Malika 7 - Maiadomu

Yaubada naketoboda bwaigiotoqina mulineye me Diu tubudiavo diketoboda

^1-4 Palisivo wete me Diu puedi tubudiavo divalabubuna iemuliedi. Kadivedi, bwasi kabagoi wete nau inalegwa-vekavekaidi beqa Tomwaya mataneye giamaidi. We tutuyanina kabavegimwane'eqa inavila inamai dimadi inalegwa-vekavekaidi dikabakailegwa waineye matautauda inakani. Tutuya puena naqaida dimadi inakailegwa mulineye inakani tubudiavo divekaivevena ietutuyameni. Tamo tutuya Mosese naloina kanatovekaivevenavo Ielusalemaeqa imai Palisivo taiauda Ieisu igamweni ievaneneqeni. Tutuyanina Ieisu ievaneneqeni, we ikisedi kanatovemulivo kadi ikanikani dimadi ge idakailegwa.

⁵ Beqa ivoneni ivo, “Kamutovemulivo ikanikani, we dimadi bwanebwanenedi ge idakailegwa Yaubada mataneye ge maqemaqetadi. Uvale ge tubudavo divekaivevena idavemulieni?”

⁶ Ibaivila waidie ivo, “Komi tokatupoe, nuatabwamieqa nigodibei giamaimi. We base Yaubada napalopita Aisea igililia komi paipaimi. Igililia dede mesaida Yaubada ivesipupu, “‘Tomo'otoqanidiavo dede gabuladieqa ivekimatanegu, we nuapoudi imia kanikie waigue'eqa.

⁷ Taunidi dibubunaeqa iekaivevena, we ivo dede Yaubada naloinaeqa beqa disobwanu ge mekananuakawananaqai wete ge mevuana.”

⁸ Matautauda ivonedi ivo, “Komi, Yaubada naloina kwabaileni, we kaia taunimi mivekaivevena kwaemulieni.”

⁹ Wete waidie ivo, “Komi, kwanuani kwavo kima kavavalabubuna-vekavekai tutuyanina Yaubada naloina kwavedumwekaikaieni, we tubumiavo divekaivevena kwaemuli-vekavekaiedi.

¹⁰ Dede tamo keda banikodiqa kwavalabubunedi noko. Base Mosese igililia Yaubada naloina naqeneye ivo, ‘Tamamu inamu kuvekimatanedi’ wete ‘aitoi tamana wete inana inavona-kapoyedi wayaqina veviqa inaveledi, tomoqonina kwaluvewapai.’

¹¹ We komi dede mesaida kwaekaivevenedi—kago aitoi mane oge saku inakalaqeieni tamana oge inana inakaivaisedi kanasala inavonedi, ‘Yau saku waigue dede kanasala aivelemi inakaivaisemi; we paina gunabeida Yaubada waineye avonadabedabedi, beqa ge kanasala aivelemi.’

¹² Kago no mesaida inavonedi, kwanavo navesipupu giamaina, kwaigiavekwadai nakaivaisa tamana inana waidie.

¹³ Kago dede mesaida kwaivalabubunediqa, tubumiavo divekaivevena kwaemulieni Yaubada naketoboda kwaibaia. Kaia dede mesaida avonemi tamo keda Yaubada naketoboda kwabaia, we puedi keda Yaubada naketoboda wete kwabaidi.”

Vakai kedakedavo tomo'otoqa ikavebwanenedi Yaubada mataneye

¹⁴ We Ieisu tomo'otoqa iqole-vaituqanedi, we imai waineye waidie ivesipupu ivo, “Puepuemi, kwavevaneneqa-vekavekai, kwaiyagovi guvona kananuakawananaqai.

^15-16 Ge tamo kanikani tomoqo inakania kawaneye inalugu inakavebwanenei Yaubada mataneye. Vakai tomoqo naqeneye'eqa inaluguaqeta kanasala inakavebwanenei Yaubada mataneye.”

¹⁷ Matautauda Ieisu tomo'otoqa ikiawedi ilugu vanuqe kanatovemulivo ivelautolieni ivo, “Vakai vonawakedubala kananuakawananaqai kasiotoqa kuvesipupuyeni?”

^18-19 Ibaivila ivo, “Banikodiqa? Ge kwadayagovi dede kananuanuana guvona? Nuami ikawananaqaidi oge gebuka? Tomoqo kanikani inakania, ge inanaqo nuapouneye, we inanaqo gamoneye inasauyeni. Beqa ge kanasala inakavebwanenei Yaubada mataneye.” Tutuyanina ivesipupu mesaida ivo, “Kanikani sulidi, sulidi giamaidi Yaubada mataneye ge tamo kanikani inakavekapoida.”

²⁰ Beqa wete ivesipupu ivo, “We vakai tomo'otoqa naqeneye'eqa isauyeni imai, tomo'otoqa ikavebwanenei Yaubada mataneye.

²¹ Dede kedakedanidiavo tomoqo nuapouneye isasauyedi—nuanua kapoidi, naqi kapoidi, vainaqo, tomo'otoqa kadiluvewapa, gimala,

²² vemomogai, vetalavuala ivalabubuni, katupoe, mesaida kaisaya divalabubuna, vedebasagugu, ivona-kapo tomo'otoqa paipaidi, nualaga wete kwavakwavana.

²³ Kedakedanidiavo puena dede iluguaqeta tomoqo nuapouneye ikavebwanenei Yaubada mataneye.”

Vavina Denitali Ieisu ivetumaqaneni

²⁴ Tutuyanina Ieisu Galili ikiaweni inaqo Taia Polovinisi vivineye ilugu tamo tomoqo navanuqa naqeneye. Ge wayaqina tomo'otoqa inayagovi imiamia noko waineye, we ge kanasala inavaigavu.

^25-26 Tamo vavine valeana inoqai gunabeida imai waineye. Dede vavinenidi Denitali, we gumanidi Ponisia Polovinisi Silia waineye itubuqa. We vaitabu kapoina natudi vavinena iluguya iviqa. Beqa imai Ieisu waineye mataneye isobwanu ivelaukui wayaqidi vaitabu kapoina natudi waineye inakwavineni.

²⁷ We Ieisu iyagovi gumanidi ge vavine Diu ivonedi ivo, “Ge giamaina gwagwama kadi aikewai aitaweni koukou waidie inakania, we gwagwama naqaida inakani kadisala.”

²⁸ Vavine ibaivila ivo, “Tomwaya vakai kuvesipupuyeni kanamwaqitana, we koukou somala dibuneye mesaida ikanikanimo gwagwama kadimugumugu iyavuyavuta somala waineye'eqa.”

²⁹ We ivonedi ivo, “Mibaivila waigue giamaina mwaqitana, beqa vaitabu kapoina gunabeida natumi waineye'eqa akewaluguaqeteni, beqa kwavila kwanaqo mivanuqe.”

³⁰ Beqa inaqo divanuqe natudi ikiseni kabakeno waineye ikenokeno. Vaitabu kapoina gunabeida isauyeni.

Ieisu tomoqo taniqana kuluna wete meana daluna ikavegiagiamaia

³¹ Tutuyanina waineye Ieisu Taia navikai ikiaweni inaqo ilugu Saidoni ikiaweni inaqo Galili Waya waineye we Teni Kawalawa (Dekapolisia) divikaie.

³² Noko waineye tamo tomoqo taniqana kuluna wete meana daluna tomo'otoqa imaieni waineye, ivelaukuieni wayaqidi dimana inayatoi waineye inakavegiagiamaia.

³³ Tomoqo ivegumetai kadikailuqa inaqo tomo'otoqa waidie'eqa kaisedi, we dimana iyatodi tomoqo taniqana kailuqa naqedie. Matautauda dimana waineye igiwala tomoqonina meana ikavikavini.

³⁴ Tutuyanina meana ikavikavini ikisalaga abame ikalayawaina ivesipupu ivo, “Epata!” Kananuanua, “Kwakawabwegami!”

³⁵ We vedimadimanaeqa tomoqo taniqana ikawabwegadi, meana ipeto ivesipupu-vekavekai.

³⁶ Beqa Ieisu ge idatagwanedi tali tomo'otoqa waidie inavesipupu vakai isauyeni paipaina. Vona veluveluluninaeqa ivonedi, we ge navona idanoqai kaia tomo'otoqa puedi ivonedi banikodiqa Ieisu tomoqo taniqana kuluna wete meana daluna ikavegiagiamaia.

³⁷ Tutuyanina tomo'otoqa vona inoqai Ieisu paipaina itoalavunuqidi ivo, “Ieisu saku puena ivalabubunidi giamaidi. Tomo'otoqa taniqadi kuludi ikavegiagiamaidi inoqaya, wete tomo'otoqa meadi daludi ikavegiagiamaidi ivesipupu.”