2 Timoti 1 - Ñwed Abasi Ke Ikọ Ibibio Ayo Mfịn

¹ Bọọd asañautom Krais Yisọs ato ke uduak Abasi, asañake akekem ye unwọñọ uwem a-abaaha ke Krais Yisọs,

² Nnọ ñwed ami esọk Timoti, ayịn ima mmi. Yak mfọn, mbọm ye emem a-atooho Abasi Ete ye Abọọñ ñnyịn Krais Yisọs aba ye afo.

Ekọọm

³ Mmekọọm Abasi a-ami nnamma ñkpọ nnọ ye etiesịd, ukem naña mme ete ñnyịn ekenam. Ami mfreke edibọñ akam usịn fiin afịd usen, uweeme ye akoneyo.

⁴ Ini ake adodo ami ntoiyoke mmọọñayịd mfo, andọñ miin edukịt fiin, nọ idadesịd mmi ayọhọ.

⁵ Entoiyo ebaña ata mbuọdidem mfo, a-akebemme iso asịne ke idem ekam mfo Dọis ye ke idem eka mfo Yunis, ndin mmenịm ke akpanikọ ke ukem mbuọdidem ado a-anyʌn usịne fiin ke idem ñko.

Ebeeñe adinie nsuukiwuod nọ Bọọd ye mme eti etob

⁶ Afo amaabọ enọ ato Abasi ke ini ñkudotto ubọk. Idahami utoiyo fiin nte yak mbuọdidem ado ke esịd mfo aka iso asak nte ikañ.

⁷ Abasi ikinọọhọ ñnyịn sịbidịd idek ado akinọ sịbidịd adudu, ye ima, ye mfadidem.

⁸ Ke ntom, kuuyak abuud unam fiin adido ntiense nnọọ Abọọñ ñnyịn. Kuunyʌñ uyak abuud unam fiin ambaña miin, awo ñkpakọb amọ. Ado ñkeene miin biom ukuud ke ntak adikwọrọ eti mbʌk ami, ato ke adudu Abasi,

⁹ anye i-inyaañake ñnyịn anyʌñ ikood ñnyịn ate idu adisana uwem, itooho ke se ñnyịn inam ado ato ke uduak ye mfọn amọ a-anye akinọọhọ ñnyịn ke Krais Yisọs, mbemiso ntọọñọ ederimbod.

¹⁰ Ato ke adidi Andinyaaña ñnyịn, Krais Yisọs, anye amaayara ñkpọ ami inọ ñnyịn. Krais amaabiad ñkpa, ndin ato ke eti etob emi, ayaara uwem nsi-nsi anọ mme andinịm anye ke akpanikọ.

¹¹ Ke ntak ami anye akemmek miin nte andisuan eti etob, nte abọsịd ye nte andikpeeb.

¹² Ke ntak ami ñko ke ami mbọ ufen a-ambọọho mi. Ado abuud innamma miin, sia mmediọọñọ anye a-ami nnịmme ke akpanikọ, mmenyʌñ nnekke ndiọọñọ ke anye akeme adikpeme se ñkeyaak nsịn anye ke ubọk tutu awuọ usen ado.

¹³ Mʌm nti ikọ se afo akekop ke inua mmi kama, nte naña akama akpeeb ñkpọ ke eti usʌñ, ye mbuọdidem ye ima ke Krais Yisọs.

¹⁴ Ato ke unwam Adisana Sịbidịd a-abaaha ye ñnyịn, nekke kpeme enọ e-eyakka unọ fiin.

Mme ido awọttọ akpanikọ ye unana akpanikọ

¹⁵ Afo amediọọñọ ke ukeed mbon Esia emaefeghe eñkpọñ miin, ye mbon abio Fikedus ye Emoyiin.

¹⁶ Abọọñ akpekap atua ufọk Onesifọdus mbọm, sia ado anye akesinnọọ unwam anyʌñ asinsọọñọ miin idem uwak ini, ikoppo abuud ibaña itie ñkpakọb mmi.

¹⁷ Ado ke ini anye adieeghe Rum, amanyem miin tutu adiñkịt.

¹⁸ Mmebeeñe Abasi nte yak anye atua Onesifọdus mbọm ke usen ado. Afo amenekke adiọọñọ mme uwak unwam se anye akesinnọ miin ke abio Efisọs.