Wawa 23 - Maiadomu

¹⁸ Matautauda Belami valea dede ivesipupuyeni ivo, “Kini Belaki, Sipola natuna, kumai guvona kivevaneneqa-vekavekaieni.

¹⁹ Iave ge tomo'otoqaotoqa beqa ge idakakatupoe. Wete nanuanuana ge idasisivilaviladi mesaida tomo'otoqa davalabubuna. We vakai iesipupuyeni inavalabubuni. Wete vakai ivonadabedabedi kaia mesaida inasauyedi.

²⁰ Iave ivonegu dede tomo'otoqanidiavo aivonavenapwayewedi. Gunabeida ivonavenapwayewedi beqa yau ge kagusala vonavenapwayewanina aikewayavuleni.

²¹ Iave me Isileli di Yaubada taiauda imiamia. Bonadi bwaiginaeqa imwasana ivo, ‘Mwaqitana gumanina da Kini.’ Ge tamo veviqa wete mwau inamaieni me Isileli waidie, gumanidiavo Iakobo tubuleleleqinavo.

²² Iave Itipitaeqa ikewaluguaqetedi, Naveluluna me Isileli paipaidi mesaida bulumakau dabadabana natudiavo iekisabodebodedi.

²³ Beqa tomo'otoqa ge kadisala me Isileli inavulataqonidi, Balau wete bwaqavu beqa ge kadisala me Isileli inakavekapoidi. We katumapu tomo'otoqa me Isileli paipaidi inavesipupu inavo, ‘Kwakiseni, saku bwaigiotoqina Iave ivalabubuni tomo'otoqanidiavo paipaidi.’

²⁴ We me Isileli diveluluna mesaida laioni vavinena dabadabana. Kago inadabaqa ge kanasala inavekwada kanaketoava kanakaisaya inaovai, Dayaqina inayemuya wete inakania. Mulineye inaketobala inaveyawai.”