2 Bita 1 - Ñwed Abasi Ke Ikọ Ibibio Ayo Mfịn

¹ Saimọn Bita, isʌñutom ye abọsịd ake Yisọs Krais. Awet ñwed ami anọ esọk mbon e-ekebọọhọ utọ nsọñudua mbuọdidem a-abiotto ake ñnyịn, ke adinenido Abasi ñnyịn ye Andinyaaña Yisọs Krais.

² Mfọn ye emem ayọhọ-ayọhọ akpekap ato ke edidiọọñọ Abasi ye Yisọs Abọọñ ñnyịn ikeene ndufo.

Adinam ikood ye umek awo anie nsọọñọ nda

³ Sia adudu Abasi inọ ñnyịn afịd ñkpọ a-asañake ye uwem ye uteñe Abasi, ato adidiọọñọ anye, a-akedatta ubọọñ ye etiido amọ ikood ñnyịn.

⁴ Ato ke ami anye anọ ñnyịn mme enwọñọ a-asọññọ udua anyʌñ akpon eti-eti; man ndufo edat ammọ ewana ke uduod Abasi; anyʌñ ekebọkkọ mbiara idiọọk itọñ a-asịneke ke ederimbod.

⁵ Ke ntak anye ami ndin, ndufo isịn ifịk ke adidian nti ido ke mbuọdidem ndufo; ndin ke nti ido, idian ifiọk;

⁶ ke ifiọk, idian mfadidem, ke mfadidem, idian adibọ ke ime; ke adibọ ke ime, idian uteñe, Abasi;

⁷ ke uteñe, Abasi, idian esịd enọ ayịneka, ke esịd enọ ayịneka, idian ima.

⁸ Sia adieke mme ñkpọ ami abaaha ke esịd ndufo ayọhọ-ayọhọ, ammọ eyaenam ndufo ibaaha ibe-ibe, ikiinyʌñ inana mfịd ke udiọọñọ Abọọñ ñnyịn Yisọs Krais.

⁹ Sia awo ammiinieeghe mme ñkpọ ami ado nnan, itʌmmọ ikịt usʌñ, anyʌñ afre ate ke emaeyeyet mme ñkaan ndiọiñkpọ efep enyʌñ enam imọ isana.

¹⁰ Ke ntodo, nditọete, idiọdiọñ isịn ifịk inam ikood ekikoodo ndufo ye adimek ekimekke ndufo asọọñọ ada; sia adieke ndufo enamma mme ñkpọ ami, ndufo idiikọbọke iduọ;

¹¹ sia ado ntom ke ediinọ ndufo ayọhọ udịd adiboiyo ndʌk ke nsi-nsi abio ubọọñ Abọọñ ye Andinyaaña ñnyịn Yisọs Krais.

Brọfesi ikọ Abasi

¹² Ntak ami anam ami ndiisʌk itotoiyo ndufo ñkpọ ami afịd ini, akpesʌk ado ndufo ediọọñọke ammọ enyʌñ esọọñọ eda ke akpanikọ a-ndufo enieeghe.

¹³ Ñnyʌñ ñkere ke anen ami adidemme ndufo ke aditoiyo ndufo ñkpọ ami, adaña nte ami mbaaha ke abʌkidem ami;

¹⁴ sia mmediọọñọ mbo ke ñyaawara mfʌt ami nnịm ñkañ keed naña Abọọñ ñnyịn Yisọs Krais akeñwọt miin.

¹⁵ Ñyaasịn ifịk aditoiyo ndufo mbaak mmaadakka ndufo esʌk ekan etoiyo mme ñkpọ ami afịd ini.

¹⁶ Sia ñnyịn ikikeeneke ñkaña mbʌk a-awo adatta ndufiọk atịppe, ke ini ñnyịn ikinamma ndufo ediọọñọ adudu ye edidi Abọọñ ñnyịn Yisọs Krais, ado ñnyịn ke idem ñnyịn ikidat anyen ñnyịn ikịt ubọọñ amọ.

¹⁷ Sia anye akebọ ukpono ye ubọọñ ke ubọk Abasi Ete, ke ini uyo atooho ke akaakan ubọọñ ado asịm anye ntom, ate, “Ami ado Ayịn mmi, Ayịn ima Mmi, e-esịd anem Miin ye anye.”

¹⁸ Ñnyịn ke idem ñnyịn ikikop uyo ado naña ato ke anyọñ awuọ ke ini ñnyịn ibaaha ye anye ke adisana abod ado.

¹⁹ Ndin emaedọdiọñ esọọñọ ikọ mme brọfed ñnyịn; ndin ndufo eyaetʌm enam, adieke ndufo edikpañ utọñ inọ ikọ ado, naña awo ase utuenikañ a-ayamake ke ñkịm-ñkịm itie, tutu eyo asiere, ntantaafiọñ ubakusen anyʌñ asakka ke esịd ndufo.

²⁰ Akpan-akpan, ana ndufo ediọọñọ ke ibaaha brọfesi ndomokeed ke ñwed Abasi a-brọfed ndomokeed akedatta ifiọk amọ akappa.

²¹ Sia akanam ba ikọ brọfed itooho ke uduak awo, ado mme etañ ikọ a-atooho Abasi, naña Adisana Sịbidịd adat ammọ usʌñ abo etañ.