1 KORENMEI 2 - KARANU KABI SAMTAM

Krosh gamkii dhangsii gikalei Krista mah samtam

¹ Kangsanamei, Inii gonyiida kagong kaktei, Saraa mah kama- kum kasang samtei gonyii dakii sam kadipii mak-kii kadi swirek kabi- piinii tam ralipyii makle;

² kadaponii Inii gonyiigo kaswi kalei kak, Jisu Kristago ninado mpounii krosh gamto taikapyii teisupiinii, mahlyii hangtei Inii mangai aitang takle katupii gulung swi satto takle.

³ Teijangpiinii Inii gonyiida kagong kaktei Inii suisii, hingsii sateichii nchyiidung dungsii leile;

⁴ sateichii gumah ralikapyii sateichii samtam tei meinah mah kati kangou mah swirek kabipiinii tamlei makle, nlenii Saraa rangii teimaham kito maning kariirhii kaga tiikamangou teipiinii tam leile.

⁵ Kadapokii gonyiimah kamalum tei meinah mah swirek kabi kiteikii mbam sumak- piinii Saraamah tei maham kiteikii mbam tang karam jangpiile.

Saraa mah swirek kabi

⁶ Teitii kido swirek kabi mah samtam tei katingmei kak kikii nyiinii tam mpat pyiile. Nlenii sazyii pouryiimei mah swirek kabi tei makle, mak-kii gatang karam sazyii pouryii apum katiimei mah swirek kabi tei makle.

⁷ Nlenii sazyii pou- ryiihang tii-mpat kasuniito Saraanii nyiimah pumtei kava jangpii ndouto reipii tiida kabam kamakum satei- chii kabai kabam Saraamah swirek kabi tei nyiinii tam mpat leile.

⁸ Swirek kabi ai sazyii pouryiimei mah apum katiimei hangninii kaniido timakle; kadapokii ahnyiinii teitei tileponii ahnyiinii pumtei kavamah Bangpiigo krosh gamkii gilakle.

⁹ Nlenii ryii kabam aita- kumpii: “Miknii ngou kasu, koinii shii kasu sateichii meinah lungki liit kasu, hangtei Saraanii mpougo lungkasyiimei jangpii tiikada aitakle.”

¹⁰ Kadaponii Saraanii nyii jangpii rangii paikito mati mangoupyii takle, kadapokii rangii teinii mahlyiihang, katunii Saraamah kathoksam ka- tangpiinii fiile.

¹¹ Kadapokii meinah dato kalei rangii teisupiinii meinah kak kito tanii meinah mah swi kamaning gotei tipo? Teitakumpiinii Saraamah swi kamaning teido Saraa mah rangii teisupiinii mei kaniido tipei wolakle.

¹² Sateichii Saraanii nyii dakii pyii kabam luha hang gotei nyiinii tiwo kabui jangpiinii, nyiinii sazyii pouryii mah rangii gotei doumakle; nlenii Saraa dato kagong rangii gotei dou wotakle.

¹³ Sateichii ai ai sazyii pouryii mah swirek kabipii ralikapyii samlat kito nyiinii tam mpat makle, nlenii rangii doukalumei dakii rangii mah kasang hangtei adoidoi tiisii katam samlat kito tam leile.

¹⁴ Rangii haikasumei teinii Saraa rangiimah luha tei doumakle, kadapokii teitei mpou datonii kapang kamangle, sateichii mpounii teitei tipei wolakle. Kadaponii teiteinii rangiilamto kagongle.

¹⁵ Rangii kaswi kalei ah teinii mahlyii hang go samtak tiile, nlenii mpou gonii meikaniido samtak tiilakle.

¹⁶ “Kadaponii tanii Bangpii mah lungswi tei tiwosii Mpougo ralipyii tangpo?” Nlenii Krista mah lungswi tei nyiinii doutakle.