1 Timoti 1 - Ñwed Abasi Ke Ikọ Ibibio Ayo Mfịn

¹ Bọọd, abọsịd Krais Yisọs, naña asaña akekem ke ewʌhọ Abasi Andinyaaña ñnyịn, ye Krais Yisọs idodanyen ñnyịn,

² Nnọ esọk Timoti, a-adooho ata ayịn mmi ato ke mbuọdidem: Mfọn, mbọm ye emem e-etooho Abasi Ete, ye Abọọñ ñnyịn Krais Yisọs.

Edọd Timoti utọñ ebaña mme nsu-nsu andikpeeb

³ Daña ñkekaaha abio Masidonia, mmaukpeiye mbo yak asʌhọ ke Efisọs, ma afo akaiso anọ mme awo ke udo item, ate yak ammọ ekuukpeeb ñkpọ a-adiaññake akpọñ se ñnyịn ikikpeeb

⁴ ñko ammọ ekuukpañ utọñ enọọ mme ñke ye ñnyan mbʌk ntịppe e-ekemeke idat eniin ndi, eniin a-mmiiyakka utom Abasi akaiso, adooho ke mbuọdidem.

⁵ Ami nnọ uyo ami nọ atodo ammọ enie ima, a-asañake ye eti esịd ye ata mbuọdidem.

⁶ Usʌk awo emaewọññọ ekpọñ ido ami ekanna ebịne ikpu-ikpu ndutañña ikọ.

⁷ Utọ ibon ami eyem adido mme akpeeb awo ibed ado ammọ idiọọñọke se ammọ etañ ebaña inyʌññọ idiọọñọ se ammọ esọọñọ etañ.

⁸ Ñnyịn imidiọọñọ ke ibed a-afọn adieke awo anamma ibed ke eti usʌñ.

⁹ Ñnyịn iminyʌñ idiọọñọ ke awo inamma ibed inọ ndinen awo, ado enam enọ mme abiad ibed ye mbon nsọñiwuod ye mbon e-mmiiteeñeke Abasi anyen, ye mme anam ndiọiñkpọ, mbon a-amiisanake ye mbon a-mmiikponoke Abasi ye mbon e-ewotto mme ete ye mme eka ammọ, mme awodawo,

¹⁰ ye mme esịn efịbe, ye mme anam use ye ndukpo ido, ye mme ayịp inọ, mbon e-enwọñọke ñkpọ ke nsu, mme anyam awo ye mme anam ndiọi mfen e-ekemeke edibiọọñọ eti ukpeebñkpọ

¹¹ a-asañake akekem ke eti etob ubọọñ Abasi adidiọñ, a-anye akekappake annọ.

Mfọn Abọọñ anọọhọ Bọọd

¹² Ami mmekọọm Krais Yisọs, Abọọñ ñnyịn, a-akennọọhọ miin ukeme, sia anye akeñkịtte miin nte awo akpanikọ anyʌñ anịm miin ate nnam utom amọ.

¹³ Akpesʌk ado a-ami ñkesitañña atịme-atịme ikọ mbaña anye ke ini edem ñnyʌñ ñkọbọ anye, nsuenne anye, anye amaantua miin mbọm, sia ami ñkenam afịd ñkpọ ado ke unana mbuọdidem ke idaha ammeñkenịmme ke akpanikọ, sia ami mmeñkediọọñọke Krais idahado.

¹⁴ Abọọñ ñnyịn amaanwañña mfọn amọ annọ miin ndin ato ke ima amọ annọ miin mbuọdidem ato ke Krais Yisọs.

¹⁵ Ikọ ami ado ata akpanikọ, anyʌñ adod ñnyịn adinyịmme ke afịd esịd ite ke Krais Yisọs akedi ederimbod adinyaaña ndiọi awo, a-ami ndooho etubom ke atu ado.

¹⁶ Emaentua miin mbọm ke ntak ami nọ Krais Yisọs andat miin andidiọọk ñkan ke atu mme ndiọi awo, nte uwọd-ñkpọ, ayaara anyan ime amọ anọ awo ake adodo a-adiinịm anye ke akpanikọ, anyʌñ adat anye akesịm nsi-nsi uwem.

¹⁷ Yak ukpono ye ubọọñ anie nsi-nsi Adidem a-akarake ke afịd emana, anye a-mmiikpaaha, a-anyen awo mmiikịtte anye, kpa Abasi keed ke nsi-nsi nsi-nsi. Amen.

Esọọñọ utom enọọhọ esọk Timoti

¹⁸ Timoti, ayịn mmi, item ami ke unọọ fiin, a-asañake akekem ye mme brọfesi ekenamma ubaña fiin ini keed, nọ atoodo afo umaunam mme item ami, afo ndin akan anwana eti anwan ami,

¹⁹ sọọñọ mʌm mbuọdidem ye etiesịd kama, sia usʌk awo emasịn mme ñkpọ ami enyʌñ eduọk mbuọdidem ammọ.

²⁰ Haimenius ye Adeksanda edoñño utọ ibom ami, ndin mmeyaak ammọ nsịn Setan ke ubọk, nte atʌnọ ammọ tutu ammọ ekpeeb aditre adisappa anyịñ Krais.