1 KORENMEI 15 - KARANU KABI SAMTAM

Kristanii katai kito ringkakhii

¹ Sateichii aitoinii kangsa- namei, Inii gonyii dakii tam rali pyii kalei kabi rasam, gonyiinii doukalu sateichii satsii kalei gonyii mah kamalum tei, Inii gonyii dakii tam maningloi leile.

² Teiteinii gonyii dakii Inii tam ralikapyii kabi rasam mah samtam teile. Inii gonyiigo tam ralikapyii kabi rasam teipiinii gonyiigo keipyii takle, tei kito gonyiinii tiigatpii satsii lei suleponii, gonyiinii matapii malum tutakle.

³ Kadapokii Iniido doukalu, hang doito rou katii tei gonyii dakii pyii leile, katunii kabi rasam taiswisii Kristanii nyii kem jangpii taipyii takle.

⁴ Katunii mpougo poigoi takle, sateichii kabi rasam taiswisii zangtumniitai mpougo tiimaringpyii takle;

⁵ Sateichii Kaifas dakii ninado tei taito keariisiinakhii dakii mpougo mangou pyiile.

⁶ Teitaito mpounii binii mei hai mangii sung kaki mpou- tai kaswimei dakii mangoupyiile, ahnyii mei kangkanii taigatu kado, ahnyii kak kito kamoilamnii aitoi katang ringleile.

⁷ Tei taito mpounii Jems dakii sateichii tei taito tiilamlwi kapyiimei hang dakii mangoupyii takle.

⁸ Akatkatsang kito tinglang supii lungkalu nah takum katu guda kado mpounii mangoupyiile.

⁹ Kadapokii Inii Tiilamlwi kapyiimei hangninii lesii latjyii kasu, tiilamlwi kapyiimei hang kak kito ka-nkhii khiisang hangniniile, dajangpiiponii Inii Saraamah Charsh go gisii baatakle.

¹⁰ Nlenii tingnei Inii tiisii kalei ai, Saraamah jumage kapyii kito Inii tiisii leile sateichii mpoumah jumage kapyii, gudakii pyii kabam tei kadak makle. Nlenii tiilamlwi kapyiimei kaki kata hangninii sungdo Inii kisii teibuisii tha tiitakle, teitii kido Inii makle, nlenii n-gu kaswi kalei Saraa- mah jumage kapyii teiniile.

¹¹ Teitii leponii Inii kado, ahnyiinii kado, aitiisii nyiihangnii tam ralipyiile, sateichii aitiisii gonyiinii malum takle.

Katai kito ringkakhii

¹² Aitoinii Kristago katai kito tiimaringpyii takle katu samtam tei tam ralipyii takleponii, katai kito ringkhii tang karam gasang galesii gonyii kak kito mei kangkanii kada takumpii tam wotangpo?

¹³ Nlenii kataimei ringkakhii gasang gale- ponii, Krista godo ringkhii matupyii sutakle;

¹⁴ Sateichii Kristago katai kito ringkhii matu sutakleponii, nyiinii tam ralipyii kalei tei kadak takle ninado gonyii mah kamalum tei kadak takle.

¹⁵ Teidoito kisii, Saraamah kaang kito kachui tei nyiihangnii mangoutu takle, kada- pokii mpounii Kristago katai kito ringkhii matulesii nyiinii sakchyii pyiibam takle. Nlenii kataimei ringkhii leimakle katu ai kasangle leponii, Saraanii Kristago ringkhii matusu takle.

¹⁶ Kadapokii katai- meigo ringkhii matu sutakle leponii, Krista godo tiimaringpyii sutakle.

¹⁷ Sateichii Kristanii katai kito ringkhii sutakle leponii, gonyiimah kamalum tei kadak takle, sateichii aitoi katangdo gonyiinii gonyiimah kem kito leile.

¹⁸ Teitii leponii Krista dato taikalei kamalum mei teido maga takle.

¹⁹ Krista dakii nyiinii maning kamalum tei tiilung aiki jangpii roinii bisanii kaki jangpii galeponii, sazyii pouryii hang lungto lungsyii takle sii tam tang karam tei nyiinii kisii doumajyiile.

²⁰ Nlenii aitoinii taiga kaleimei ahnyii kak kito riiti karei tiisii Kris- tago kataimei kak kito tiimaringpyii takle.

²¹ Kadapokii meihangninii pai- kito katai tei pat katu takumpiinii, katai kito ringkakhii teido mei hangninii paikitole.

²² Kadapokii meihangnii Adam dato taikalei takumpii, Krista dato tei takumpiinii meihang go tiimaringpyii tangle.

²³ Nlenii Saraanii mei nsang nsang go mpou mpoumah adoidoi tiisii, katunii, karei reisang kito, Kristago, tei taito mpounii kagong tinglangki, mpou mah tiisii kalei meihang go tiimaringpyii tangle.

²⁴ Sateichii Kristanii apum katiimei, teimaham kajum mei ninado teimaham hang gotei tiimaga aisii sagong sazyii tei Saraa, katunii, Apfii dakii pyii kaleitai; teitaito kalui tinglang tei gong tangle.

²⁵ Kadaponii ngou karoumei hang gotei Saraanii Krista mah pi pazhii kangkii kaipyii kasuta, Kristanii magongsii lungtang ka- ramle.

²⁶ Kana nasang kito tiimaga tang karam ngou karoumei teinii katai teile;

²⁷ Kadapokii kabi rasam kito tamle, “Saraanii mahlyii hangtei mpou pi pazhii kangkii kaitakle.” Nlenii aikito bam kalei “Mahlyii- hang” katu samkang aiki ai Krista kangkii mahlyiihang go kaipyiisii kalei, Saraa mpou sekteinii haimakle.

²⁸ Nlenii mahlyii hangtei Kristanii magongsii lungtang karam kangkii kai aitakle sekchii, tei taito mpou roinapii katunii, nah sapfii mpou teinii, mahlyii hang go mpou kangkii kaikapyii Saraa kang teikii nkangsii pyiitangle; sateichii mah- lyiihang phyiiryiito Saraanii pum tiisii lung tangle.

²⁹ Aitoinii kataimei jangpii dwi mpum kalu ahnyii tei kadapei tii- tangpo? Kadapeigo kaswi tanglesii ahnyiinii maning malum leipo? Mei kangkanii tam kalei, katunii, katai- mei ai ringkhii tang karam gale, katu ai kasangle leponii, kada tiisii ahnyii tei kataimei jangpii dwi mpum aitakpo?

³⁰ Sateichii nyii jangpii– kadajangpii nyiinii tinglang kaleita sadoi kashyii kiteito leitangpo?

³¹ Gu kangsanamei, Inii katai tei sating kata kadousii bamle! Nyiimah tiilung ai Krista Jisu nyii Bangpiigo njasii hangninii tiikalu kito, Inii gonyii dato aju kadi kabam teitei piinii n-gu ai ai tam mpat matule.

³² Meinah mah jairali taiswisii Inii Iphisas kito saram kounah go saryii tiile leponii, gumah liipat kadapei leipo? Kataimei ai ringkhii leimakle leponii, “Nje nyiinii chiile, sakle, kadaponii nyiinii supounei taitang karamle.”

³³ Gonyiigo choi malu sulo: “Kashyiimeigo kaswi katu teipiinii tingshang kabi tei tiimagale.”

³⁴ Gonyiimah swi kitei swiling gong wolo, sateichii gonyii mah kakui kama pwidi hangtei rat toi ailo. Kadapokii mei kangkanii Saraamah swirek kati tei gale. Ai ai Inii gonyiigo tii nroutang karam jangpii tam leile.

Ringkakhii pum

³⁵ Mei kangkanii n-nhii tangle, “Kataimei tei kada takumpii ringkhii wotangpo? Ahnyii tei kadapei pum pung tangpo?”

³⁶ He kamangmei, nangnii ralui kakai lwirou tei tai kasutanii pokpat makle;

³⁷ sateichii nangnii rali kakai teinii lwirou tei roiniile, gihuti mak-kii kaki kaki lwirou teile, nlenii ntai kananii pokpat tang karam tinghiinhii mah pum tei makle.

³⁸ Saraanii kamaning kamarei taiswisii lwirou gotei pum tei pyiile; Sateichii kathaam kathaam lwirou hang gotei mpou mah pum tei pyiile.

³⁹ Sateichii karing kounah hang- mah tchii tei njoi makle; meinah mah tchii hangninii, kounah mah tchii hangninii, ruinah mah tchii hang- ninii, sateichii kaa mah tchii hangninii leile.

⁴⁰ Sateichii sating gam mah pumpot ninado sazyii pouryii hang mah pumpot teido leile; sating gam pumpot hang mah ngoukabi tei sazyii pouryii pumpot hang mah ngoukabi dateito thamle.

⁴¹ Leimik teinii ahmah ngoukabi tei leile, sakhii mah ngoukabi teinii kaki, sateichii sageiti hang mah ngoukabi teinii kaki katham hangniniile; sateichii sageiti hang kak kitei todo ngoukabi tei kathaam kathaam leile.

⁴² Teipiinii kataimeinii ringkakhii kak ai takum tangle. Pum tei poigoi katu kak, teinii gatu kabui teile; ringkhii sekchii, tei teinii gatupei kalak tei tangle.

⁴³ Poigoi katu kak teinii, teitei ngoushyiile ninado suile, ringkhii sekchii teitei ngoubi tang ninado tei tangle.

⁴⁴ Poigoi katu kak teinii, teitei ngoushyiile ninado suile, ringkhii sekchii teitei ngoubi tang ninado tei tangle.

⁴⁵ Kadapokii kabi rasam kito tamle, “Meinah karei reisang, Adam, gotei meinah karing hangninii tiipyiile;” nlenii kana nasang, Adam teinii karing kapyii rangii teile.

⁴⁶ Nlenii rangii teinii gongrei makle, nlenii pumrongle, tei tainii rangiimah tei gongle.

⁴⁷ Karei Adam tei, buineipii katii, sazyii rangrhii kitole; hangna kashang Adam teinii sating gam tole,

⁴⁸ Sazyii pouryiimah tiisii kalei meihang teinii sazyii rangrhiipii tiikabam mei hangninii teitakumle; sating gam mah tiisii kaleimei hangteinii sating gamto kahum mei hangninii takumle.

⁴⁹ Sazyii rangrhiipii tiika- bam mei hangniniimah akhii njoitei nyiinii poi kalei takumpii sating gamto kahum mei hangniniimah akhii njoitei nyiinii poitangle.

⁵⁰ Inii gonyii dakii ai ai tam leile; kangsanamei: kangzai rou pungsii Saraamah sating sazyii kitei liitpeiwo lakle, sateichii gatu kabui teipiinii gatu kalaktei doupei wolakle.

⁵¹ Julo, Inii gonyii dakii kamakum sam tam leile, nyiihang zyiitu lakle,

⁵² Nlenii binasek-kii, mik hiit binakii, kalui buika kongsekchii, nyiihang go tiikalipyii tangle. Kadapokii buika tei kong tangle, sateichii nyiigo gatu kalak tiisii ring matu tangle.

⁵³ Kadaponii gatu kabui tei gatu kalak kikii tiikalikai tang karamle; sateichii taitang karam tei tailak tang karam kikii tiikalikai tang karamle.

⁵⁴ Sateichii gatu kabui ai gatu kalak kikii sateichii tai kabwi ai tai kalak kikii tiikalikai takle sekchii, tei tinglangki ryii kabam sam ai kasangpii gong tangle: “Katai gotei kangam teinii majungwo takle.”

⁵⁵ “O katai, gomah kangam kadaki leipo? O katai, gomah tiimathii kabui pumtei kadaki leipo?”

⁵⁶ Katai mah tiimathii kabui mah pumtei teinii kem dato doule satei- chii kem teinii mpoumah teimaham tei ajaitingshang dato doule.

⁵⁷ Nlenii nyii Bangpii Jisu Krista paikito ngam kalu tei nyii dakii kapyii Saraa gotei hakalang tam matulo!

⁵⁸ Teijangpiinii Gu kangsanamei, gonyii mah tha tiikalei tei Bangpii dato kadak makle katu tei tisii, gonyii sangtingsii, nlaisupiinii Bangpii mah tha katii kito tinglang kaleita tiilo.