Efisọs 1 - Ñwed Abasi Ke Ikọ Ibibio Ayo Mfịn

¹ Bọọd, keed ke atu mme abọsịd Krais Yisọs ke uduak Abasi. Ñwet nnọ mme ndisana nditọ Abasi ke Efisọs, mme andisọọñọ nda ke Krais Yisọs.

² Ibọ mfọn Ye emem a-atooho Abasi ete ñnyịn Ye Abọọñ Yisọs Krais.

Itooro ye adidiọñ sịbidịd ke Krais

³ Itooro anie Abasi ye ete Abọọñ Yisọs Krais, a-amaakidiọñ ñnyịn ke ebekpo ubọọñ ye afịd-afịd edidiọñ sịbidịd ke Krais.

⁴ Sia anye ke idem amọ amaimek ñnyịn ke Krais mbemiso ekebot ederimbod nte adisana anyʌñ anana ndo ke anyen amọ. Ke ima

⁵ anye amaimek ñnyịn ke adiben ñnyịn mbon nte nditọ ato ke Yisọs Krais, nte asañake akekem ye inemesịd ye uduak amọ,

⁶ ke itooro ye ubọọñ mfọn amọ, a-anye inọọhọ ñnyịn ke mfọn ke anye a-anye amaaha.

⁷ Ke anye ke ñnyịn inie adifak ato iyiib amọ, adifeen mme idiọọkñkpọ, asañake akekem ye mme inie mfọn Abasi

⁸ a-anye akiduọiyọ ñnyịn ke idem. Ye afịd ekike ye adinam anwaña,

⁹ anye amaanam ñnyịn idiọọñọ ndedịbe uduak amọ nte asañake akekem ke inem amọ a-anye amaakedaduak ke Krais,

¹⁰ a-adiinam awuọ ada ke ini amaadikem ayọhọ-ayọhọ, nọ aben afịd ñkpọ ke abio Abasi ye ke isọñ adian keed ke idak ukara Krais.

¹¹ Ke anye, emaenyʌñ imeemek ñnyịn i-imaikibaba tọọñọ ke aditọọñọ nte asañake akekem ke ubonoñkpọ anye a-anamma afịd ñkpọ asio nọ asaña ye ewʌhọ uduak amọ,

¹² nọ ato do, ñnyịn i-ikidooho akpa adidot anyen ke Krais ikan adikwọ itooro mfọn amọ.

¹³ Ndin emaisịn ndufo ke Krais ke ini emaekekop ikọ akpanikọ, eti etob adinyaaña ndufo. Ke emaekenịm ke akpanikọ, emainịm ndufo idiọọñọ ke ufiikñkpọ Adisana Sịbidịd e-ekenwọñọke,

¹⁴ a-adooho ubiọñ adimʌm inie ñnyịn tutu ini adinyaaña mbon e-edoññoke inie Abasi, ke itooro mfọn amọ.

Ekọọm ye akam

¹⁵ Ke ntak ami, tọọñọ ke ini a-ami ñkekoppo mbaña mbuọdidem ndufo ke Abọọñ Yisọs dian ima a-ndufo enieeghe enọ afịd nditọ Abasi,

¹⁶ ami ntreke adinọ ekọọm mbaña, nsʌk ñkakaiso itoiyo ndufo ke akam.

¹⁷ Nsʌk ñkakaiso mbeeñe mbo yak Abasi Abọọñ ñnyịn Yisọs Krais, Ete andibọ ubọọñ, inọ ndufo Sịbidịd ekike ye adiyaara, ma ediọọñọ anye ekan ami.

¹⁸ Ami mmenyʌñ mbọñ akam mbo yak anyen esịd ndufo anwaña nọ ato do ndufo ediọọñọ idodanyen a-anye ikoodo ndufo, ye uforo ke ubọọñ inie amọ ke ndisana nditọ Abasi,

¹⁹ mme anana mbiod akwa adudu inọọhọ ñnyịn mme andinịm ke akpanikọ. Adudu ado atie nte utom akwa adudu amọ,

²⁰ a-anye akesịnne ke Krais ke ini anye akenamma anye aset ke ñkpa anyʌñ atem anye ke ubọk udom amọ ke mme ikpeghe ebekpo ubọọñ,

²¹ akoñ akan afịd adikara mme ukara, adudu ye adikan, mme afịd anyịñ ubọọñ e-ekemeke adinọ, idooho ke emana anye ami ikpọọñ ado ñko ke mfen a-adiidi.

²² Ndin Abasi amaasịn afịd ñkpọ ke idak ukod amọ anyʌñ amek anye adido ukeed ñkpọ nnọ ufọkabasi,

²³ a-adooho idem amọ, uyọhọ anye a-anamma afịd ukeed ñkpọ ayọhọ ke afịd usʌñ.