1 KORENMEI 14 - KARANU KABI SAMTAM

Saraa sam tam ka mpat sateichii lat katham katham mah luha

¹ Teitii leponii, gonyiinii fiitang karam teinii lungkasyii teile, rangii mah luha hang kiteikii gonyii lung lungnhiilo, rou tiisii gonyiinii Saraa sam tei tam mapat kabui jangpii,

² kadaponii lat hangninii kito tamsii kalei ah teinii meinah dakii makle, nlenii Saraa dakiile; kada- pokii mei kata hangninii kaniido teitei shii makle. Nlenii ahnii rangii kito kamakum samtei tam mpat leile.

³ Nlenii Saraa sam tam ka-mpat ah teinii meinah dakii ahnyii jangpii tiikamakhii, lung tiikamadi sateichii lung tiisamou kapyii sam tam pyiile.

⁴ Lat hangninii kito tam kalei ah teinii ah roinapii ahgo tiihale, nlenii Saraa sam tam mpat kalei ahteinii Charsh hang go tiihale.

⁵ Gonyii kalei kaga hangnii lat katham katham katam tei Inanii mareile, nlenii gonyiinii Saraa sam tam ka-mpat tei Inii kisii mareile. Sateichii Charsh hangnii tiikama- khii tei doukabui jangpii lat katham katham hangtei kadat mpatpyii suleponii, lat katham katham tamsii kalei ah doito Saraa sam tam ka-m- pat ah teinii kisii dibwile.

⁶ Aitoinii kangsanamei, Inii lat katham katham tamsii gonyiida gong leponii, mati mangoukapyii, mak-kii swirek kati, mak-kii Saraa sam tam ka-mpat, mak-kii ralikapyii cheng- niikii ai Inii gonyiida poigong kasu- tanii kada takumpiinii Inii gonyiigo kabi tei pyiiwo tangpo?

⁷ Karing kaga koi kapat hang katangpiinado, samgo Levii mak-kii khangralhiimei ainii mpou mpoumah roktei thaam hihisii pyiisu leponii, Levii kongleimanii mak-kii khangra- lhiimei gat leipo katu tei kada takumpiinii titangpo?

⁸ Kadapokii buika teinii kasang kasu koitei pyii- leponii, tanii saryii jangpii tiikada tangpo?

⁹ Tei takumpiinii gonyiiniido malasii tikabui samtei go malyiinii tam mpat suleponii, kadapei tam leipo katu tei kada takumpiinii tiwo tangpo? Kadapokii gonyii samtei tingkai kito gatusii toutangle.

¹⁰ Sazyii pouryii aito lat kathaam kathaam hangkii leile, teitii kido hangninii kado akaang haikasu gale.

¹¹ Teipiinii latmah tam kalei kaang tei Inii tisu leponii, tamsii kalei ahda teito I-ai sapumnah hangninii takle, sateichii tamsii kalei ahtei gudato sapumnah hangninii takle.

¹² Gonyii- nii rangiimah luha hangtei doutang karam jangpii lungnhiisii kalei taiswisii, mahlyiihang phyiiryiito Charshgo tiikamakhii mah tei kisii gonyiinii fiilo.

¹³ Teijangpiinii lat hangninii tamsii kalei ahteinii lat tei kadat mpat kabuimah teimaham tei doutang karam jangpii riita tang karamle.

¹⁴ Kadapokii lat katham hangninii kito Inii riita leponii, gu rangiinii riita leile, nlenii gulungswi kitonii ti mati makle.

¹⁵ Teitii leponii Inii kadapei tiitangpo? Rangiigo kaswisii Inii riita tangle sateichii gulungswi go njasiido riita tangle; gu rangiigo njasii Inii lhii tiitangle sateichii gulungswigo kaswisiido Inii lhii tiitangle.

¹⁶ Kadapokii nangnii rangii kito hakalang tam leponii sateichii nangnii kadapei tam leipo katu tei ahnii tisu leponii, sabato kaleimei kata hangninanii gomah hakalang tam kalei gotei kada takumpii Amen tam wotangpo?

¹⁷ Gomah hakalang katam mah Saraago riita kalei tei bisii lei kado, mei kakimei jangpiinii tiikaha tei gatakle.

¹⁸ Gonyiihang doito Inii kisii lat katham katham jangpii Saraago Inii halangle.

¹⁹ Nlenii Charshgo tam ralipyii tang karam jangpii, lat hangniniipanii samkang tang kearii katam sungnii gulung swipiinii samkang mangii roinii katam Inii kisii mareile.

²⁰ Kangsanamei, swi kamaning kito nahmei takum supii, kashyii kito nahmei takumpii leilo. Nlenii swi kamaning kito katingmei takumlo.

²¹ Ajaitingshang kiteikii aitiisii ryiibam takle, “Lat katham katham tam kaleimei teipii sateichii lui kaki kakimei mah mahlyiihang teipii mei aimei dakii Inii karashii tangle; sateichii tei katangpiinado ahnyiinii gusam shiipyii lakle,” sii Bangpiinii tamle.

²² Tei takumpii lat katham katham tam kaleimei hangtei kama- lum mei jangpiinii tiikamangou siiti tei makle, nlenii malum kasumei jangpiinii tiikamangou siiti hang- niniile, sateichii Saraa sam saa ka-mpat tei malum kasumei jangpii supiinii kamalum mei jangpiiniile.

²³ Teijangpii Charsh hangnii gong ndwisii mei kalei kaga hangnii lat katham katham tiisii tamtu leponii, sateichii sabamei mak-kii malum kasumeinii tatliit leponii, gonyii n-goklei lesii ahnyiinii tam lakpo?

²⁴ Nlenii mei kakimei mak-kii malum kasumei kangkanii tat kaliit kak, meihangnii Saraa sam tam mpatsii lei leponii, ahnii shii kalei teipii ahnii ahmah kem tei tigong matu tangle, mpounii shiikalu hangteipii mpougo samtak tiitangle.

²⁵ Ahmah kamakum lungswi tei laat kabam kamadu kikii poi mpat tangle, sateichii “Gonyii kak Saraa lei kasangle,” katupii mpounii nkwimangsii Saraago mata tangle.

Saraa kamaning kilungto adoidoi tiikamajyii

²⁶ Teitiileponii kangsanamei, tei- tei kadapeipo? Saraago mata tang karam jangpii gonyiinii gong ndwi katu kak, meihangni hangninanii Saraa kamaning lhii kado, mati mangou kapyii kado sam katam kado, tam kalei gotei kadat mpat katu kado, mahlyiihang tei Charshgo tiiha matu tang karam jangpii tiimatulo.

²⁷ Mei kata kangkanii lat katham katham tiisii tam kalei kak, hangnanii mak-kii hangtum doito kisupiinii, adoidoi tiisii tam matulo; sateichii tam kalei lat katham gotei kadat mpatpyii tang karam mei hangninii leitang karamle.

²⁸ Nlenii lat kadat mpatpyii tang karam mei galeponii, lat katham katham tiisii tam kalei ah teinii malhiisupii bam matulo; sateichii ahnii ah roinapii ahgo ninado Saraago karashii matulo.

²⁹ Sateichii Saraa sam saa ka mpatmei hangnanii mak-kii hang- tumnii, tam mpat matulo, sateichii ahnyiinii tam kalei tei mei kaki- meinii samtak tiimatulo.

³⁰ Nlenii Charsh kilungto bamsii kaleimei kangkii hangninanii Saraa dato mati mangou kapyii tei douwoleponii, tamsii kalei ah teinii ntak tang karamle.

³¹ Kadapokii meihangnii rali kabui sateichii meihang go tiitang karam jangpii lung tiimadi kabui jangpii, gonyii hangnii mei nsang nsangpiinii Saraa sam tei saa mpat tobuile.

³² Saraa sam tam ka-mpat mah luha tei kamwikapii kang nkang tang karamle,

³³ kada- pokii Saraanii karampou mah Saraa makle, nlenii kamajungle. Kamalum meimah charsh hang kito tiikalei takumpii,

³⁴ sapwimei hangnii charsh kito malhiisupii leimatulo. Kadapokii ahnyiinii sam tam katu mazhii- makle; nlenii ajaitingshang kito katam takumpii, ahnyiinii nkangsii bam tang karamle.

³⁵ Sateichii ahnyiinii mah kata hangninii tinyii leponii mpou mpou kito ahnyii naamei dato n-nhii matulo; kadapo- dinchii charsh kilungto sapwimeinii sam katam tei meidoito ka-nroule.

³⁶ Kadapeipo! gonyii dato Saraa sam tei patpo, mak-kii tei tei gonyiida roinii gong takpo?

³⁷ Mei kata hangninanii mpou roinapiinii mpou ai Saraa sam saa ka-mpatmei hangninii lesii mak-kii rangiimah luha doukalumei hangniniilesii maning leponii, Inii gonyii dakii ryiikapyii hang ai Bangpii mah kakhatsamle katu tei ahnii timatulo.

³⁸ Mei kata hangninanii ai tisu leponii, ahgo jutipyii lakle.

³⁹ Teijangpiinii kangsanamei, Saraa sam tam mpat tang karam jangpii lungnhiisii mareilo, sateichii lat katham katham tiisii tam tang karam nam sulo;

⁴⁰ Nlenii mahlyii hangtei matei sageisii sateichii adoidoi tiisii tiitang karamle.