Malika 4 - Maiadomu

Vonawakedubala pwayapwaya pulina paipaina

¹ Wete Waya Galili doleneye Ieisu ivelamu iekaivevena-vaituqana. Yoko puedi inaqo inoqai iesipupu, we waga waya tabwaneye idoedoeni waineye idodoqa naqeneye imiabui, tomo'otoqa puedi itovotovoi kwadeweye.

² Ieisu vonawakedubalaeqa iesipupu, wete iekaivevena tomo'otoqa waidie saku puena paipaidi.

³ Vonawakedubalaeqa ivonedi ivo, “Dede kwanoqai. Tamo tomoqo inaqo natanoqe nawiti waipei inabagulidi we divalabubuna mesaida waipei isapayavuledi.

⁴ Tutuyanina waipei isasapayavuledi waipei tupwaidiavo ibeku kedeye, manuqa imai ikanidi.

⁵ We waipei tupwaidiavo ibeku lasalasa waidie pwayapwaya ge bwaigina we kaia itabwa ilaga,

⁶ we kwalamidi ge idaobu-otoqa beqa valavala igabu tabwadinidiavo siaidi imwatu.

⁷ We waipei tupwaidiavo ibeku iobu mosomoso mwalamwalaqidi waidie itabwa ilaga mosomoso mwalamwalaqidi itaula vuyovuyoidi ge vuadi idayatodi.

⁸ We waipei tupwaidiavo ibeku iobu pwayapwaya giamaina waineye itabwa-giagiamai. Tupwaidiavo ivuaqa giamaina mesaida 30, tupwaidiavo ivuaqa saiqana giamaina mesaida 60 wete tupwaidiavo ivuaqa giamaiotoqidi mesaida 100.”

⁹ We Ieisu ivonedi ivo, “Kago komi metaniqami, guvona kwainoqai vakai aesipupuyeni waimie.”

Vakai lamuna Ieisu vonawakedubalaeqa ivesipupu

¹⁰ Tamo tutuya Ieisu mekanatovemulivo kadiyoko 12 wete tomo'otoqa tupwaidiavo ivelautolieni vonawakedubala paipaina.

¹¹ Ieisu ibaivila ivonedi ivo, “Komi gumanimiavo gunabeida avesinuemi valea vavaigavudi aigiavemaqetaimo waimie, Yaubada nakeda kaivauna natomo'otoqa kadiloina paipaidi gunabeida ivelamu inasauyedi paipaidi. Ge kanasala tomo'otoqa sulidi waidie aivesipupu-luguaqeta, we kaia vonawakedubalaeqa aivesipupu.

¹² Yau mesaida aivalabubunediqa paina melamuna base tamo Yaubada napalopita Buki waineye igililia kanamwaqitana inalausimatala, “ ‘Ikisawayoqeni vakai Yau avalabubunidi, we ge idakisakinanadi. Guvalea inoqayawayoqeni, we ge idanuakawananaqaia. Kago mesaida inanoqai nuapoudi inakawabwegadi inanuakawananaqaia. Matautauda dikapoinaeqa inanuavila, we Yau dikapoina ainuataqonidi.”

Vonawakedubala kananuakawananaqai pwayapwaya pulina paipaidi

¹³ Ieisu ivelautoliedi ivo, “Banikodiqa, vonawakedubala kananuakawananaqai ge kwadayagoviqa? Vakai vonawakedubala kwaiyagovi?

¹⁴ Tomoqo waipei isasapayavuleni mesaida gumanina Yaubada valeana iesipupuyeni tomo'otoqa waidie.

¹⁵ Tupwaidiavo tomo'otoqa mesaida waipei ibeku keda waineye—vonanidiavo inanoqai we Seitani inamai vedimadimanaeqa inakewayavuledi.

¹⁶ We tupwaidiavo tomo'otoqa mesaida waipei ibeku iobu pwayapwaya lasalasana tabwaneye—Yaubada valeana inanoqai medimwasana,

¹⁷ we kwalamidi ge idaobu-otoqa wete ge inakalamaqiqita tutuya kaniakwanina. Tutuyanina waineye veviqa wete ketotovona inalekwa waidie paina Yaubada valeana ietumaqaneni, vedimadimanaeqa divetumaqana inamwea we inabaileni.

¹⁸ Tupwaidiavo tomo'otoqa mesaida waipei ibeku iobu mosomoso mwalamwalaqidi waidie itabwa ilaga. Dede tomo'otoqanidiavo valea inoqai

¹⁹ we dimiana paipaina ienuapouviqa, we wayaqiotoqidi mane wete tupwaidiavo saku. We sakunidiavo valea ikaivuyovuyoidi, we ge idavuaqa.

²⁰ We tupwaidiavo tomo'otoqa mesaida waipei ibeku iobu pwayapwaya giamaina waineye. Valea inoqai inuapwateni ivuaqa, tupwaidiavo 30, tupwaidiavo 60 wete tupwaidiavo 100.”

²¹ Ieisu ivonedi ivo, “Mwaqitana, tomo'otoqa maqeta ge kanasala somala dibuneye inayatoi o ginae beqa inatalapwateni? We kanasala somala tabwaneye inayatoi.

²² Dede mesaida, saku vavaigavudi matatabuna Yaubada nakeda kaivauna isauyeni natomo'otoqavo inaloinedi paipaina Yau kanasala aigiavelausimataledi, we saku tumutumudi Yau kanasala aisinawedi.

²³ We kago komi metaniqami kwainoqai vakai aesipupuyeni waimie.”

²⁴ Ieisu ivonedi ivo, “Kwavevaneneqa-vekavekai kwainoqai. Kago ketoavanina kwaivelituqeni, wete Yaubada ketoavanina inavelituqeni waimie, we Yaubada inakavesulai-otoqidi.

²⁵ Paina aitoi gumanina Yaubada navona inavekimataneniqa, Yaubada nayagova inakavesulaidi. We gumanidiavo Yaubada navona ge idavekimataneni, inakaivuyovuyoi vakai siaina inoqai.”

Vesipusipupu dede Yaubada nakeda kaivauna natomo'otoqa kadiloina inavebwaiga paipaina

²⁶ Ieisu ivo, “Vesipusipupu dede banikodiqa Yaubada nakeda kaivauna isauyeni natomo'otoqa inaloinedi paipaina: Tomoqo waipei ibagulidi natanoqe.

²⁷ Lovane ikenokeno, we kaiate ilitulituqa, we tutuya puepuena waipei ilagalaga, we banikodiqa itabwetabwedimo tomoqonina ge idayagovi.

²⁸ Pwayapwaya kaisena libi igigiavetabwadi, naqaida inaketopia inatabwa inalaga matautauda inalaga inalaga inavetageyoi-otoqa matautauda inavuaqa.

²⁹ We tutuyanina kanikani inagumaqa, tomoqo tavi inavelamu.”

³⁰ Ieisu ivo, “Vakai vonawakedubala beqa aivonemi Yaubada nakeda kaivauna isauyeni natomo'otoqa inaloinedi paipaina?

³¹ Yaubada nanuanuana mesaida kailugu bilana siaiotoqidi tomo'otoqa ibagubagulidi.

³² We kago inatabwa inalaga inavebwaiga-otoqa ge mesaida tupwaidiavo mosomoso, dimana inavelaqalaqadi beqa kaikwakuneye kanasala manuqa waineye inaveqiuva.”

³³ We Ieisu tomo'otoqa ivonedi vonawakedubala puena beqa, we tomo'otoqa dede mesaida ivesipupuyedi kadiketowaveye inayagovi.

³⁴ We Ieisu kaia vonawakedubalaeqa iesipupu waidie, we tutuyanina kanatovemulivo kaisekavadi vakai matatabuna igiavemaqetadi waidie.

Ieisu yaqina wete kaiayava ivonedi iniwalova

³⁵ No kaiatanina, lavilavie, Ieisu kanatovemulivo ivonedi ivo, “Kwaidodoqa taibala Waya Galili vikaineye.”

³⁶ Giladi wageye imiamia kanatovemulivo idodoqa taiauda ibala. We tomo'otoqa puepuedi ikiawedi ibala mali vikaie tupwaidiavo waga taiauda.

³⁷ Tutuyanina yaqina bwaigina ivelamu inunuqa, we kaiayava waga inigenigei, bwasi waga itutuvedovedodoqi.

³⁸ We waga mulineye Ieisu ikenokeno kanakenolaulagata waineye. We kanatovemulivo igololo-otoqa ilauvaqoni ivo, “Kutovoi, kutovoi! Kida saiqanaqa taiwapa. Tovekaivevena, komu paipaida kunuanuana kago mesaida taiwapa?”

³⁹ Itovoi iloinedi bonana veluveluluninaeqa ivo, “Yaqina, nunuqa kaiana!” Wete kaiayava ivonedi, “Kwakawataqonimi!” Yaqina ivekwada, we kaiayava iniwalova.

⁴⁰ Beqa ivonedi ivo, “Uvale kwagololo? Wete vakai paipaina giladi ge kwadavetumaqanegu?”

⁴¹ We tovemulivo igololo-otoqa kaisekavadiqa iesipupu ivo, “Aitoi tomoqo dede? Menaveluluna yaqina wete kaiayava iloinedi ivekwada, we navona ivematamataneni.”