Malika 9 - Maiadomu

¹ Matautauda ivonedi ivo, “Yau avona-mwaqitana, tupwaimiavo dede waineye naqaida kwaikiseni Yaubada nakeda kaivauna menaveluluna natomo'otoqa inaloinedi imaimai, mulineye kwaiwapa.”

Yaubada Ieisu kanakisa isivilavilai

² Kaiata sikisi ikakava, Ieisu, Pita, Iemesa wete Ioni imaseagadi taiauda ilagavedi koya kaniakwanina tabwaneye, we no waineye matadie kanakisa isivilavila.

³ No waineye kanakaleko itatala we inamanamalidi. Ge tamo aitoi pwayepwayeye inalegwai mesaida inatataledi.

⁴ Matautauda Yaubada napalopitavo Ilaitia wete Mosese ilausimatala waidie Ieisu taiauda ivesipupu.

⁵ Beqa Pita ivesipupu Ieisu waineye ivo, “Tovekaivevena, kida dede waineye tamiamia giamaina. Kima ukweta kaitonu kaiyoqonidi tamo komu, tamo Mosese wete tamo Ilaitia paipaimi.”

⁶ Pita, Iemesa wete Ioni igololo bwaigina, beqa ge idayagovi vakai inavesipupuyeni.

⁷ Tutuyanina waineye waumana imai italakapupudi, we Yaubada bonana isauyeni waumana naqeneye'eqa ivo, “Dede Natugu nuapougu gumanina avenapwayeweni, beqa kwavevaneneqeni!”

⁸ We tutuyanina vedimadimanaeqa kanatovemulivo ikisalelele ge tamo aitoi idakiseni taiauda, kaia Ieisu kaisenaqa.

⁹ Tutuyanina waineye koya waineye'eqa iobuobuma iloinedi ivo, “Ge tamo aitoi kwaivoneni vakai kwakiseni koya waineye. Tutuyanina Mwaqitana Kanatomoqo wapaeqa inatovoi-vaituqana, matautauda tomo'otoqa kwaivonedi.”

¹⁰ We paina Ieisu ivekimataneni ge tamo aitoi idavoneni we kaisedi waidie dede mesaida ivesipupuyedi ivo, “Ieisu navona wapaeqa inatovoi-vaituqana, vakai kananuakawananaqai?”

¹¹ Beqa ivelautolieni ivo, “Uvale Mosese naloina kanatovekaivevenavo ivo, ‘Naqaida Yaubada napalopita Ilaitia kawaie inavila inamai pwayepwayeye, matautauda mulineye Mesaia inamai?”

¹² Beqa Ieisu ivo, “We mwaqitana Ilaitia inagumeta inamai vakai puepuena inavalabubunidi Mesaia namai paipaina. We banikodiqa, Yaubada Nabuki waineye ivona paipaigu Yau Mwaqitana Kanatomoqo aiveviqa-otoqa, we tomo'otoqa inavedumwekaikaiegu?

¹³ Yau avona-mwaqitana waimie, Ilaitia gunabeida imai, we tomo'otoqa vakai wayaqidi waineye ivalabubuni. Kaia mesaida basenaqaida Yaubada Nabuki waineye napalopita igililia gumanina paipaina, mesaida gunabeida isauyeni.”

Ieisu vaitabu kapoina ikwavineni gwamana waineye'eqa

¹⁴ We Ieisu mekanatovemulivo kadikaitonu koyeye'eqa ivila iobuma ikisanaqo tupwaidiavo kanatovemulivo ikisedi tomo'otoqa puedi imiakauqedi, we loina kanatovekaivevenavo taiauda iekawadibidibi.

¹⁵ Tutuyanina tomo'otoqa Ieisu ikiseni itoalavunuqidi ilaukwavina inaqo Ieisu waineye ivelavulavuya.

¹⁶ We ivelautoliedi ivo, “Vakai paipaina tovekaivevenavo taiauda kwaekawadibidibi?”

¹⁷ We tomoqo yoko naqedie ibaivila waineye ivo, “Tovekaivevena, vaitabu kapoina natugu iluguya ge kanasala inavesipupu beqa amaieni waimue.

¹⁸ No tutuyanina kago vaitabu kapoina naveluluna inavelamu gwamana naqeneye, inataweni inaobu pwayepwayeye, kawaneye buebue, niqona inaekapaligota we inatotola. Kamutovemulivo avelaukuiedi wayaqigu vaitabu kapoina inakwavineni inasauyeni, we ge kadisala.”

¹⁹ We Ieisu ibaivila waidie ivo, “Komi banikodiqa ge kwadavetumaqanegu? Gunabeida tutuya puena taiauda tamiamia! Tutuya kaivia akalamaqiqita paipaimi? Gwamana kwamaseagai kwamaieni waigue!”

²⁰ Beqa gwamana Ieisu waineye imaieni. We tutuyanina vaitabu kapoina Ieisu ikiseni, gwamana naqeneye ivelamu menaveluluna ipetoi, we gwamana wete ibeku iobu pwayepwayeye ivelikolikoko we kawaneye buebue.

²¹ We Ieisu gwamana tamana ivelautolieni ivo, “Malavia dede viqanina ivelamu waineye?” Ibaivila ivo, “Natutuya gwamana waineye ivelamu.

²² Tutuya puena vaitabu kapoina ietumwetumweuyeni itawetaweni kaie wete iobuobu bwasie, paina vaitabu kapoina wayaqina gwamana inaluvewapai. Kago komu kamusala kudavenua'ina'inaqeyema we kudakaivaisema.”

²³ Ieisu waineye ivesipupu ivo, “Banikodiqa kwavo, ‘Komu kamusala?’ We aitoi Yaubada inavetumaqaneni, Yaubada waineye vakai puedi kanasala inavalabubunidi!”

²⁴ We vedimadimanaeqa gwamana tamana iveqole bonana bwaiginaeqa ivo, “Avetumaqana. We guvetumaqana ge bwaigina, beqa kukaivaisegu guvetumaqana inavebwaiga.”

²⁵ We Ieisu yoko ikisedi ivelamu imaimai waineye, beqa vaitabu kapoina iloineni ivo, “Komu gwamana taniqana kukavekuludi ge kanasala inanoqaya, wete meana kukavekapoi ge kanasala inavesipupu. Aloinemu gwamana waineye'eqa kusauyemu ge wete kivila waineye!”

²⁶ Tutuyanina waineye vaitabu kapoina ibwau, gwamana ipetoi menaveluluna matautauda isauyeni gwamana waineye'eqa. Gwamana kanakisa mesaida tomoqo wapana, beqa tomo'otoqa puedi ikiseni ivo, “Gwamana gunabeida iwapa!”

²⁷ We Ieisu dimaneye ikavikavini isivetovoia.

²⁸ Mulineye Ieisu inaqo vanuqe ilugu matautauda kanatovemulivo kaisekavadi ivelautolieni ivo, “Uvale, kima ge kanasala vaitabu kapoina kaikwavineni inasauyeni?”

²⁹ We ibaivila ivo, “Dede vaitabunidiavo kapoidi ge kanasala taikwavinenidi inasauyeni, kaia kago taivelaukuimo mulineye inasauyeni.”

Ieisu ivesipupu-vaituqana nawapa paipaina

³⁰ We Ieisu mekanatovemulivo vikai noko ibaileni, itauya inaqo ilugu Galili Polovinisi waineye. Ieisu ge wayaqina meqavoi inayagovi vakaiebei imiamia,

³¹ paina kanatovemulivo waidie iekaivevena ivo, “Kawaie Yau Mwaqitana Kanatomoqo kaguqaviavo inaketoqiluvegu, tomo'otoqa dimadie gumanidiavo inaluvewapagu, we kaiata kaitonu inakakava wapaeqa aitovoi-vaituqana.”

³² Dede mesaida ivesipupuyedi we navona ge idanuakawananaqaia, we igololo ge idavelautolieni paipaina.

Apositolovo ediavo taiauda iekawadibidibi aitoi gumanina kanawavaqa bwaigina

³³ We Ieisu mekanatovemulivo Kapeneumi waineye ilekwa tamo tomoqo navanuqe ilugu matautauda ivelautoliedi ivo, “Komi kedeye vakai kwaekawadibidibieni?”

³⁴ Kedeye ediavo taiauda iekawadibidibi ivo, “Aitoi gumanina kanawavaqa bwaigina waideye'eqa?” Beqa, ge tamo vakai idavesipupuyeni waineye.

³⁵ Tutuyanina waineye Ieisu imiabui, apositolovo 12 iqoledi imai waineye, matautauda ivesipupu waidie ivo, “Aitoi wayaqina inavetogumeta, taunina inasiobuyeni inavemuli-otoqa we inavetolituqa enavo paipaidi.”

³⁶ We gwamana ikewai gamwadie isivetovoia dimanaeqa gwamana iloaqavuya ivonedi ivo,

³⁷ “We aitoi gwamana dede mesaida inavonamwasamwasaneni kaguwavaqaeqa, wete Yau inavonamwasamwasanegu, we ge Yau kaisegu, wete gumanina ivetunegu inavonamwasamwasaneni.”

Aitoi gumanina ge kadatalavuala gumanina kadayoko

³⁸ Ioni Ieisu ivoneni ivo, “Tovekaivevena, kima tamo tomoqo kakiseni kamuwavaqaeqa vaitabu kapoidi ieuqeuqedi, we paina gumanina ge kadayoko, beqa kaketobodeni kavoneni kavo, ‘Ge mesaida kivalabubunedi.”

³⁹ We ivo, “Tomoqo ge kwaiketobodeni. Ge tamo aitoi kabanuavilele inavalabubunidi kaguwavaqaeqa, we vedimadimanaeqa inavona-kapo paipaigu.

⁴⁰ Aitoi gumanina ge kadatalavuala, gumanina kadayoko.

⁴¹ Avona-mwaqitana waimie, beqa kago aitoi siaina inakaivaisemi paina komi kagutovemulivo, mesaida tupwaidiavo bwasi inagoia inavelemi, kanabaivila ge inavuyo kaia inababaneni.”

Vona ketotovona paipaina

⁴² We Ieisu ivesipupu ivo, “Kago aitoi inavetumaqanegu mesaida dede gwamana siaina, we tamo tomoqo inaweweseni kapoina waineye inabeku, Yaubada tomoqonina kaimatavuloqa inaveleni. We kago gileu tageyoina kodoneye inalaipweni ligwagweye inataweni inaobu, we no kaimatavuloqanina ge bwaigina.

^43-44 Kago dimamu inawewesemu kapoina waineye kibeku, kugusuyavuleni. Beqa giamaina dimamu tamoqana ge idakenokeno beqa kanasala yawaina vaqata kibabaneni, we guvalaiawa dimamu kailuqa taiauda Kaiyabeyabela waineye kinaqo, kainina ge menakakava.

^45-46 We kago kaqemu inawewesemu kapoina waineye kibeku, kugusuyavuleni. Beqa giamaina kaqemu tamoqana ge idakenokeno beqa kanasala yawaina vaqata kibabaneni, we guvalaiawa kaqemu kailuqa taiauda inatawemu Kaiyabeyabela waineye kiobu.

⁴⁷ Kago matamu inawewesemu kapoina waineye kibeku, kukewayavuleni. Beqa giamaina matamu tamoqana Yaubada Nakabaloina waineye kiluguveni kimiamia, we guvalaiawa matamu kailuqa taiauda inatawemu Kaiyabeyabela waineye kiobu.

⁴⁸ No vikainina waineye, “ ‘Mwatamwata tomo'otoqa ikanikanidi ge inawapa, we kai ge inakweu.’

⁴⁹ “We kagutovemulivo puepuedi mwau inababanedi kabaketotovona waidie kadilautovona mesaida kai, beqa no waineye inakavegumaqidi.

⁵⁰ “We ligwagwa saku giamaina, we kago naveluluna wete kanavebae inakakava ge kadasala wete taiveligwagwa-vaituqana. Kago komi kwaivekawadibidibi wavaqa bwaigina paipaina, beqa komi mesaida ligwagwa kanavebae inakakava. We ge mesaida, we mesaida kanikani ietavoqi ligwagwa beqa—kwaimiagiagiamai emiavo taiauda.”