Malika 8 - Maiadomu

Ieisu tomo'otoqa 4,000 ivekanidi

¹ Tutuyanina waineye yoko bwaigina imai imiakauqa ge mekadi beqa Ieisu kanatovemulivo iqoledi imai waineye ivonedi ivo,

² “Yoko dede taiauda tamiamia gunabeida kaiata kaitonu ge mekadi beqa avenua'ina'inaqeyedi.

³ Kago mesaida aivetunedi inanaqo divanuqe mekadilase kedeye inabeku. Wete mesaida tupwaidiavo malave'eqa imai.”

⁴ We kanatovemulivo ibaivila waineye ivo, “Ge tamo aitoi dede waineye idamiamia. Vakaiebei beledi taikewadi tomo'otoqa taivekanidi?”

⁵ Matautauda ivelautoliedi ivo, “Kaivia beledi waimie?” We ibaivila ivo, “Beledi 7.”

⁶ Beqa yoko ivonedi pwayepwayeye imiabui beledi 7 ikewadi ivelaukui Yaubada waineye. Matautauda beledi igiatomwai ikalaqeiedi kanatovemulivo waidie yoko inavekanidi.

⁷ Wete iqana siaidi tupwaidiavo ikenokeno ikewadi ivelaukui paipaidi Yaubada waineye. Matautauda kanatovemulivo ivonedi ivo, “Yoko kwaveledi inakani.”

⁸ We tomo'otoqa puedi ikani ikabiawa. We kanatovemulivo nigila igwagwadi ginae 7 iveadaqidi.

⁹ No waineye tomo'otoqa kadiyoko mesaida 4,000 Ieisu ivekanidi. Mulineye ivetunedi inaqo divanuqe.

Palisivo ivelautoli Yaubada nakiakiaya paipaina

¹⁰ Tutuyanina waineye vedimadimanaeqa Ieisu idodoqa waga waineye kanatovemulivo taiauda inaqo Dalimanuta Polovinisi waineye.

¹¹ No waineye tupwaidiavo Palisivo imai ivekaiwewewena taiauda. Wayaqidi Ieisu inavekautovoni beqa ivelautolieni ivo, “Kima wayaqima kiakiaya kabanuavilele Yaubada waineye'eqa imai kivevema.”

¹² Ieisu nuapouna iveviqa ikalayawaina ivo, “Vakai paipaina komi lagata dede kwaelautoliegu tamo kiakiaya aivalabubuni paipaimi? Aivonemi mwaqitana, ge kiakiaya aivalabubuni kwaikiseni.”

Ieisu kanatovemulivo iloina-pakaledi Palisivo wete Elodi divalabubuna kapoidi paipaidi

¹³ Matautauda Ieisu mekanatovemulivo Palisivo ikiawedi ivila inaqo wageye idodoqa inabala mali vikaie Waya Galili waineye.

¹⁴ We kanatovemulivo nuadi ivulu beledi ge idakewadi, we beledi tamoqana wageye.

¹⁵ Tutuyanina waineye Ieisu iloinedi ivo, “Kwavekisabodebodemi Palisivo wete Elodi di'isiti ge waineye kwaisikwana.”

¹⁶ We kanatovemulivo kaisekavadi waidie iesipupu vakai Ieisu gunabeida ivesipupuyeni waidie paipaina ivo, “Beledi ge tadakewadi beqa isiti paipaina iesipupu.”

¹⁷ We Ieisu iyagovi vakai iesipupuyeni ivonedi ivo, “Banikodiqa, kwaenuanedi we mesaida kwavo beledi ge tamo kadakewai? Komi giladi ge kwadanuakawananaqaia paipaigu! Nuami tabodadi ge idakawabwegabwegadi!

^18-19 Komi mematami we ge kwadakisa-vekavekaia! Komi metaniqami we ge kwadanoqaya-vekavekaia! Kwanuani vakai avalabubunidi base beledi 5 agiatomwai akalaqeiedi 5,000 tomo'otoqa kadiyoko avekanidi. We kaivia nigila meginaedi kwaveadaqidi?” We ibaivila ivo, “Ginae 12.”

²⁰ Matautauda ivelautoliedi ivo, “No tutuyanina beledi 7 agiatomwai akalaqeiedi 4,000 tomo'otoqa kadiyoko avekanidi, kaivia ginae nigila kwaveadaqidi?” We ibaivila ivo, “Ginae 7.”

²¹ Matautauda ivonedi ivo, “Banikodiqa, giladi ge kwadanuakawananaqaia vakai avesipupuyeni?”

Betisaida waineye Ieisu tomoqo matana pwalupwaluna ikavegiagiamaia

²² Matautauda Ieisu mekanatovemulivo inaqo Betisaida taoni waineye. No waineye tupwaidiavo tomo'otoqa tomoqo matana pwalupwaluna imaieni waineye ivelaukuieni wayaqidi inakavikavini inakavegiagiamaia.

²³ We Ieisu tomoqo matana pwalupwaluna dimaneye ikavikavina iluguaqeteni taonieqa. Matautauda tomoqo matana igiwalidi, dimana iyatoi matana waidie ivelautolieni ivo, “Kanasala vakai kikisedi?”

²⁴ Tomoqo ikisalagata ivo, “Tomo'otoqa akisedi mesaida welavi iekalatauya.”

²⁵ We Ieisu dimana iyato-vaituqani tomoqo mataneye, matautauda tomoqo matana ikisalagata ivegiagiamai ikisa-vekavekai.

²⁶ Matautauda ivesipupu ivo, “Ge kinaqo taoni bwaigina waineye tonotonovina kuvila kunaqo muvanuqe.”

Pita ivesipupuyeni Ieisu gumanina Mesaia

²⁷ Matautauda Ieisu mekanatovemulivo Galilieqa inaqo taoni siaina Sisalia Pilipai taoni bwaigina vivineye. Tutuyanina itauya inaqonaqo kedeye ivonedi ivo, “Banikodiqa, tomo'otoqa iesipupu nigodibei Yau aitoi?”

²⁸ We ibaivila ivo, “Tupwaidiavo tomo'otoqa iesipupu ivo, ‘Oge Ioni Tobabitaiso,’ tupwaidiavo iesipupu ivo, ‘Oge Yaubada napalopita Ilaitia gumanina basenaqaida imiamia,’ we tupwaidiavo iesipupu ivo, ‘Oge Yaubada napalopita basenaqaida imiamia iyawasa-vaituqana.”

²⁹ Matautauda ivelautoliedi ivo, “We komi, banikodiqa kwaesipupu nigodibei Yau aitoi?” Pita ibaivila ivo, “Komu Mesaia!”

³⁰ Matautauda iloinedi ivo, “Ge kanasala tamo aitoi kwaivoneni Yau paipaigu kwanavo ‘Gumanina Mesaia.”

Ieisu kanatovemulivo ivonedi kawaie inawapa

³¹ Matautauda ivelamu kanatovemulivo waidie ivesipupu vakai inasauyeni waineye paipaina. Ivo, “Yau, Mwaqitana Kanatomoqo, aiveviqa bwaigina, matautauda Diu tomoqovo bwaigidi, tovelomuvo bwaigidi wete Mosese naloina kanatovekaivevenavo inavedumwekaikaiegu. We kaguqaviavo inaluvewapagu, we kaiata kaitonu inakakava wapaeqa aitovoi-vaituqana.”

³² Dede mesaida iesipupuyedi inuakawananaqai beqa Pita ikewaluguaqeteni saiqanaqa iveqanaqo ivoneni bonana veluveluluninaeqa ivo, “Komu ge muwapa paipaina kivesipupu-luguaqeta!”

³³ We itunuvilai kanatovemulivo ikisedi Pita ivoneni bonana veluveluluninaeqa ivo, “Seitani, kuveqanaqo waigue'eqa! Komu munuanua ge mesaida Yaubada nanuanua, we komu tomo'otoqa dinuanuana mesaida.”

Ieisu kanavemuli kananuakawananaqai

³⁴ Matautauda Ieisu yoko iqoledi wete kanatovemulivo taiauda imai vivineye waidie ivesipupu ivo, “Kago komi wayaqimi kwaivemuliegu, taunimi migiamaina kwaibailedi, we kamilaukenobalabala kwaikewai kwaikavalai matautauda kwaivemuliegu.

³⁵ Aitoi wayaqina yawaina inavekokoleni, ge wayaqina yawaina inatagwaneni paipaigu, yawaina vaqata inakaivuyovuyoi. We aitoi inavemuliegu Guvalea Giamaina inavekimataneni yawaina inakaivuyovuyoi yawaina vaqata inababaneni.

³⁶ Kago aitoi saku puepuena giamaidi inakewadi pwayapwaya waineye, no sakunidiavo ge inakaivaiseni yawaina vaqata inakewai.

³⁷ Paina kago tomoqo yawaina vaqata inakaivuyovuyoi, ge kanasala mane'eqa o tupwaidiavo saku beqa inatakonai wete inakewavileni.

³⁸ Komi lagata dede waineye kwamiamia taunimi mikedakeda kwaemuliedi ge kwadavekimatana-vekavekaiegu, beqa komi mesaida tomo'otoqa gumanidiavo gimala ivalabubunidi wete tupwaidiavo saku kapoidi ivavalabubunidi. Kago aitoi lagata dede waineye inavovomayamayaqegu we guvekaivevena inavovomayamayaqedi kawaie Yau, Mwaqitana Kanatomoqo, gumanina aivovomayamayaqeni tutuyanina aivila aimai pwayapwaya dede waineye Tamagu mata'udu'udulinaeqa wete na'anelosevo maqemaqetadi taiauda.”