3 Yọọn 1 - Ñwed Abasi Ke Ikọ Ibibio Ayo Mfịn

¹ Mme mbiowo, Nnọ ñwed ami esọk adima ufan mmi Keyọs, a-ami imam a-mmaagha ke akpanikọ.

² Adima ufan mmi, akam mmi ado yak afo aba ke nsọñidem, nte ñkpọ anyʌñ ufọn fiin kpa ukem-ukem naña afọn ye ukpọñ mfo.

³ Mmaanem esịd eti-eti adikop nto usʌk mme andinịm ke akpanikọ ke afo amenam akpanikọ anyʌñ akaiso a-asañake akpanikọ.

⁴ Inemesịd mmi anekke akpon ke adikop ke nditọ mmi esaña ke usʌñ akpanikọ.

⁵ Adima ufan, afo amenam akpanikọ ke utom Abasi a-afo anamma anọọ nditọete, akpesʌk ado ammọ edooho mme isenawo unọọ fiin.

⁶ Mme awo ami emaedinọ ikọ ntiense ke atu ikọd Abasi ebaña ima mfo. Ayaafọn ñko afo edisio ammọ unyọñ nte eti awo Abasi.

⁷ Sia ammọ edoñño nsaña utom enọ Abasi, ammọ ikinyʌññọ ibọ ndomo unwam keed ito mme akpono ndem.

⁸ Ndin ana ñnyịn isịn unwam inọ ammọ, nọ ikeene iwuana ke adisuan etob akpanikọ.

⁹ Mmaawet ñwed nnọ esọk ufọkabasi ado Diotrefes, a-amaaha ido ada-iso, ikinyịmmeke edidaara ñnyịn.

¹⁰ Ndin ñkpedi, ñyaanam ediọọñọ se anye anam, ye ndiọi ikọ inua a-anye ataaña idian ñnyịn. Anye iyʌkkọke ke ado, asịn idaara mme andinịm ke akpanikọ e-ediehe. Idooho ado kpọd, ado aka iso edibiọọñọ mbon se ikpinyịmme, abịn ammọ asiooño ke ufọkabasi.

¹¹ Adima ufan, kuukeene udʌk usʌñ idiọọk ado keene se ido eti. Awo a-anamma se ifọn ato Abasi. Anam ndiọi idiọọñọke Abasi.

¹² Afịd awo etaañ nti ikọ edian Demitrus kpa ke akpanikọ ke idem amọ. Ñnyịn ñko imitañ nti ikọ ibaña anye, ndin afo amediọọñọ ke ikọ ntiense ñnyịn ado akpanikọ.

¹³ Mmenie uwak ñkpọ se ñkpewet unọ fiin, ado ñyemme idat ñwed ye mmọọñ ñwed ñwet.

¹⁴ Mmenie idodanyen mbo ke idiikpeeneke ñyaadukịt fiin iso mme iso.

¹⁵ Yak emem aba ye afo. Mme ufan ke umi enọ ekọọm. Kọọm afịd mme ufan ñnyịn do ke anyịñ ke anyịñ.