1 JON 2 - KARANU KABI SAMTAM

Nyiigo tiiha kapyii Krista

¹ Gunahmei, gonyiinii kem tiikasu tiisii Inii ai ai gonyii dakii ryii leile; nlenii mei kata hangninanii kem tiileponii, Pfii doito nyii jangpii satsii sam tampyii tang karam, kasang kamajyii Jisu Krista leile.

² Sateichii mpou ai nyii kem jangpii pow ruipyii tang karam teile, nyii kem jangpii roinii makle, nlenii sazyii pouryii kem hang jangpiidole.

³ Nyiinii Saraamah kakhatsam hang tei swileponii, nyiinii mpougo tile katu tei aipii nyiinii tile.

⁴ Inii mpougo tilesii tamsii kalei, nlenii mpoumah kakhatsam hang gotei swikasu ah teinii kachuile, sateichii mpou dato kasang tei gale.

⁵ Nlenii mpou samtamgo kaswimei kata kangka dateito kasangpii Saraago lungkasyii tei bimatui takle. Mpou dato nyii ai leile katu aipii nyiinii tile:

⁶ Saraa dato leilesii tamsii kalei ah teinii Jisu Kristanii tat kalei takum- piinii mpouniido tat tang karamle.

Karanu kakhatsam

⁷ Lungkasyiimei, Inii gonyii dakii kasatai kakhatsam ryiilei makle, nlenii saroisekto gonyiinii doukalu kaham kakhatsam teile, Kaham kakhatsam teinii gonyiinii shiikalu teile.

⁸ Nlenii Inii aitoi gonyii dakii ryiikalei kakhatsam ainii kasataile, dajangpiipo dinchii aimah kasang ai mpou dato gonyii datodo ngoule. Kadapokii kamyii teinii tat maju leitakle sateichii kasang kava tei vasii leitakle.

⁹ Kava kito leilesii katam ninado mpou sanapiigo ngourousii kalei ahteinii aitoido kamyii kito leijoule.

¹⁰ Mpou sanapiigo lungkasyii ahteinii kava kito taksupiinii leile sateichii ahdato pi pasui tang karam gale.

¹¹ Nlenii sanapiigo ngourousii kalei ahteinii kamyii kito leile sateichii ahnii kamyii kito tatsii, ah kadaki tat leipo katu timakle, dapochiinii kamyii teinii ahmah mik tei tiimachet aitakle.

¹² Gunahmei, Inii gonyii dakii ryii leile, dapodinchii gonyiimah kem hangtei mpou-ju jusii magapyii takle.

¹³ Apfiimei, Inii gonyii dakii ryiileile, dapodinchii saroisekto kalei mpougo gonyiinii tile, karanumei, Inii gonyii dakii ryii leile, dapodinchii gonyiinii kashyii gotei ngam wotakle. Nahmei, Inii gonyii dakii ryii leile, dapodinchii gonyiinii Pfiigo tile.

¹⁴ Apfiimei, Inii gonyii dakii ryiile, dapodinchii saroisekto kalei mpougo gonyiinii tile. Karanumei, Inii gonyii dakii ryiile, dapodinchii gonyiinii tei mahamle, sateichii Saraamah samtam tei gonyii dato taksupii leile, sateichii kashyii gotei gonyiinii ngam wotakle.

¹⁵ Sazyii pouryiigo sateichii sazyii pouryii lungto kalei mah hang gotei marei sulo. Mei kata kangkanii sazyii pouryiigo lungsyii leponii, Pfiimah lungkasyii tei ah dato gale.

¹⁶ Dapokii sazyii pouryiito kalei hang, pumzai mah kamarei ka-ntha, sateichii miknii kamarei ka-ntha sa- teichii tiilung mah tang ghang ainii pfii dato makle, nlenii sazyii pou- ryiitole.

¹⁷ Sazyii pouryiido sateichii sazyii pouryiimah kamarei ka-ntha hang teido gatule. Nlenii Saraamah kamaning kamazhii katiimei teinii kalui gasii taksupii ringleile.

Kristago ngoukaroumei

¹⁸ Gunahmei, kalui tinglang tei natakle! Kristago ngoukaroumei gong tangle katu gonyiinii shiikalu takumpii, aitoinii Kristago ngouka- roumei hangkii gongtakle. Teijang- piinii kalui tinglang natakle katu nyiinii tile.

¹⁹ Ahnyiinii nyii dato tatpat takle, nlenii ahnyiinii nyiimah makle, dapokii ahnyii ai nyiimah leponii, ahnyiinii nyiigo kaswisii lungjousii leitangle, nlenii ahnyii hang ai nyiimah makle katu mangou tang karam jangpii tatpat takle.

²⁰ Nlenii gonyiigonii Kristanii thao manuk pyiibam takle, sateichii gonyii hangnii teitei tile.

²¹ Gonyiinii kasang tei tikasu jangpii Inii ryiimakle, nlenii gonyiinii teitei kati jangpii sateichii kachui katu ai hangninii kado kasang kito gong makle katu kati jangpii ryiile.

²² Jisugo Kristale katu mazhii kasu ah tei supiinii kachui tei tapo? Pfii godo, nah sapfii mpougodo, mazhii kasu Kristago ngoukarou tei aile.

²³ Nah sapfii mpougo mazhii ka- sumei hangteinii pfiigodo doumakle, nah sapfii mpougo kamazhii ah teinii pfiigodo doule.

²⁴ Gonyiinii saroisekto shiikalu tei gonyii dato taksupiinii leimatulo. Gonyiinii saroisekto shiikalu tei gonyii dato taksupii leileponii, gonyiiniido nah sapfii mpou dato sateichii Pfii dato taksupii leitangle.

²⁵ Sateichii mpounii nyii dakii pyii tanglesii riishii tiikabam tei aile, katunii, kalui kaga karing teile.

²⁶ Gonyiigo chuisii hemtang karam jangpii tiisii kaleimei mah kaang kito Inii gonyii dakii samhang ai ryiile.

²⁷ Sateichii mpou dato gonyiinii doukalu thao manuk kapyii teinii gonyii dato leile, sateichii mei kata hangninanii gonyiigo ralipyii tang karam kabi mah kado gale; nlenii mahlyiihang mah kaang kito mpoumah thao manuk kapyii teinii gonyiigo ralikapyii kasang, kachui kaga takumpii, sateichii teiteinii gonyiigo ralikapyii takumpii mpou dato gonyiinii taksupii leilo.

²⁸ Gunahmei, aitoinii mpounii kagong tinglang kak nyiinii lung kalum tei doukabui tiisii, sateichii mpounii kagong piinei leimik mpou dato nrousii mbeilak tang karam jangpii gonyiinii mpou dato taksu- piinii leilo.

²⁹ Mpou ai kasang kamajyii teile katu gonyiinii tileponii, kasang tiisii kaleimei hang godo mpounii manaapyii takle katu gonyiinii tile.