1 KORENMEI 10 - KARANU KABI SAMTAM

Tam kakhatsam

¹ Kangsanamei, nyiipei nyii- paomei hang teinii mongjyii kangto tatsanii kaghang dwijai sumto ahnyii hangnii kaapat tole, katu tei gonyiihang go Inii timatu nyiile,

² sateichii meihangnii mongjyii lungto ninado dwijai lungto Moses tai kaswimei hangninii tiisii dwi mpum wole;

³ sateichii ahnyii hangnii njoi katu rangii mah tiirok tei kaswisii chii njoi takle,

⁴ sateichii ahnyii hangnii njoi katu rangii dwi tei kaswisii sak njoi takle; kadapokii ahnyii tai swisii kalei rangii mah kuitu gam teito ahnyiinii kaswisii sak njoile, sateichii kuitu kadi teinii Krista ah teile.

⁵ Teitii kido, ahnyii mei kamoilam gotei Saraanii dzyiibi makle; teijangpiinii ahnyii mah katai pum hangtei sazyii kamarong kikii rat toi aitakle.

⁶ Aitoinii ahnyiinii kashyiigo kamarei takumpii nyiinanii mareilak tang karam jangpii aihang ai nyii- jangpii tiikamangou nda tei takle.

⁷ Sateichii ahnyii mei kangkanii tingtugo mata katu takumpii gonyii tiisulo; “Meinii chiitang sak tang karam jangpii ntombam takle sateichii rale tiitang karam jangpii tusat takle,” sii ryii kabam takumle.

⁸ Sateichii ahnyii kangkanii sapwi- mei sapfiimei kashyii kahong tha katii jangpii mei thang makaisii tumkhii leimik hangninii kikii tai kalei takumpii, nyiinii sapwimei sapfiimei kashyii kahong tha tei tiisude.

⁹ Sateichii mei kangkanii Bangpiigo jai kaju jangpii ahnyiigo sanhiinii tiimaga kalei takumpii, nyiinii Bangpiigo ajai jusude;

¹⁰ Sa- teichii kangkanii manam marang katu sateichii ahnyiigo katai mah rangii teinii tiimaga kalei takumpii, nyiinii manam marangh lak tang karamle.

¹¹ Ai hang ai ahnyii dato mei kakimei jangpiinii tiikamangou hang- ninii takumpii pat takle, sateichii teihangtei nyii jangpii tiisulosii kakhat kapyii hangninii takumpii ryiibam takle. Kadapokii kalui tei gongtu tang karam tinglang kiteito nyiinii lungsii bamle.

¹² Teijangpii satziilesii maning kalei ah teinii koukasu tiisii tiigat malulo,

¹³ meinahnii lehwo kabui doito kisii kahemnii jum makle, nlenii Saraanii malum kabwi teile, gonyiinii ngam wokabui doito kisii gonyiigo mpounii hem matulakle; nlenii gonyiinii lehwo kabui jangpii kahem gotei kaswisii nlek tang karam pwidido mpounii pyiitangle.

¹⁴ Teijangpii gumah lungkasyiimei, tingtu hang go kamata kiteito pat tolo.

¹⁵ Inii kasakaimei dakii tam kalei takumpiinii tam leile; Inii katam tei gonyii roipiinii maninglo.

¹⁶ Bangpiimah takbaiki nyiinii poi- kalei peek sateichii teijangpii nyiinii Saraago hakalang tam kalei kiteito: nyiinii sak katu kak, nyiinii Kristamah zai tei njai leile sateichii nyiinii tiirak kalei tiirok kiteito; nyiinii chii katu kak, nyiinii Krista mah pum tei njai leile.

¹⁷ Kadapokii nyii moikado, tiirok hangninii, pum hangniniile, kadapokii nyii hangnii tiirok hangniniimah njai tei dou njoile.

¹⁸ Isrelmeinah gotei pum zai taiswisii julo; kakarat pot kachiimei teinii rakuibam gotei kaswisii njai dou njoi makpo?

¹⁹ Teitii leponii Inii kadapei tam leipo? Tingtu dakii pyiitoi kalei chiitak tei mah hang- niniile, mak-kii tingtu tei mah hangniniilesii Inii tampo?

²⁰ Makle! Inii tam kalei teinii meidameinii meidamei mah rakuibam gamkii pyiikatoi teinii Saraago makle, nlenii sara kashyii gole. Sateichii gonyiinii sara kashyiigo kaswisii njai dou njoimatu katu Inii marei makle.

²¹ Gonyiinii Bangpiimah peek kiteito sateichii sara kashyiimah peek ki teito sakpeiwo lakle. Gonyiinii Bangpii mah tak kachiibam kito sateichii sara kashyii mah tak kachiibam kiteito njai dou njoipei wolakle.

²² Mak-kii nyiinii Bangpiigo rarhii matu tang karam jangpii maimhii depo? Mpou sung nyii tei buipo?

²³ “Mahlyiihang ai tiimatu tang karam jangpii nyiigo mazhiipyii takle,” nlenii mahlyii hangtei nyii jangpii bimakle. “Mahlyiihang ai tiimatu tang karam jangpii nyiigo mazhiipyii takle,” nlenii mahlyii hangtei nyii jangpiinii tiikaha tei doumakle.

²⁴ Mei kaniido mpou jangpii kabi tei fiimatu sulo.

²⁵ Salikijangto joi kalei hangtei kabi kashyii tikabui lungswi jang- piinii kachyiinhii supiinii chiilo;

²⁶ Kadapokii “Sazyii pouryii sateichii teilungto kalei hang tei Bangpii mahle.”

²⁷ Malum kasumei hangninanii gonyiigo takbai kikii lat leponii ninado gonyiinii gongnyii leponii, kabi kashyii tikabui mah lungswi jangpii sam kachyiinhii supii gonyii doikii dungkapyii hangtei chiilo.

²⁸ Nlenii mei kata hangninanii gonyii dakii, “Ai tingtu dakii pyiitoi kalei chiitak lesii tamleponii,” tei tam kamangou ah jangpii maningsei tang karamle teipiinii ah jangpii sateichii kabi kashyii tikabui lungswi jangpii teitei chiisulo;

²⁹ kabi kashyii tikabui lungswi katunii, gomah makle, nlenii mei kakimei mah kabi kashyii tikabui lungswi gole; kadapokii mei kakimei hangninii mah kabi kashyii tikabui lungswi teinii gumah araang- ra katii gotei kadapei jangpiinii samtak tiitangpo?

³⁰ Inii hakalang katam njasii njai poi njoi leponii, Inii hakalang katam tei kaang jangpiinii dajangpii n-gu tam mashyii leipo?

³¹ Teijangpii gonyiinii chii kado mak-kii sak kado, mak-kii gonyiinii katalyii tiikido, Saraa mah pumtei kava jangpii tiilo.

³² Jehudimeigo, Grikmeigo, sateichii Saraa mah lat mpat kalumeigo mazhii kasu kamage tei pyiisulo;

³³ Inii katii takumpii tiilo; Inii gumah kabi jangpiinii maning supii, nlenii meihang mah kabi jangpiinii maningsii, katii kapung hang kito Inii dzyii karanga tiitang karam jangpii tiile. Kadapokii ahnyiinii keikapyii tei douwo tang karam jangpii.