1 Yọọn 1 - Ñwed Abasi Ke Ikọ Ibibio Ayo Mfịn

Ntịppe ikọ uwem

¹ Ñkpọ se ikiba ke aditọọñọ, se ñnyịn ikikop, ye se ikịt ke anyen ñnyịn, ye se ñnyịn ise inyʌñ ituuk ke ubọk ñnyịn, ami ke ñnyịn itañ ibaña Ikọ uwem.

² Uwem ado amaawuọ awọd idem; ñnyịn imikịt anye inyʌñ itie ntiense ibaña anye, ñko immunyʌñ itañ inọ ndufo ibaña nsi-nsi uwem, a-akebaaha ye Ete anyʌñ ayaara idem iwọt ñnyịn.

³ Ñnyịn itañ inọ ndufo ibaña se ñnyịn ikịt ye se ikop, nọ atoodo ndufo enie ewana ye ñnyịn. Ndin inie ewana ye Ete ye Ayịn amọ, Krais Yisọs.

⁴ Ñnyịn iwet ñkpọ ami adinam idadesịd ñnyịn ayọhọ.

Unwana ye akịm, idiọọkñkpọ ye adifeen

⁵ Ayem ado etop se ñnyịn ikop ito anye inyʌñ iben itañ inọ ndufo: Abasi ado unwana ndin akịm ndomokeed ibaaha ke anye.

⁶ Adieke ñnyịn ibooho ke idʌk nsaña ye Abasi, ado ñnyịn isana ke akịm, ñnyịn ido mme asʌhọ nsu, idooho mme anam akpanikọ.

⁷ Ado ñnyịn ikpisaña ke unwana, naña anye aba ke unwana, ñnyịn inie ewana ye emọ-emọ awo, ndin iyiib Yisọs, Ayịn amọ, ayet ukeed ndiọiñkpọ ñnyịn afep.

⁸ Ñnyịn ikpibo ke ñnyịn inieeghe idiọọkñkpọ, ibiaaña idem ñnyịn ndin akpanikọ inyʌññọ iba ñnyịn ke idem.

⁹ Adieke ñnyịn iyaarake mme idiọkọ ñkpọ ñnyịn, anye ado anam akpanikọ, anyʌñ anen ndin anye ayaafeen ndudue ñnyịn anyʌñ ayet ñnyịn isana ke ukeed ndiọiñkpọ ñnyịn.

¹⁰ Adieke ñnyịn ibooho ke kpaanaanam ñnyịn inamma idiọọkñkpọ, imikappa inam anye ado asʌhọ nsu ndin ikọ amọ ñko idʌññọ ke uwem ñnyịn.