2 Yọọn 1 - Ñwed Abasi Ke Ikọ Ibibio Ayo Mfịn

¹ Ami, nyobioawo, Anọ ñwed ami esọk eti awonwaan a-Abasi amaakemek ye nditọ amọ a-ami ntʌmọ mma ke ntak a-ammọ ediọọñọke akpanikọ, idooho ami ikpọọñ ma ammọ ado ukeed awo e-ediọọñọke akpanikọ,

² ke ntak akpanikọ, a-adʌññọ ke ñnyịn, a-adiinyʌñ iba ye ñnyịn ke nsi-nsi.

³ Mfọn, emem ye mbọm a-atooho Abasi Ete ye ke Yisọs Krais, Ayịn Ete, ayaaba ye ñnyịn ke akpanikọ ye ima.

⁴ Mmekop inemesịd eti-eti adikịt usʌk nditọ mfo naña esaña ke akpanikọ ukem-ukem naña Ete akinọọ ñnyịn ewʌhọ.

⁵ Ndin idahami, adima awonwaan, ami ñwette ufa ibed unọ ado kpa ibed a-ñnyịn imaikinenie tọọñọ ke editọọñọ. Mbeeñe yak ñnyịn ima keed aken.

⁶ Ima ado ado ami: yak ñnyịn isaña ke ñkopitem mme ewʌhọ amọ. Ndin kpa naña ekop tọọñọ ke editọọñọ, ewʌhọ amọ ado yak ndufo esaña ke ima.

⁷ Uwak mbon abiaaña, ammiinyịmmeke ibo ke Yisọs Krais amaadi ke ederimbod ke abʌkidem, ewuọọñọ edọñọ ke ederimbod. Utọ awo ami edo awo abiaaña ye andibiọọññọ Krais.

⁸ Ekpeme mbaak ediduọọk se ndufo ekekpa utom enọ, ado nọ ebọ utịp ayọhọ-ayọhọ.

⁹ Awo ake adodo a-afegheke akpọñ ukpeebñkpọ Krais inieeghe Abasi; awo a-akaaha iso ke ukpeebñkpọ Krais anie Ete anyʌñ anie Ayịn.

¹⁰ Adieke awo adieeghe ado isañake ye ukpeebñkpọ ami, kuudat anye udʌk ufọk mfo.

¹¹ Awo ndomokeed a-adaarake anye akeene awuana ke ndiọi utom amọ.

¹² Mmenie uwak-uwak ñkpọ se ñkpewet unọ fiin; ado ñyemme ediben ñwed ye mmọọñ ñwed ñwet. Utu ke ado, mmeduak adisọp nduse fiin ma ndineme nneme iso ye iso ye afo, nọ ato do idaara ñnyịn ayọhọ.

¹³ Nditọ ayịnete mfo awonwaan, a-Abasi akemekke, adọñ ekọọm.