Malika 6 - Maiadomu

Me Nasaleta Ieisu ivedumwekaikaieni

¹ Ieisu mekanatovemulivo ivila-vaituqana inaqo taunina kanatuvadeye nakabataulai waineye.

² Kaiata Kabaveyawai waineye Ieisu sinagogi naqeneye ivelamu iekaivevena. Tomo'otoqa puedi no waineye imiamia we tutuyanina inoqai nuadi ivilele. Kaisekavadiqa ediavo ivelautoliedi ivo, “Nanuauya puena dede vakaiebei ikewai?” we “Banikodiqa nayagova bwaigina?” wete “Banikodiqa no imai mesaida kabanuavilele ivavalabubunidi?”

³ Kaisekavadiqa ivesipupu ivo, “Dede kaia tokaiyoqona, Meli natudi we Iemesa, Iosepa, Iudasa wete Saimoni tatadi. We novunavo kaniabadi taiauda tamiamia.” Beqa ivedumwekaikaieni ge wayaqidi inavetumaqaneni.

⁴ Ieisu waidie ivesipupu ivo, “Malitomo'otoqa Yaubada napalopita ivekimatanedi we tomo'otoqa taunidi divanuqe wete disusuvo ge idavekimatanedi.”

^5-6 Tomo'otoqa ge idavetumaqaneni, beqa nuana ivilele. Ge kanasala tamo vakai kabanuavilele inavalabubunidi no waineye, we kaia tomo'otoqa waidie dimana iyatodi ikavegiagiamaidi no vikainina waineye. Matautauda ikakapavivila taoni waidie iekaivevena tomo'otoqa waidie.

Ieisu kanatovemulivo kadikuma 12 ivetunedi inavekaivevena taoni waidie

⁷ Ieisu kanatovemulivo kadikuma 12 iqoledi imai waineye ivetunedi kadikailuqa kadikailuqa inaqo taoni sulidi sulidi waidie. We veluluna iveledi vaitabu kapoidi inavelulunapeledi

⁸ we iloinedi ivo, “Ge tamo vakai kwaikewai mitauyanina waineye kaia miutoqana—kanikani, kaleko meyawanina wete mane kamiyawana waidie gebuka.

⁹ Kamikaqeyapayapa kwaisilagaidi, we ge tamo kaleko kwaikewai.”

¹⁰ We ivonedi ivo, “Vakai taoni waineye kwainaqo kago inamwasanemi, tamo tomoqo navanuqe taiauda kwaimiamia kaiatanidiavo kadimatatabu kanaketoava taoninina kwaikiaweni.

¹¹ We kago kwaimai taoni waidie kaditomo'otoqa ge inamwasanemi wete bonami ge inanoqai, kwaikiawedi, we kamikaqeyapayapa kaupualina kwaitutuvutuqidi inaobu. Beqa no dikabakisa waidie inanuavila!”

¹² Beqa isauyedi tomo'otoqa waidie ilalauguguya ivo, “Mikapoina waidie'eqa kwainuavila, we kwaisivilami Yaubada waineye.”

¹³ We vaitabu kapoidi iloinedi isauyedi, we bunamana olibe beqa toviqa puedi kunukunudi i'iwaqidi ivegiagiamai.

Kini Elodi nanuanuana Ieisu gumanina Ioni Tobabitaiso

^14-16 Tutuyanina waineye vikai puena waidie tomo'otoqa Ieisu paipaina iesipupu, paina gunabeida kanawavaqa valeana isapayavuleni. Tupwaidiavo tomo'otoqa iesipupu ivo, “Oge gumanina Ioni Tobabitaiso wapaeqa itovoi-vaituqana beqa kanasala kabanuavilele inavalabubunidi.” Wete tupwaidiavo iesipupu ivo, “Oge gumanina Ilaitia ivila-vaituqana imai.” Wete tupwaidiavo ivo, “Oge gumanina tamo Yaubada napalopita mesaida basenaqaida Yaubada napalopitavo imiamia.” We Kini Elodi valea dede inoqai Ieisu nalituqa paipaina we ivo, “Dede Ioni Tobabitaiso! Base tamo tutuya gunabeida tolauqavia avetuneni inaqo kodona igusuya, we deqoina itovoi-vaituqana!”

^17-20 Dede vesipusipupunina. No tutuyanina waineye Ieisu navekaivevena ge idavelamu, we Elodi taina Pilipi mwanena inaqidi vavinenidi kadiwavaqa Elodiasa. Tutuyanina waineye Ioni Elodi waineye ivesipupu ivo, “Komu, ge kanasala taimu mwanena kinaqidi,” beqa Elodi natolauqaviavo ivetunedi inaqo Ioni ikavikavini iyoqoni deli waineye iginoleni. Tutuya puena Elodi wayaqina Ioni inamai waineye taiauda inaesipupu, we tutuyanina Ioni waineye iesipupu Elodi nuana ikapo wete nuana ivilele, paina vakai Ioni ivesipupuyedi nuana ikewai, we wayaqina inaevaneneqeni. Elodiasa kadikapoka ioqala-otoqa Ioni waineye wayaqidi inaluvewapai, we Elodi iyagovi Ioni gumanina tomoqo giamaiotoqina wete tonotonovina Yaubada mataneye beqa igololoyeni we italabodebodeni. No paipaina, Elodiasa ge kanasala Ioni inaketoqiluveni inaluvewapai.

²¹ We tutuyanina Elodi natubuqa patina ivalabubuni, we Elodiasa dikawasasa imai kaiatanina Ioni inaketoqiluveni inaluvewapai. Kaiatanina waineye kanikani ivalabubuni gabemani kaditogumetavo, tolauqavia kaditogumetavo wete Galili Polovinisi kanatomo'otoqavo guyoguyodi paipaidi.

²² Tutuyanina Elodiasa natudi vavinena imai isuya, we Elodi wete kanaulatauvo igiavemwasanidi. Beqa Kini vavinenina kaniabana ivelautolieni ivo, “Vakai wayaqimu? Vakai wayaqimu kanasala aivelemu.”

²³ Ivonadabadaba waineye ivo, “Yaubada waineye avonalaga vakai kivelaukuieni paipaina aivelemu mesaida Yau guvikai mesaida komu.”

²⁴ Matautauda kaniabanina isauyeni inana waidie ivelautoliedi ivo, “Vakai aivelaukuieni?” We inana ibaivila ivo, “Ioni Tobabitaiso kunukununa.”

²⁵ Vedimadimanaeqa kaniabanina ivila inaqo Kini waineye Ioni kunukununa ivelaukuieni ivo, “Sideqoina wayaqigu Ioni Tobabitaiso kunukununa takula waineye kidodoqi kivelegu.”

²⁶ Kini Elodi nuana ikapo, we paina base dikani kanaulatauvo taiauda waineye ivonadabadabaqa beqa ge wayaqina vavinenina inakatupwaieni.

²⁷ Beqa tamo tolauqavia ivetuneni ivoneni ivo, “Kunaqo Ioni Tobabitaiso kodona kugusuya kunukununa kumaieni.” We tamo Elodi natolauqavia itovoi itauya inaqo Ioni kodona igusuya,

²⁸ we kunukununa takula waineye idodoqi imaieni kaniabanina iveleni ikewai inana iveledi.

²⁹ We tutuyanina Ioni kanatovemulivo valeana inoqai, kaiatanina waineye imai Ioni vovona ikewai inaweni ovuye iyatoi, me Diu tubudiavo kaditaumata waineye.

Ieisu tomo'otoqa 5,000 ivekanidi

³⁰ Ieisu na'apositolovo 12 ivila imai Ieisu waineye ivoneni vakai ivalabubunidi wete ivekaivevenedi tomo'otoqa waidie.

³¹ Tutuyanina waineye tomo'otoqa puedi imaimai wete ivilavila beqa Ieisu we kanatovemulivo ge tamo lana idakenokeno inakani. Beqa Ieisu ivonedi ivo, “Komi kaisemiqa kwaimai we yoko taikiawedi tainaqo kwaiveyawai kawalawamaiqe.”

³² Beqa kaisekavadi wageye idodoqa itauya ibala Waya Galili waineye vikainina waineye tomo'otoqa ge idamiamia.

³³ Tutuyanina inaqonaqo tomo'otoqa puedi ikisedi we iyagovidi, beqa tomo'otoqa taoni matatabudi waidie italakwavini waya doleneye'eqa. We noko vikainina waineye naqaida ilekwa mulineye Ieisu mekanatovemulivo waga beqa ilekwa ilugu.

³⁴ We tutuyanina Ieisu iobu wageye'eqa yoko bwaigina imiamia ikisedi mesaida sipi ge mekaditovekisabodaboda beqa ivenua'ina'inaqeyedi we ivelamu Yaubada valeana iekaivevena waidie.

³⁵ We gunabeida lavilavie kanatovemulivo imai waineye ivoneni ivo, “Dede vikainina waineye ge tamo aitoi idamiamia, we valavala gunabeida inaketoniveni.

³⁶ Beqa tomo'otoqa kuvetunedi inanaqo gweda we taoni vivideye waidie taunidi kadi inagimwane.”

³⁷ We ibaivila ivonedi ivo, “Komi kaisemi kanikani kwaiveledi inakani.” We ivoneni ivo, “Be banikodiqa, dede 200 gileu o dinali bwaigina kago taikaiyavuyavuleni beledi paipaina beqa tomo'otoqa yoko inakani!”

³⁸ We Ieisu ivelautoliedi ivo, “Beledi kaivia waimie? Kwainaqo kwailauala.” Tutuyanina ibabanedi ivoneni ivo, “Beledi dimanina we iqana kailuqa sidede.”

³⁹ Matautauda Ieisu yoko ivonedi, “Kwamiabui katugugunaeqa mosomoso kalakalawidi tabwadie.”

⁴⁰ Beqa imiabui katuguguna waidie tupwaidiavo katuguguna waidie 50 wete mesaida tupwaidiavo waidie 100.

⁴¹ We Ieisu beledi dimanina, iqana kailuqa ikewadi ikisalaga abame paipaidi ivekaiwa Yaubada waineye, matautauda beledi igiatomwai wete iqana kanatovemulivo iveledi tomo'otoqa waidie ikalaqeiedi.

⁴² Tomo'otoqa matatabudi ikani kadisala,

⁴³ we kanatovemulivo tomo'otoqa nigidi beledi tupwatupwadi wete iqana tupwatupwadi igwagwadi ginae kanayoko 12 iveadaqidi.

⁴⁴ We tomoqovo kadiyoko 5,000 ivekanidi, we vevine gwagwama taiauda ge idawawadi.

Ieisu bwasi tabwaneye itauya

⁴⁵ No waineye vedimadimanaeqa Ieisu kanatovemulivo 12 ivonedi inadodoqa wageye inagumeta inabala Waya Galili Betisaida waineye, we Ieisu kaisena imiamia yoko inaveyavulidi.

⁴⁶ No waineye Ieisu yoko ikalanowaidi ivo, “Ee, kwanaqo,” we Ieisu kaisena itovoi itauya inaqo koya waineye ilaga ivelaukui.

⁴⁷ No lovananina waineye Ieisu kanatovemulivo diwaga naqeneye Waya Galili gamwaneye inaqonaqo, we Ieisu kaisena kavale imiamia.

⁴⁸ We ikisanaqo kanatovemulivo itoge ibeubeuta paina yaqina kaia ivileviledi. We saiqanaqa vanuqa inakawananaqai kawakawaie isauyeni waidie itauya inaqonaqo bwasi tabwaneye itauya mesaida nigodibei kago idakiawedi.

⁴⁹ We tutuyanina ikisanaqo Ieisu ikiseni bwasi tabwaneye itauya imaimai we ivemegoi ivo, “Oge yalua?” Ikwekweleni.

⁵⁰ Tutuyanina tovemulivo puedi ikiseni igololo bwaigina. We vedimadimanaeqa Ieisu ivonedi ivo, “Kwainuavatu. Kanayau. Ge kwaigololo!”

⁵¹ Matautauda wageye idodoqa kanatovemulivo waidie, we yaqina ivekwada iniwalova. Kanatovemulivo nuadi ivilele,

⁵² paina gunabeida ikiseni base beledi waineye ivalabubunidi ivepue, we giladi ge kanasala beledi kanakiakiaya ivalabubuni idanuakawananaqaia; nuadi tabodadi ge idakawabwegabwegadi.

Ieisu toviqa puedi ikavegiagiamaidi Genesaleta waineye

⁵³ We ibala Waya Galili waineye imai Genesaleta waineye no waineye diwaga ilaipweni.

⁵⁴ Ieisu mekanatovemulivo wageye iobu tomo'otoqa puedi Ieisu ikinanai.

⁵⁵ We ilaukwavina inaqo vikai puena waidie toviqa ikewadi imaiedi tupwaidiavo mesevusevudi vikainidiavo waineye gunabeida inoqai Ieisu imiamia.

⁵⁶ We vikai puedi waidie Ieisu inaqo mesaida taoni siaidi, taoni bwaigidi o tanoqa kadigwedeye tomo'otoqa toviqa ikewadi inawedi kabavegimwane waineye iyatodi. We Ieisu ivelaukuieni ivo, “Kanasala kamukalekoqa gudina kitagwanema kadakavikavini?” We puedi ikavikavini Ieisu naveluluna beqa ivegiagiamai.