1 KORENMEI 11 - KARANU KABI SAMTAM

Kamataki phyii kadwum

¹ Inii Krista jai karali takumpii, gonyiiniido gujai karalimei tiilo.

² Gonyiinii mahlyii hang kito n-gu maning kasei jangpii sateichii gonyii dakii Inii pyii kabam hangtei go- nyiinii tiigatpii ryiileile katu jangpii Inii gonyiigo tam matoile.

³ Nlenii sapfiimei hang mah phyii kasat teinii Kristale, sapwimei hangninii mah phyii kasat teinii mpoupei mah naa teile; sateichii Krista mah phyii kasat teinii Saraale katu gonyiinii tikatu Inii mareile.

⁴ Teipiinii phyii dwumsii kariita mak-kii Saraa sam tam ka-mpat sapfiimei hangnii mpou phyiigo dzyiirou makle;

⁵ Nlenii phyii dwum supii kariita mak-kii Saraa sam tam ka-mpat sapwimei hang- teinii mpoupei phyiigo dzyiirou makle; kadapokii ai kakum sapwimei teinii phyiitaitoi kalei sapwimei hangninii takumle.

⁶ Kadaponii sapwimeinii phyii dwum suleponii mpoupei phyiitaam teido kabiit toi maleilo; nlenii phyiitaam kabiit katoi mak-kii phyiitaam taikatoi ai sapwi- mei hangninii jangpii kasangam teile leponii, mpoupei phyii tei dwum matulo.

⁷ Kadaponii sapfiimei hang- ninii teinii Saraa mah akhii sateichii pumtei kava katu taiswisii mpou phyii dwumlak tang karamle; nlenii sapwimeinii sapfiimei mah pumtei kava teile.

⁸ Kadapokii sapwimei dato sapfiimei pat makle, nlenii sapfiimei dato sapwimei patle.

⁹ Ka- dapokii sapwimei jangpii sapfiimeigo tiibam makle, nlenii sapfiimei jangpii sapwimeigo tiibamle.

¹⁰ Teijangpiinii sating gamlui hang jangpii, sapwi- meinii mpoupei phyii gamkii mei kang ka-nkang mah phyiidum hangninii leitang karamle.

¹¹ Nlenii Bangpii dato nyii tiilung kito, sapfiimei haisupiinii sapwimei mi- makle sateichii sapwimei haisupiinii sapfiimei mimakle.

¹² Kadapokii sapwimeinii sapfiimei dato kapat takumpiinii, sapfiimei niido tei takumpii aitoinii sapfiimei aigo sapwimei dato lung takle, sateichii mahlyii hangtei Saraa dato patle.

¹³ Gonyii roipii maninglo; sapwi- meinii phyiidum supiinii Saraago kariita tei ngoubipo?

¹⁴ Sapfiimei hangninii jangpii phyiitaam thaang- sii kapung tei mpou jangpii ka-nroule katu tei Saraa mah baichem teiniido gonyiigo ralipyii leimakpo?

¹⁵ Nlenii sapwimeinii phyiitaam thang leponii, teitei mpoupei jangpiinii ngou kabi teile; kadapokii mpoupei phyiitaam tei dwum matu tang karam jangpii mpoupei dakii pyiibam takle.

¹⁶ Nlenii mei kata hangninanii ai kaang kito kajyii nyiileponii, Inii tamtang karamnii nyiinii sateichii lat mpat kalumei hangnii Saraago kamata ki tiikalei ajai kaki gale.

Bangpii mah takbai

¹⁷ Nlenii Inii gonyii dakii tam kalei hang kito Inii gonyiigo tam matoi makle, dajangpiiniiponii go- nyiinii gong ndwi katu kak tei biki tang karam jangpii gonyiinii gong ndwi makle, nlenii shyiiki tang karam jangpiinii gonyiinii gong ndwile.

¹⁸ Kadapokii karei reisang kito, gonyiinii Charsh hangninii tiisii gong ndwi katu kaktei, gonyii kak kito kapak kapang katu tei lei lesii Inii shiile; sateichii teitei Inii malum haile.

¹⁹ Kadapokii kasang kito kalei mei gotei juti tang karam jangpii gonyii kak kito pakchet chet katu aido leitang karam sekle.

²⁰ Gonyiinii gong ndwi katu kak, gonyiinii kachii tei Bangpii mah takbai makle.

²¹ Kadaponii gonyiinii kachii kak meihangnii mei kakimei doito mpou roinapii mpou mpoumah malot chiitu takle, sateichii mei hangninanii moi majyiile, sateichii mei kaki hangni- nanii jousak panhiile.

²² Kadapeipo! Chii tang sak tang karam jangpii gonyiinii mpou mpouki gade? Mak- kii Saraamah charshgo gonyiinii dzyiirou supii mah kagameigo tii- nrou leipo? Inii gonyii dakii kadapei lesii tam tangpo? Aiki aito Inii gonyiigo tam matoi tangpo? Makle, Inii gonyiigo tam matoilak le.

²³ Kadapokii Inii gonyii dakii kapyii tei Inii Bangpii dato doule. Kadapokii Bangpii Jisunii, mpougo schoi choikai kalei tinghum tei,

²⁴ tiirok phangkii poisii Saraago hakalang tam kaleitai, mpounii tiirok tei tiiraksii tamle, “Ai ai gonyii jangpii pyiikalei gupumle, n-gu maningsii lei tang karam jangpii ai ai chiilo.”

²⁵ Tei takumpiinii, mah chiisang kaleitai mpounii peek tei poisii tamle, “Ai peek ai gu zai piinii tiikabam Saraamah sat tang karam karanu samtamle. Gonyiinii ai ka- sakta n-gu maningsii leitang karam jangpii ai ai tiilo.”

²⁶ Kadapokii gonyiinii tiirok ai kachiita, sateichii peek ai kasakta, Bangpii gong kasuta tei gonyiinii mpoumah katai tei tam mati leile.

²⁷ Teijangpiinii lukai majyii kasu jai teipii Bangpii mah tiirok kachii mak-kii peek kito kasakmei hangtei Bangpiimah pum sateichii Bangpii zai kito tiima aitakle.

²⁸ Teitii leponii meihangnii mpou mpou roinapiinii jureisii tiirok tei chii matulo ninado peek tei sak matulo.

²⁹ Kadaponii mpounii chii kalei tiirok sateichii peek kito sak kalei kaktei Bangpii mah pum mah kaang tei mpounii jutisu leponii, mpounii kachii tiirok ninado kasak peek teipii mpounii mpou roinapii mpou phyiiryiikii samtak katii tei pung gong takle.

³⁰ Teijangpii gonyii mei kamoikanii sui leile, raniziile sateichii kamoi- kanii taitu takle.

³¹ Nlenii nyiinii nyii roinapii mpou mpougo kasangpii samtak tiileponii, nyiigo samtak tiilak tang karamle.

³² Nlenii Bang- piinii nyiigo samtak tiile sateichii dwisii ratle, daponii nyii aigo sazyii pouryiigo kaswisii kama luikailak tang karam jangpii.

³³ Teijangpii gukangsanamei, go- nyiinii Bangpii mah takbai tei chiitang karam jangpii gong ndwi katu kak, hangninanii hangniniigo kakoilo.

³⁴ Sateichii kata hangninanii moi mazyiileponii, gonyiinii gong ndwi katu tei Saraanii samtak katii kangtei liit kasu tiisii, mpounii mpou kito chiitang karamle. Sateichii sam kaki kaki jangpiinii Inii Kagong kak Inii karashii matei tangle.