Ibru 1 - Ñwed Abasi Ke Ikọ Ibibio Ayo Mfịn

Akpatre ikọ Abasi: Ayịn amọ

¹ Ke mme usen edem, Abasi amaatañ ikọ anọ mme ete ato inua mme brọfed ke uwak-uwak ini, ke nsio-nsio usʌñ,

² ado ke mme akpatre usen ami anye atañ ikọ inọ ñnyịn ato Ayịn amọ, a-anye amaakemek adia akpa ukeed ñkpọ, a-adooho ekenam ekondo eto ke anye.

³ Ayịn ado uyama ubọọñ Abasi ye ata mbid idem amọ a-amʌmmọ afịd ñkpọ akama ke adudu ikọ amọ. Ke anye amaakenam awo asana ke adiyet idiọọkñkpọ nsio, anye amaasuuk atie ke ubọk udom Andikara ke abio ubọọñ Abasi.

⁴ Ndin anye amaakappa akoñ akan mme enyere sia anyịñ a-anye abọọhọ akoñ akan ake ammọ.

Ayịn akpon akan mme enyere

⁵ Ake-e ke atu mme enyere ke akenam Abasi abo, “Afo ado Ayịn mmi; mfịn ami mmubon fiin”? Me mfen, “Ami ñyaado Ete amọ, ndin anye ayaado Ayịn mmi”?

⁶ Ndin ñko, ke ini Abasi abenne akpa ayịn amọ adi ederimbod, anye ate, “Yak afịd mme enyere Abasi ekpono anye.”

⁷ Ke aditañ ikọ mbaña mme enyere anye ate: “Anye anam mme enyere amọ edo sịbidịd mbon utom amọ mme edeme ikañ.”

⁸ Ado ke abaña Ayịn anye abo, “Ebekpo mfo, O Abasi, ayaaba ke nsi-nsi, nsi-nsi; esañ unen adido esañ ubọọñ ukara mfo.

⁹ Afo amema adisana ido akenyʌñ asua ukwañ ido; ke ntodo Abasi, Abasi mfo audịppe fiin abọhọ mme nsaña mfo ke aduyet fiin adan inemesịd.”

¹⁰ Anye amaana abo, “Ke aditọọñọ, o Abọọñ, Afo akesịn itiad idakisọñ ederimbod, mme ikpaanyọñ ñko edoñño utom ubọk mfo.

¹¹ Ammọ eyaesobo, ado afo asʌk ababa; ammọ eyaetaha nte afọñ.

¹² Afo ayaafʌt ammọ nte afọñ; eyaekpʌhọ ammọ nte afọñ. Ado afo asʌk aba ukem-ukem ndin mme isua mfo idiitreke.”

¹³ Ake-e ke atu mme enyere ke Abasi akenaanam abo, “Tie ke ubọk udom mmi tutu ami nnam mme asua mfo ifịm udodukod mfo”?

¹⁴ Nte mme enyere Abasi idooho mme sịbidịd nsaña utom e-esiooho edọñ ebo enam ñkpọ enọ mbon e-ediibọ adinyaaña?