Toloina Bwaigidi 2 - Maiadomu

Iosua nawapa mulineye vakai isauyedi

⁷ Me Isileli Iave ivekimataneni Iosua natutuye wete togumetavo tutuaidi giladi imiamia ditutuye. Togumetanidiavo Iave navalabubuna bwaigidi me Isileli paipaidi ikisedi.

⁸ Iave natolituqa Iosua, Nuni natuna, kanadiqaba 110 mulineye iwapa.

⁹ We natomo'otoqavo itavuni napwayepwayeye kanakalaqei Timina-sela taoni waineye, Ipileimu manuqa dikoya siaidi, kotalaeqa (noti) Koya Ga'asa waineye.

¹⁰ We tutuyanina no lagatanidiavo matatabudi iwapa-kakava, lagata kaivauna ilagama Iave ibavuyeni wete navalabubuna bwaigidi me Isileli paipaidi ge idayagovi.

¹¹ Beqa me Isileli kapoina ivavalabubunidi Iave mataneye Ba'ala tokwalui waidie isobwasobwanu.

¹² We Iave tubudiavo di Yaubada itunukubui, gumanina tubudiavo ikewaluguaqetedi Itipitaeqa. Kemapu inaqo yaubada katupoe waidie isobwasobwanu, tomo'otoqanidiavo vividie imiamia diyaubadavo, beqa Iave kanakapoka ioqala.

¹³ Me Isileli Iave ivedumwekaikaieni we Ba'ala wete Asitoloti waidie isobwanu.

¹⁴ We Iave kanakapoka ioqala-otoqa me Isileli waidie. Beqa ikalaqeiedi kadiqaviavo waidie disakuvo inavainaqodi wete itagwanedi kadiqaviavo waidie, gumanidiavo vividie imiamia we ge kadisala inatovoi taunidi inakaibodebodedi.

¹⁵ Tutuyanina me Isileli inanaqo inavetalaqa, Iave kadiqaviavo igiaveluvelulunidi beqa me Isileli ielulunapeledi, kaia base mesaida ivonadabadaba ikaimatavuloqidi. Beqa veviqa wete mwau bwaigina ibababanedi.

¹⁶ Matautauda Iave toloinavo bwaigidi ivetovoidi me Isileli inaketoyavudi tovainaqo wete tokainige waidie'eqa.

¹⁷ We me Isileli ditoloinavo bwaigidi divona ge idanoqaidi, beqa di Yaubada otoqa ibaileni kemapu itagwanedi inaqo yaubada katupoe waidie isobwasobwanu. Base tubudiavo Iave iekimataneni wete naloina iematamatanidi, we dede lagatanidiavo ge mesaida idavalabubunedi we vedimadimanaeqa Iave ivedumwekaikaieni.

¹⁸ Tutuyanina kadiqaviavo me Isileli ileoleodi wete veviqa iveleveledi, tomo'otoqa ibwau Iave waineye we bonadi inoqai. Paina ivenua'ina'inaqeyedi toloina bwaigina iveledi. Toloinanidiavo tamoqana tamoqana ilabilabinidi beqa giladi meyawaidi Iave natomo'otoqavo ikeketoyavudi kadiqaviavo waidie.

¹⁹ Tutuyanina toloinanina bwaigina iwapa, me Isileli Iave itunukubui we ivila inaqo divalabubuna tutuaidi waidie. Lagata dede divalabubuna ikapo-otoqa we tubudiavo divalabubuna saiqanaqa. Yaubada katupoe iemuliedi wete waidie isobwasobwanu, beqa divalabubuna kapoidi wete divedeba-pakala ge wayaqidi inabailedi.