Wawa 13 - Maiadomu

Tokisavetovetonova 12 Kenani pwayapwayana ivetonovi

¹ Iave ivesipupu Mosese waineye ivo,

² “Me Isileli manuqa 12 tamoqana tamoqana waidie'eqa togumeta kuvesinuedi, we kuvetunedi inanaqo Kenani pwayapwayana inakisavetovetonovi, pwayapwayanina akakalaqeieni me Isileli waidie.”

³ Beqa Mosese Iave navona matatabuna ivalabubunidi we tokisavetovetonova 12 ivesinuedi me Isileli manuqa tamoqana tamoqana kaditogumetavo waidie'eqa. Ikakava, matautauda dibaekwa Palana Pwayapwayamaiqa waineye'eqa ivetunedi itauya.

¹⁷ Tutuyanina Mosese tokisavetovetonova ivetunedi Kenani inakisavetovetonovi ivesipupu ivo, “Kwainaqo Negevi Pwayapwayamaiqa waineye kwaibala wete kwailaga koya siaidi divikai waidie.

¹⁸ Vikainina kwaikiseni wete tomo'otoqa imiamia waineye kwaiyagovidi veluvelulunidi o bwalobwalogodi, kadiyoko bwaigina o siaina.

¹⁹ We dipwayapwaya kwaikiseni, giamaina o kapoina? Ditaoni kwaikiseni gileueqa ikaladi pakalidi kaniakwanidi o dibaekwanina kawasasamaiqe?

²⁰ Pwayapwayanina kwaiyagovi kababagula giamaina o gilegileuna? No waineye welavi o gebuka? We kisavetovetonova kwaivekakava kwaivekautovona pwayapwayanina vuana sulidi sulidi kwaimaiedi.” (Dede gumaqa kanakaiata beqa gulepa ivelamu bwabwaku.)

²¹ Beqa itauya inaqo pwayapwayanina matatabuna ivetonovi ivelamu Sini Pwayapwayamaiqa waineye'eqa inaqo tamo taoni kanawavaqa Leobi waineye, taoni Lebo Amata vivineye.

Tokisavetovetonova ivila imai divalea ivesipupuyeni

²⁵ Kaiata 40 kanakabavekakava waineye, tokisavetovetonova pwayapwaya ikisavetovetonovi ikakava ivila imai dibaekwa waineye.

²⁶ Beqa imai Mosese, Eloni wete me Isileli matatabudi imiamiana Kedesi waineye Palana Pwayapwayamaiqe. Tutuyanina tokisavetovetonova ilekwa tomo'otoqa matatabudi ivonedi pwayapwayanina paipaina wete ivevedi kaivuavuaqanidiavo pwayapwayanina waineye ikewadi imaiedi.

²⁷ Tokisavetovetonova Mosese ivoneni ivo, “Komu kuvetunema kanaqo no pwayapwayanina waineye. We pwayapwayanina guyoguyona, tanoqa giamaidi wete kaisaya pueotoqidi. Sideqoidi kaivuavuaqanidiavo no vikainina waineye kakewadi kamaiedi.

²⁸ We tomo'otoqa no pwayapwayanina waineye imiamiana veluvelulunidi, we ditaoni bwaigidi wete gileueqa ikaladi kaniakwanidi pakalidi. We Anaki tubuleleleqinavo kakisedi no waineye, gumanidiavo kaniakwanidi mesai totoka.

²⁹ We me Ameleki Negevi waineye imiamia, we Ititi, Iebusi wete Amoli tomo'otoqa iekalamia koya siaidi waidie, we me Kenani imiamia kwadewa vivineye wete Bwasi Iolidani doleneye.”

³⁰ We Kelebi tomo'otoqa matatabudi Mosese taiauda itovotovoi iketobodedi inavekwada, we ivesipupu ivo, “Kida kanasala no tomo'otoqanidiavo taivelulunapeledi we pwayapwaya taikewai, beqa deqoina tailaga taikewai dapwayapwaya.”

³¹ We tokisavetovetonova Kelebi taiauda inaqo iwewesa ivo, “Gebuka, no tomo'otoqanidiavo diveluluna isaki matautauda kida, beqa ge kadasala taiauda taivetalaqa.”

³² Beqa valea kapoina me Isileli ivonedi pwayapwayanina ikisavetovetonovi paipaina ivo, “No pwayapwayanina kakiseni meqavoi inamiamia waineye inakavekapoidi. We tomo'otoqa matatabudi kakisedi bwaigiotoqidi wete kaniakwanidi.

³³ No waineye me Nipali mesaida totoka kakisedi, Anaki tubuleleleqinavo gumanidiavo kaniakwani-otoqidi. We tutuyanina kida taitovoi vividie kadakisa mesaida limwana taunida matadeye wete gumanidiavo matadie.”