1 Bita 1 - Ñwed Abasi Ke Ikọ Ibibio Ayo Mfịn

¹ Bita, abọsịd Yisọs Krais, Awet ñwed ami anọ esọk mbon a-Abasi amekke, mme isenawo ke ederimbod, e-esuanake eyọhọ Bọntus, Kadesia, Kapadosia, Esia ye Bitinia,

² mbon a-Abasi Ete amaakemek asaña akekem ke akpa ifiọk Abasi Ete, ato ke adiyet asana utom Sịbidịd, ke ntak nsuukiwuod ammọ nnọ Yisọs Krais nọ anye adat iyiib amọ asịịme ammọ ke idem. Mfọn ye emem aba ye ndufo eduek-eduek.

Itooro anie Abasi ke uwem idodanyen

³ Itooro anie Abasi ye Ete Abọọñ ñnyịn Yisọs Krais! Ke akamba mbọm ammọ, annọ ñnyịn ufa emana asịn ke uwem idodanyen ato ke adised Yisọs Krais ke ñkpa;

⁴ ye udeme a-mmiidibiarake, a-miidiitakka me adikpa anyen, e-enịmme ke abio ubọọñ Abasi inọọ ndufo.

⁵ Ami, ke mbuọdidem, adudu Abasi akweeghe aboiyo adisịm adinyaaña e-enịmme ebet akpatre ini adiyaara idem.

⁶ Ke ntodo, ndufo enekke idaara, akpesʌk ado idahami, ke etək ini, nsio-nsio idomo ayainam ndufo eba ke mfʌhọ.

⁷ Mme ñkpọ ami adi ma mbuọdidem ndufo, asọññọ udua akan kood, a-abiarake akpesʌk ado edommo ke ikañ, akpewuọ ado ñkpọ itooro, ye ubọọñ ye ukpono inọ ndufo ke ini Yisọs Krais adiyaara idem.

⁸ Akpesʌk ado ndufo mmiikịtte anye, ndufo e-ema anye, ñko akpesʌk ado ndufo mmiikịtte anye idahami; ndufo emenịm anye ke akpanikọ enyʌñ eyọhọ ye idadesịd ake inua mmiikanna itañ a-anyʌññọ ayọhọ ye ubọọñ.

⁹ Sia ebọ utịp mbuọdidem ndufo a-adooho adinyaaña ukpọñ.

¹⁰ Ke abaña adinyaaña ami, mme brọfed e-eketañña ebaña mfọn e-edinọ ndufo, emaetịm eduuñọ,

¹¹ ayem adidiọọñọ ini mme ñkpọ Sịbidịd Krais a-akebaaha ke esịd ammọ aketañ abaña ndutʌkkọ Krais ye Ubọọñ adikeene.

¹² Emaeyaara ewọt ammọ ete ke ammọ ikinamma ñkpọ adinwam idem ammọ ado ke ekekap enwam ndufo ke ini ekebenne ikọ ado etañ, kpa ikọ emaeketatañ inọ ndufo ato ke inua mbon e-ekwọrọke nti etob inọ ndufo ke Adisana Sịbidịd, e-ekedọññọ ato abio ubọọñ Abasi adi. Kpa mme enyere emaenie udọñ adinyuuñọ nse mme ñkpọ ami.

Isana

¹³ Ke ntodo, ebeeñe esịd ndufo enọ utom; enie mfadidem; ewuuk idodanyen ndufo ayọhọ-ayọhọ ke mfọn e-ediinọ ndufo ke ini emaeyaara Yisọs Krais.

¹⁴ Nte nditọ nsuukiwuod, ikiiyak idem ndufo inọ idiọọk udọñ a-ndufo ekenieeghe, ke ini a-ndufo mmiikinieeghe ifiọk.

¹⁵ Ado kpa naña andikood ndufo ado adisana, ndufo ñko enịm idem ndufo adisana ke afịd-afịd ñkpọ.

¹⁶ Sia ewet ete: “Isana, sia ami ndo adisana.”

¹⁷ Ndin, sia ndufo ekoodo Ete a-miifegheke awo anyen, ado abieere ikpe anọ awo akeene adinam amọ, edu uwem ndufo ke uteeñe Abasi nte isenawo mi.

¹⁸ Sia ndufo ediọọñọke ete ke ikidatta mbiaña ñkpọ nte sidifa mme kood ifak ndufo esio ke idiọọk edu uwem a-aketooho mme eteete ndufo aboiyo isịm ndufo,

¹⁹ ado ekedat iyiib, a-asọññọ udua efak ndufo, nte iyiib ayịn edọñ, a-ananake ndo anyʌñ anana ntọi, kpa ake Krais:

²⁰ Ekemek anye enịm mbemiso ebot ederimbod, ado ediyaara anye ke akpatre ini ami ke ntak ndufo.

²¹ Ato ke anye, ndufo enịm Abasi ke akpanikọ, a-akenamma anye aset ke ñkpa anyʌñ anọ anye ubọọñ, ke ntodo mbuọdidem mme idodanyen ndufo aba ke Abasi.

²² Idahami, sia ndufo emaekenam idem ndufo asana ke adisuuk iwuod nnọọ akpanikọ nọ ndufo ekan enie ata ima enọ nditọete ndufo, ema keed aken ye ntotəño ima a-atooho ke esịd.

²³ Sia ana ndufo emaemana ufa, itieeghe nte ñkpasi a-akpaaha, ado eba ke ubon a-mmiidibiarake, ato ke ikọ Abasi a-aduuho uwem anyʌññọ akpeene ke nsi-nsi.

²⁴ Sia, “Afịd awo eba nte mbid, afịd ubọọñ ammọ anyʌñ abit uyai ñkọñ ikọd; mbiod amaayeeme, uyai ñkọñ ado abehe,

²⁵ ado ikọ Abasi aba ke nsi-nsi.” Ami ado ikọ e-ekekwọrọke inọ ndufo.