Utom 1 - Ñwed Abasi Ke Ikọ Ibibio Ayo Mfịn

Eben Yisọs edọọk abio ubọọñ Abasi

¹ Ke akpa ñwed mmi, Tiofidọs, ami mmaawet mbaña afịd se Yisọs aketọọñọ anam anyʌñ akpeeb

² tutu usen ekebenne anye edọọk ke anyọñ ke anye amaakedọkkọ mme abọsịd a-anye akemekke ato ke Adisana Sịbidịd se ammọ ediinam.

³ Ke ini anye amaakebọ ukuud ama, anye amaawọt ammọ idem ye mme uwak utom idiọọñọ e-mmiidooho se efafaaña, ke emọ mmọọiba ke uwem. Anye amaawọt ammọ idem ke idaha ñkpọ nte usen aba anyʌñatañ ikọ abaña abio ubọọñ Abasi.

⁴ Ini keed, ke ini anye akesʌkkọ adia ndidia ye ammọ, anye amaanọ uyo abo, “Ikiikpọñ Yerusedem, ado itie ibet enọ e-Ete mmi akenwọñọke inọ ndufo, a-ndufo ekekoppo ento miin.

⁵ Sia Yọọn akedat mmọọñ anịm uduọkmmọọñ, ado eyainịm ndufo uduọkmmọọñ ke Adisana Sịbidịd ke mme usen ifañ a-abooho idi.”

⁶ Ndin, ke ini ammọ ekebaññake itie keed, ammọ emaebịp anye ete, “Abọọñ, afo ayaatịmme ayaak ukara abio ubọọñ anọ Isred idahami ndin?”

⁷ Anye amaabọọrọ ammọ ate, “Inaaha ndufo ediọọñọ mme ini me usen e-Ete akenịmme ke adudu amọ.

⁸ Ado ndufo eyaebọ adudu ke ini Adisana Sịbidịd amaadidoro ndufo ke idem; ndufo eyaenyʌñ edo mme ntiense mmi ke Yerusedem, ke afịd Yudia ye Sameria, tutu asịm ke akpatre ederimbod.”

⁹ Ke anye amaaketañ ikọ ami ama, emaeben anye edọọk anyọñ ke iso ammọ tutu ntọñanyọñ afʌk anye, ammọ ikịtte anye aba.

¹⁰ Ke ammọ esʌkkọ ewuuk anyen ese anyọñ naña anye adọọk, ete ise awo iba e-ekesịneke mfia afọñ edida ke ñkañ ammọ.

¹¹ Ammọ emaebịp mme mbed mbịme ete, “Ndufo mbon Kadidi, nsinam ndufo edudak mi ewuuk anyen ese ikpaanyọñ? Yisọs e-ebenne ikpọñ ndufo mi edọọk ke anyọñ, ayaatịmme adi ke ukem-ukem usʌñ a-ndufo ekịtte naña anye asaña adʌk abio ubọọñ Abasi.”

Emek Matayas adat itie Yudas

¹² Akekem, mme abọsịd emaetịmme ekpọñ Abod Ọdif enyọñ edi Yerusedem, a-akedooho isañ usen Sabad keed.

¹³ Ammọ ekediwuọ, ammọ emaedọọk ufọk anyọñ eka ubeed ammọ ekebaagha. Mbon e-ekebaaha do ekedoñño: Bita, Yọọn, Yemsi ye Andru; Fidib ye Tọmọs; Batodomiu ye Matiu; Yemsi ayịn Afiọs, Saimọn amaidʌñ Sidọd ye Yudas ayịn Yemsi.

¹⁴ Afịd ammọ ye mme ibaan ye Mmeri eka Yisọs, ye nditọeka amọ ideen emaeboho itie keed ke ubọñ akam afịd ini.

¹⁵ Ke mme usen ado, Bita amaadakka ada ke ufọọd mme andinịm ke akpanikọ (e-ekeyọhọke ñkpọ nte awo ikie ye edịb)

¹⁶ anyʌñ abo ate, “Nditọete mmi, ibaan ye ideen, ana ikọ Abasi asu kpa naña Adisana Sịbidịd amaaketañ ke usen edem, ato inua Defid ake abañake Yudas a-akedatta mme andikimʌm Yisọs usʌñ.

¹⁷ Sia emaebat anye nte keed ke atu ñnyịn, anye amaanyʌñ anie udeme ke iso utom ñnyịn.”

¹⁸ (Yudas amaadat akʌk idiọọkñkpọ amọ adep ikọd; do ke anye akeketo iwuod aduọ, mme nsia amọ enyʌñ ewuọọñọ.

¹⁹ Afịd awo ke Yerusedem emaekop ebaña ñkpa ami, do ndin emaeben itie ado ekood ke usem ammọ Akeddama, ado awuọ Inwañ Iyiib).

²⁰ Bita amaabo, “Sia, emaewewet ke ñwed mme Saam: “ ‘Yak itie amọ ado ndoon; yak awo ndomokeed akuudʌñ ke ndo,’ ñko, “ ‘Yak awo mfen adat itie udaiso ke utom amọ.’

²¹ Ke ntodo, afọn adimek keed ke atu mbon e-ekesʌkkọ eba ye ñnyịn afịd ini Abọọñ Yisọs akebaaha ye ñnyịn,

²² tọọñọ ke ini uduọkmmọọñ ake Yọọn tutu asịm ini e-ekebenne Yisọs ikpọñ ñnyịn. Sia ana keed ke atu ammọ ado ntiense ye ñnyịn ke abaña adised Yisọs ke ñkpa.”

²³ Ndin ammọ emaesiak anyịñ awo iba, Yosef a-akekereke Basabas (e-ekenyʌññọ esikood Yọstus) ye Matayas.

²⁴ Ammọ ndin emaebọñ akam ntom, “Abọọñ, afo adiọọñọ afịd esịd awo, iwọt ñnyịn ke atu awo iba ami, anye a-afo amekke

²⁵ abo adidat itie iso utom abọsịd, ake Yudas akewuọọhọ akpọñ aka usʌñ amọ.”

²⁶ Ndin, ammọ emaesịn afia, ndin afia amaasana Matayas; ke ntodo emaedat Matayas edian ke atu mme abọsịd duob ye keed.