1 JON 1 - KARANU KABI SAMTAM

Karing mah samkang

¹ Nukarei kito kabam, nyiinii shiikalu, nyii mikpiinii ngou kalu, nyiinii ngou wosii nyii bahpiinii dengkalu karingmah samkangmah kaang kito–

² Sateichii karing tei mangou takle, sateichii nyiinii teitei ngoutakle teijangpii nyiinii teimah kaang kito sakchyii tiisii sateichii Pfiigo kaswisii kalei ninado nyii dakii mati kapyii kalui kaga karingmah kaang kito nyiinii gonyii dakii saa mpat leile.

³ Nyiinii ngoukalu ninado shii kalu tei gonyiiniido nyiigo kaswisii njai dou njoi matutang karam jangpii, nyiinii gonyii dakiido saa mpat leile; sateichii nyiinii njai dou njoi tang karam ainii Pfii sateichii mpounah sapfii mpou Jisu Kristago kaswisii nja katu kitole.

⁴ Nyiimah ka-nta ai matwi mashang matu tang karam jangpii nyiinii ai ai ryii leile.

Saraanii kavale

⁵ Mpou dato nyiinii shii kalu ninado gonyii dakii saa mpat kalei samtam teinii aile, katunii, Saraanii kavale sateichii mpouda kamyii tei gasang gale.

⁶ Nyiinii mpougo nja katumah njai tei dou njoisii leilesii tam takpokii, kamyii kito tatsii leileponii, nyiinii kachui takle ninado kasang tai swisii lung sutakle.

⁷ Nlenii mpounii kava kito kalei takumpii nyiinii kava kito tat leileponii nyiinii hangninanii hang- niniigo nja katumah njai dou njoi katu tei leile, sateichii mpounah sapfii mpou Jisumah zai teipiinii kem hang kito nyiigo tiimatei pyiile.

⁸ Nyiinii kem galesii nyiinii tam leponii, nyiinii nyii roinapii chuisii hem wotakle, sateichii kasang tei nyiida gatakle.

⁹ Nyiinii nyiimah kem tei tam mpat leponii, nyiimah kem hang kaleipyii tang karam ninado nyiimah tiikama hang kito nyiigo tiimateipyii tang karam jangpii, mpounii malum kabui ninado kasangle.

¹⁰ Nyiinii kem tiimaklesii nyiinii tam leponii, nyiinii Saraago chui matu aitakle sateichii mpou samtei nyiida gale.