹⁴ Saraanii Bangpiigo katai kito tiimaring pyiile. Sateichii mpounii nyiigodo mpou mah teimaham kito ringkhii matu tangle.

¹⁵ Gonyii pumpot tei Krista mah njaile katu gonyii timakpo? Teitii leponii Krista mah pumpot njai tei poi mpatsii sapwimei sapfiimei kashyii kahong tha katii mah pumpot njai tiimalei tangpo? Teisang teimakle.

¹⁶ Sateichii siiha kahamei hangniniigo kaswi kalei ah teinii ahgo pum hangninii tii aitakle katu gonyiinii timakpo? Kadapokii Saraanii tamle, “Hangna teinii pum hangninii tiitangle.”

¹⁷ Nlenii Bang- piigo nja kalu ah teinii rangii lamto mpougo kaswisii hangninii takle.

¹⁸ Sapwimei sapfiimei kashyii kahong tha katii kito pakpat wolo. Meinahnii katii kem hangtei pumpou tole; nlenii sapwimei sapfiimei kashyii kahong tha katii ah teinii ahroinapii ah pumpotgo mazhii kasu tiisii kem tiile.

¹⁹ Sateichii gonyii pum teinii gonyiinii Saraa dato doukalu, gonyii lungto kalei rangii kamatei mah kamatei kile katu gonyiinii timakpo? Sateichii gonyiinii gonyiimah roinamakle;

²⁰ Kadaponii gonyiigo mai pyiisii lyii wotakle, teijangpiinii gonyii pum lungto gonyiinii Saraago tam matoilo.