1 KORENMEI 12 - KARANU KABI SAMTAM

Rangii kamatei mah luha

¹ Kangsanamei, aitoinii gonyii- nii ryii kabam rangii mah luha kaang kito, gonyiinii tikasu tei Inii marei makle.

² Gonyiinii malum kasu tinglang kak teinii, gonyii aigo lat kaga tingtuda mpaasii chyiitat tutakle katu tei gonyiinii tile.

³ Teijangpii Saraamah rangii teipii- nii tamsii kalei meihangninii kaniido “Jisugo sheeng takle!” Katu ai tam- sang tam leimakle. Sateichii rangii kamatei teipiinii katam teisupiinii mei kaniido “Jisu ai Bangpiile” katu ai tamsang tampei wolakle.

⁴ Rangii mah luha katham katham leile, nlenii rangii tei hangniniile;

⁵ sateichii nga kanga mah pwidi ka- tham katham leile; nlenii Bangpiinii hangniniile.

⁶ Tha tiikabui mah pumtei katha katham leile, nlenii Saraa hangninanii meihang go mpou mpou mah tha tiikabui pumtei tei pyiile.

⁷ Meihang mah bitang karam jangpii rangiimah ai mei nsang nsang dato mangoupyii bam takle.

⁸ Kadaponii mei hangninii dakii rangii paikito swirek kabi samtam, sateichii mei kaki hangninii dakii njoi katu rangii teinii swirek kati mah samtam tei pyiibam takle;

⁹ kaki hangninii dakii njoi katu rangii teinii kamalum, sateichii kaki hangninii dakii rangii teinii katchii kanhii tii ka-mbi mah luha tei pyiibam takle.

¹⁰ Sateichii kaki hangninii dakii kamadat tha tiikabui mah luha, kaki hangninii dakii Saraa sam tam ka-mpat, kaki hangninii dakii rangii hang go juti tang karam, kaki hangninii dakii katham katham lat katii, kaki hangninii dakii lat katham katham gotei tam kalatpyii tang karam mah pyiibam takle,

¹¹ nlenii mpounii kamaning kamarei taiswisii luha hang ai meihang dakii mpou mpoumah jaipyiisii, hangni- niisang hangninii tiisii kalei sateichii njoi katu rangii teinii aihang ai tiimatu pyiile.

Pum hangninii njai hangkii

¹² Kadapokii pumnii pum mah njai hangkii kabam takumpii, satei- chii pum mah njai tei hangkii leikado apum hangninii katu takumpii, Kristado tei takumle.

¹³ Kadaponii Jehudimei kado, Grikmei kado, Kabangmei kado, laat kabam mei kado, nyiihang go rangii hangninanii apum hangninii kikii dwi mpum pyiibam takle, sateichii rangii hangninii kito sak matu tang karam jangpii meihang go tiibam takle.

¹⁴ Kadapokii pum ai pum njai hangninii roinii makle, nlenii hang- kiile.

¹⁵ Pi teinii, Inii bah kasu jang- piinii Inii pum mah makle leponii, teijangpiinii teitei pum mah makle katu tamsu kilakle.

¹⁶ Sateichii koi teinii Inii mik kasu jangpiinii Inii pum mah makle leponii, teijangpiinii teitei pum mah makle katu tamsu kilakle.

¹⁷ Pum kalei kaga tei mik leponii, shiitang karam kadaki leitangpo? Sateichii pum hang ai koi leponii, kada takumpiinii manam tangpo? Saraanii kamarei taiswisii njai katham katham tei pum mah njai nsang nsang tiisii kaipyiibam takle.

¹⁸ Nlenii aitoinii Saraanii mpoumah kamaning kamarei tai- swisii nsang nsang tei pum kikii njai nsang tiisii kaipyiibam takle.

¹⁹ Pum kalei kaga tei pum mah njai hangninii roinii leponii, pum tei kadaki leitangpo?

²⁰ Aitiisii kalei jangpiinii, pum mah njai tei hangkii leile, nlenii pumnii hangniniile.

²¹ Sateichii miknii bahgo, “Nang- nii gujangpii bitang karam galesii tampeiwo lakle,” sateichii nlailoisii phyiibungnii pigo, “Nangnii gujang- pii bitang karam galesii” tampei wolakle.

²² Teimakle suibuisii kangou pum mah njai hang tei gapeiwo lakle,

²³ sateichii nyiinii maiteeng lakbui tangle sii kamaning pum mah njai- hang teinii kisii maikateeng pyiile sateichii nyiimah ngoubi kasu pum njaihang mah tei kisii kabi tei leile.

²⁴ Nlenii nyiimah ngoukabi pum njaihangmah bitang karam tei gale. Nlenii dzyiirougat kasu pum mah njai dateikii Saraanii kisii dzyiirou matutang karam jangpii pyiisii pumgo poi matou pyiile,

²⁵ Kadapokii pum kito njairiit-riit katu gasii pum mah njaihang tei hangninanii hang- ninii jangpii njoisii tiigatpii machyii matu tang karam jangpii.

²⁶ Sateichii pum mah njai hangninanii kalak kanhii pung leponii, pum njai kaki kaki hangdo kalak kanhii tei pung njoile, sateichii pum mah njai hangniniigo sadzyii ngariit tiileponii, kalei kaganii nta njoile.

²⁷ Aitoinii gonyiinii Kristamah pum teile sateichii gonyiihang teimah njai nsang nsang tei takle.

²⁸ Sateichii Saraanii charsh kak kito mei kang- kiigo, karei reisang kito, tiilamlwi kapyiimei, hangna kashang kito lungkakalingmei, hangtum kashang kito madhiikapyiimei tei kalaipyii takle; sateichii teidoi tei kamadat tha katiimei, ara kanimeigo tii ka-mbimei, tiikahamei, doimajang kapyiimei, lat kataam kataam katam mei pyiibam takle.

²⁹ Kalei kaganii tiilamlwi kapyiimeipo? Kalei kaganii Lungka- kalingmeipo? Kalei kaganii madhii kapyiimeipo? Kalei kaganii mei tiikalak tha katiimeipo?

³⁰ Katchii kanhiimeigo tii ka-mbi mah luha tei kalei kaganii doupo? Kalei kaganii lat katham katham tam leipo? Kalei kaganii lat katham kathampii tam kalei gotei tam kalatpyii leipo?

³¹ Nlenii lungnhiisii sagoi kaki luha gotei mangwilo sateichii kisii bikaki pwidi tei Inii gonyiigo mangoupyii tangle.