Wawa 21 - Maiadomu

Mosese kainumu bilonisi beqa baisoa ivalabubuni

⁴ Me Isileli Koya Owa waineye itauya kedeye inaqo Ligwagwa Yamoyamoina waineye, we ge idalugu Edomu dikabaloina waineye, we kaia ikapavivilimo. We dinaqonina kaniakwanina waineye tomo'otoqa ikabiawa kadikapoka ioqala ge kadisala inakalamaqiqita.

⁵ Beqa Yaubada wete Mosese ibwaduyedi ivo, “Uvale Itipitaeqa kukewaluguaqetema kumaiema pwayapwayamaiqe kakaiwapa? Kima ge mekama beledi wete ge mekama bwasi we mana dede kapoidi ge wayaqima.”

⁶ Matautauda Iave baisoa siwasiwayadi ivetunedi waidie, tomo'otoqanidiavo iovadi we me Isileli puedi ivekalawapawapa.

⁷ Tomo'otoqa matatabudi imai Mosese waineye ivesipupu ivo, “Kima kapoina kavalabubuni paina Iave wete komu kabwaduyemi. Kivelaukui Iave waineye baisoa inakewayavuleni waimeye'eqa.” Beqa Mosese ivelaukui tomo'otoqanidiavo paipaidi.

⁸ Matautauda Iave Mosese ivoneni ivo, “Baisoa siwasiwayana kanununa kuvalabubuni welavi kuvetovoia tabwaneye kuyatoi. Kago aitoi baisoa inaovai inakisalaga kanununina inakiseni inavegiagiamai.”

⁹ Beqa Mosese baisoanina kainumu bilonisi beqa ivalabubuni welavi ivetovoia tabwaneye iyatoi. We kago aitoi baisoa inaovai inakisalaga kanununina inakiseni inavegiagiamai.

Me Isileli inaqo Moabe

¹⁰ Me Isileli itauya inaqo Oboti waineye ivebaekwa.

¹¹ Oboti waineye'eqa itauya inaqo valavala nakabalagaqeta Aie-abalimu pwayapwayamaiqe, Moabe kanakabavekakava waineye ivebaekwa.

¹² Wete me Isileli itauya inaqo Seledi kawagova waineye ivebaekwa.

¹³ Matautauda no waineye itauya inaqo Bwasi Anoni vikaineye ivebaekwa pwayapwayamaiqe, me Amoli divikai vivineye. Bwasi Anoni iulaula me Moabe wete me Amoli divikai kanakabavekakava gamwaneye.

Me Isileli Kini Sioni ivelulunapeleni

²¹ Matautauda me Isileli valea ivetuneni inaqo Amoli di Kini Sioni waineye ivesipupu ivo,

²² “Kima wayaqima mupwayapwaya waineye kaibala we ge kaivesikaqala mitanoqa o mi oine kaditanoqa naqedie wete ge kamubwasieqa kaiyemu. We kima Kini Nakedeye kainaqomo kanaketoava mupwayapwaya kaikiaweni.”

²³ We Kini Sioni me Isileli ge idatagwanedi napwayapwaya waineye inabala. We natolauqaviavo iqolekauqidi taiauda inaqo pwayapwayamaiqe, Iasi taoni waineye me Isileli ibabanedi taiauda ivetalaqa.

²⁴ We me Isileli Kini Sioni wete natolauqaviavo ivelulunapeledi kepataeqa ileodi. Dipwayapwaya ikewai Bwasi Anoni waineye'eqa inaqo kanaketoava Bwasi Iaboka waineye. Beqa me Isileli ge inaveqanaqo paina me Amomoni divikai kanakabavekakava iekisabodebodeni wete ikalai gileu beqa pakalidi wete kaniakwanidi.

²⁵ Me Isileli me Amoli ditaoni iluguya ikewadi waidie imiana, ditaoni bwaigina Esiboni wete ditaoni siaidi matatabuna waidie imiana.

Me Isileli Kini Ogi ivelulunapeleni

³¹ We me Amoli dipwayapwaya me Isileli ikewai waineye imiana.

³² Mulineye Mosese tokisavetovetonova ivetunedi inanaqo Iesa taoni inakisavetovetonovi. Matautauda me Isileli ilugu taoninina ikavikavini wete taoni siaidi matatabuna ivelauvivilidi, me Amoli no waineye imiamia ikwavinedi.

³³ Matautauda isiviladi inaqo Basani kanakedeye. We me Basani di Kini Ogi wete natolauqaviavo imai me Isileli taiauda inavetalaqa Edeleni taoni waineye.

³⁴ We Iave Mosese ivoneni ivo, “Ge kigololo Yau Kini Ogi natomo'otoqavo matatabudi wete napwayapwaya ayatoyatodi dimamue. Base me Amoli di Kini Sioni, gumanina Esiboni taoni waineye iloloina, kuluvewapai wete mesaida komu kanasala Kini Ogi kiluvewapai.”

³⁵ Beqa me Isileli Kini Ogi, natunavo wete natolauqaviavo matatabudi iluvewapadi. We ge tamo aitoi meyawaina idamiamia. Matautauda napwayapwaya ikewai.