Wawa 20 - Maiadomu

Miliama iwapa

¹ Wetaki gumegumetana waineye me Isileli matatabudi ilekwa Sini Pwayapwayamaiqe, Kedesi taoni waineye imiamia. No waineye Miliama iwapa itavunidi.

Me Isileli Mosese ibwaduyeni

² We pwayapwayamaiqanina bwasi gebuka yoko bwaigina paipaidi beqa me Isileli matatabudi mekadikapoka iyoko Mosese wete Eloni taiauda ivekawalagalaga.

³ Mosese ibwaduyeni ivo, “Kima kamalaubwaina base kadawapa tatamavo taiauda tutuyanina iwapa Iave mataneye.

⁴ Uvale Iave natomo'otoqavo kumaiema dede pwayapwayamaiqa waineye kaiwapa makaisayavo taiauda?

⁵ Wete uvale Itipitaeqa kukewaluguaqetema dede vikainina kapoina waineye? Kababagula ge giamaina beqa ge kanasala modaba, witi, gulepa wete tupwaidiavo kaivuavuaqa kaibagulidi, wete dede waineye ge tamo bwasi kabayemu idakenokeno.”

⁶ Beqa Mosese wete Eloni tomo'otoqa matatabudi ikiawedi itauya inaqo Ukweta Maqemaqetana kawaneye maiqidieqa ilaukabubu pwayepwayeye. We Iave mata'udu'udulina ilausimatala waidie.

⁷ Iave Mosese ivoneni ivo,

⁸ “Mu'utoqana kukewai tatamu Eloni taiauda tomo'otoqa matatabudi kwaiqolekauqidi. Tomo'otoqanidiavo matadie gileu kivoneni bwasi inaketo'iwaqa. Dede mesaida komi gileunina waineye bwasi kwaikewaluguaqeteni beqa tomo'otoqa matatabudi wete dikaisayavo inayemu.”

⁹ Beqa Mosese inaqo Ukweta Maqemaqetana waineye utoqana ikewai mesaida Iave ivoneni.

Mosese gileu inigei

¹⁰ Mosese wete Eloni tomo'otoqa matatabudi iqolekauqidi imai gileu bwaigina mataneye itovoi we Mosese itakalidi ivo, “Komi tolaudebalagava, kwavekwada aivonemi! Banikodiqa, ilaubwainema kima kago gileu dede waineye bwasi kaikewaluguaqeteni kwaiyemu?”

¹¹ Mosese dimana isilagai nakainige kailuqa gileunina waineye na'utoqanaeqa, we bwasi isauyeni iketo'iwaqa. Tomo'otoqa matatabudi wete dikaisayavo taiauda iyemu.

¹² We Iave Mosese wete Eloni ivonedi ivo, “Paina mivetumaqana imwea, Yau maqemaqetagu ge kwadavekaivevenegu me Isileli matadie, beqa komi dede tomo'otoqanidiavo ge kwaimaiedi pwayapwayanina Yau aveleveledi waineye.” Dede valabubunanina isauyeni vikai kanawavaqa Meliba waineye. Meliba kananuakawananaqai 'vekawalagalaga' paina no waineye me Isileli Iave taiauda ivekawalagalaga.

Eloni iwapa

²³ Koya Owa waineye wete me Edomu dipwayapwaya kanakabavekakava vivineye, Iave Mosese wete Eloni ivonedi ivo,

²⁴ “Komi guvona ge kwadavekimataneni Meliba bwasi waineye, beqa Eloni ge inalugu pwayapwayanina me Isileli aveleveledi waineye. We gumanina yawaina inakakava tubunavo mulidie inanaqo

²⁵ Eloni wete natuna Eliesa taiauda kilagavedi Koya Owa waineye.

²⁶ Matautauda Eloni kanakaleko kabavelomu kwaisitakidi natuna Eliesa kwaivekweseni. We no waineye Eloni inawapa tubunavo mulidie inanaqo.”

²⁷ Beqa Iave Mosese ivoneni mesaida ivalabubunedi. We tomo'otoqa matatabudi matadie kadikaitonu ilaga Koya Owa waineye.

²⁸ Matautauda Mosese Eloni kanakaleko kabavelomu isitakidi beqa natuna Eliesa ivekweseni. We Eloni koya tabwaneye iwapa. Matautauda Mosese wete Eliesa koyeye'eqa iobuma.

²⁹ Tutuyanina waineye me Isileli matatabudi Eloni ikisakavai, itaitaiqa kaiata 30 naqedie.