Ñwed Yud 1 - Ñwed Abasi Ke Ikọ Ibibio Ayo Mfịn

¹ Yud, isʌñutom Yisọs Krais, anyʌññọ ado ayịneka Yemsi. Awet ñwed ami anọ esọk mbon e-ekekoodo, ake Abasi Ete amaaha, Yisọs Krais anyʌññọ akpeme ammọ.

² Mbọm, emem ye ima ayọhọ-ayọhọ akpekap ato ke adọọdiọñ ado ndufo.

Idiọọkñkpọ ye nsobo mbon e-mmiidiọọñọke Abasi

³ Mme adima ufan, akpesʌk ado akembaaha ke ekamba udọñ adiwet ndufo mbaña adinyaaña afịd ñnyịn iwuanake, esịd añnyịk miin ñko adiwet ñkpeiye ndufo mbo isọọñọ ndufo ukod edika iso ñnwanake ntak mbuọdidem a-Abasi akenọọhọ mme ndisana awo.

⁴ Sia ndusʌk awo e-ekenịmme ammọ enọ ubiom ikpe tọọñọ ke esed emaesaña ndịbe-ndịbe edʌk ke ufọọd ndufo. Ammọ idiọọñọke Abasi, enyʌñ ewọññọ mfọn Abasi ñnyịn esịn ke adukpo uwem, enyʌñ ekañ Yisọs Krais a-adooho ukweeñe Andikara ye Abọọñ ñnyịn.

⁵ Akpesʌk ado ndufo emedọdiọọñọ afịd ami, mmeyem editoiyo ndufo ke Abọọñ amaanyaaña ikọd amọ asio ke Iyịpt, ado anye amaasobo mbon emiikinịmme ke akpanikọ.

⁶ Mme enyere ñko, emmiikimʌmmọ itie adudu ammọ ikama, ado ekpọñ itie idʌñ ammọ, ke anye akekọp ke nsi-nsi ñkpakọb anịm ke ekịm, abo etie ebet ubiire ikpe ekamba Usen ado.

⁷ Kpasʌk ke ukem ado ñko, ke Sọdọm ye Komora ye mme abio e-ekekpereke ammọ e-ekesịn idem ke use ye abʌd-abʌd ido. Ammọ edo nte uwọdñkpọ, enọ mbon e-ebọọhọ ufen nsi-nsi ikañ.

⁸ Kpasʌk ke ukem usʌñ ado, ke adudu ndab ammọ mbon ami idiọọñọke Abasi esappa ikpọkidem ammọ, enyʌñ esịn isuuk iwuod nnọọ ukara, enyʌñ esueñ mme adudu e-edʌññọke ke anyọñ.

⁹ Ado Maiked, ekamba enyere ado, ke akenwanake ye setan ke ini anye anieghe eniin abaña akpo Moses, ikideiyedei isueñ setan ke ikpe, ado akebo, “Abọọñ asua unọ fiin!”

¹⁰ Ado mbon ami esueñ se adodo a-ammiinwañake ammọ, ndin mme ñkpọ ammọ enyʌññọ ediọọñọ ke ndad mmana ifiọk, nte unam a-mmiinieeghe ekikere, kpa mme ñkpọ ami esobo ammọ.

¹¹ Adọdiọọk anọ ammọ! Ammọ esañake ke afañ Keen; ammọ efeeñe ebịne udod ke ndudue Badam; enyʌñ etak ke nsọñiwuod Kora.

¹² Ammọ edoñño mme ndo ke itie usọrọ ima ndufo, edia ndidia ye ndufo ikoppokop ndịk ndomokeed, mme akpemeedọñ e-ebọọhọ idem ammọ kpọd. Ammọ edo idiọọk anyọñ a-mmiisịññeke edịm, a-afịm anyʌññọ akwọọk adat aboiyo; mme eto ndaeyo a-mmiinieeghe mfịd anyʌñ awịppe awuọ, akpa ñkemba.

¹³ Ammọ ebiod akpa inyañ ibom, esịññe esuenne ammọ naña mmọọñ asioño efụụd; ammọ ebiod nyooñ ntantaafiọñ e-enịmme ata abubịd akịm ke nsi-nsi.

¹⁴ Inọk, a-adooho ayọhọ awo itiaba tọọñọ ekebot Adam, atañ ikọ nte brọfed abaña ammọ, ate “Se, Abọọñ asaña ye mme tọsịn ye mme tọsịn adisana ikọd amọ adi,

¹⁵ adikpe ikpe afịd awo, adinyʌñ ibiom afịd mbon ammiidiọọñọke Abasi ikpe akeene afịd ndiọi ido a-ammọ enaññake, ye afịd ñkpọsọñ ikọ ammọ etañña edian anye.”

¹⁶ Ammọ edoñño mme ekuun ñkuun ye mbon e-mmiikịtte etiñkpọ ke awo mfen; ammọ ekeene mme ndiọi udọñ ammọ, inua ammọ ọnyʌñ eduaak inua ebaña idem ammọ, enyʌñ ekpek mme awo ke ediyem mfọn nnọ idem ammọ.

Ikood nsọọñọnda

¹⁷ Ado, mme ufan mmi, ndufo etoiyo ikọ a-mme abọsịd Abọọñ ñnyịn Yisọs Krais eketooho etañ.

¹⁸ Ammọ ekidọkkọ ndufo ete, “Ke utịd ini mbon nsaha eyaeba ediisaaña ke usʌñ idiọọk itọñ ammọ.”

¹⁹ Ammọ ami edoñño mbon e-sịnne ubakka ke atu ndufo, ammọ esaaña ke abʌkidem, inyʌññọ inie Sịbidịd.

²⁰ Ado ndufo, mme ndima ufan, ndufo edat edisana mbuọdidem ebọp idem ndufo, ebọñ akam ke Adisana Sịbidịd.

²¹ Enịm idem ndufo ke ima Abasi enyʌñ etie ebet mbọm Abọọñ ñnyịn Yisọs Krais e-ediiben ndufo isịn ke uwem nsi-nsi.

²² Ndin itua mbon e-enieeghe eyịghe mbọm; inyʌñ inyaaña usʌk ammọ, idappa isio ke ikañ;

²³ inyʌñ idat ndịk itua usʌk ammọ mbọm, isua kpa idem afọñidem abʌkidem a-asappake.

Itooro

²⁴ Amaado anye a-kanna ikpeme ndufo mbaak ididuọ, anyʌññọ anam ndufo eda ke iso ubọọñ amọ e-enana ndo ke akwa idaresịd,

²⁵ adooho ukweeñe-ukweeñe Abasi Andinyaaña ñnyịn, yak ubọọñ ye ubom ye adudu ye ukara anie anye ato ke Yisọs Krais Abọọñ ñnyịn, ke afịd emana, ye ke mfịn, ye ke nsi-nsi! Amen.