Malika 3 - Maiadomu

Ieisu tomoqo dimana gemwayana ikavegiagiamaia

¹ Tamo Kaiata Kabaveyawai waineye Ieisu ivila-vaituqana ilugu sinagogi naqeneye tomoqo dimana gemwayana ikiseni imiamia.

² We tupwaidiavo tomo'otoqa wayaqidi Ieisu inavemwauya, beqa iematakaikaieni kago togemwaya inakavegiagiamaia Kaiata Kabaveyawai waineye.

³ We tomoqo dimana gemwayana ivoneni ivo, “Kumai kutovoi tomo'otoqa matadie.”

⁴ Matautauda ivelautoliedi ivo, “Vakai loina gumanina giamaina Kaiata Kabaveyawai paipaina: Giamaina taivalabubuni o kapoina taivalabubuni? Oge tomoqo yawaina taiketoyavuya o yawaina taikavekapoi?” Ge tamo aitoi navelautoli idabaivilai.

⁵ Matautauda Ieisu mekanakapoka waidie ikisalelele. Beqa Ieisu nuana ikapo divedeba-pakala paipaina. Matautauda tomoqo dimana gemwayana ivoneni ivo, “Dimamu kusiketoi.” We dimana isiketoi ivegiagiamai-vaituqana.

⁶ Beqa Palisivo itauya inaqo Kini Elodi kanatokaivaisavo waidie, taiauda nuanua italaqi Ieisu inaluvewapai.

Yoko bwaigina Ieisu ivemulieni

^7-8 Beqa Ieisu mekanatovemulivo inaqo Waya Galili doleneye. Yoko bwaigina Galilieqa italakwavini. Tomo'otoqa puedi valea inoqai Ieisu kabanuavilele ivalabubunidi beqa imai waineye Iudia, Ielusalema, Idumea wete tupwaidiavo vikai Bwasi Iolidani vivineye waidie'eqa we Taia wete Saidoni vividie waidie'eqa.

^9-10 Tomo'otoqa puedi Ieisu gunabeida ikavegiagiamaidi beqa toviqa iebibipelapela wayaqidi Ieisu inakavikavini. Paina yoko bwaigina, we Ieisu ge wayaqina inabibini beqa kanatovemulivo ivonedi ivo, “Waga kwavalabubuni paipaigu inakenokeno.”

¹¹ We tutuya puena vaitabu kapoidi tomo'otoqa iekuniqedi Ieisu ikiseni isobwanu mataneye iveqole ivo, “Komu, Yaubada Natuna!”

¹² We ivona-veluveluluna ivo, “Ge tamo aitoi kwaivoneni Yau paipaigu.”

Ieisu apositolovo 12 ivesinuedi

¹³ Ieisu ilaga koya waineye tomoqovo gumanidiavo wayaqina iqoledi imai waineye.

¹⁴ Tutuyanina imai waineye tomoqovo 12 ivesinuedi taiauda inanaqo we kadiwavaqa iqoledi apositolovo. We ivonedi ivo, “Yau wayaqigu komi taiauda taimiamia mulineye aivetunemi kwainaqo Guvalea Giamaina kwailauguguyeni tomo'otoqa waidie.

¹⁵ We tutuyanina aivetunemi lauguguya paipaina veluluna aivelemi kanasala vaitabu kapoidi kwaikwavinedi tomo'otoqa naqedie.”

¹⁶ We apositolovo 12 ivesinuedi kadiwavaqa deqoidi: Saimoni (Ieisu iqoleni Pita kananuakawananaqai gileu),

¹⁷ Sebedi natunavo Iemesa taina Ioni taiauda, Ieisu iqoledi Boanege (kananuakawananaqai Kanitala Natunavo)

¹⁸ Anidulu, Pilipi, Batolomiu, Madiu kanawavaqa tamo Libai, Tomasi, Iemesa, Alipio natuna, Tadiasi, Saimoni gumanina Seloti

¹⁹ we Iudasa Isakaliota gumanina Ieisu kanatoketoqiluva.

Tomo'otoqa ivo Ieisu vaitabu kapoina iekuniqeni

²⁰ We Ieisu mekanatovemulivo taiauda inaqo tamo vanuqa waineye ilugu, we yoko bwaigina isikauqa-vaituqana waineye, we ge kadisala inakani.

²¹ Tutuyanina nasusuvo inoqai paipaina ivo, “Gumanina qauqauna,” we inaqo wayaqidi inamaseagai inanaweni divanuqa waineye.

²² Tutuyanina Ieisu nasusuvo inaqo, tupwaidiavo Mosese naloina kanatovekaivevenavo Ielusalemaeqa iobuma iesipupu, “Bialesibubi kaisena gumanina vaitabu kapoidi kaditogumeta Ieisu iekuniqeni! Vaitabu kapoina ditogumeta naveluluna beqa kanasala vaitabu kapoidi inakwavinedi.”

²³ Beqa Ieisu loina kanatovekaivevenavo iqoledi waidie ivesipupu vonawakedubalaeqa ivo, “Banikodiqa, Seitani kanasala Seitani inakwavineni?

²⁴ Kago kabaloina tamoqana inaketovegeia yoko kailuqa taiauda inaetalaqa, no kabaloinanina ge kanasala inakenokeno.

²⁵ Wete mesaida susu tamoqana inaketovegeia yoko kailuqa ediavo taiauda inaetalaqa, no susunina ge kanasala inamiamia.

²⁶ Beqa kago Seitani nakabaloina inaketovegeia nayokovo taiauda inaetalaqa ge kanasala inakenokeno kaia inakakava.

²⁷ Dede vonawakedubala Seitani paipaina: Ge tamo aitoi kanasala tomoqo veluvelulunina navanuqe inalugu nasakuvo inavainaqodi, we naqaida tomoqonina veluvelulunina inayoqoni matautauda kanasala nasakuvo vanuqe'eqa inavainaqodi.

²⁸ “Yau avona-mwaqitana waimie Yaubada kanasala tomo'otoqa dikapoina puena wete divonakapo ge medivekimatana puena inanuataqonidi.

²⁹ We kago aitoi Yaubada Vaitabuna ge inavekimataneniqa paipaina inavona-kapo inasiwataoi, Yaubada ge kanasala nakapoinanina inanuataqoni, we nakapoinanina inakeno-vaqata.”

³⁰ We Ieisu dede mesaida ivonedi, paina vaitabu kapoidi ikekewaluguaqetedi Yaubada Vaitabuna navelulunaeqa, we tomo'otoqa vonamaimaiqaeqa iesipupu Yaubada Vaitabuna waineye paina iesipupu ivo, “Vaitabu kapoina Ieisu iluguya.”

Ieisu nasusuvo'otoqa

³¹ Ieisu nasusuvo imai ilekwa vanuqa waineye maleweye itovotovoi. Tamo tomoqo ivetuneni inaqoleni.

³² We yoko bwaigina imia-kwaikwaipipineni we tupwaidiavo tomo'otoqa ivoneni ivo, “Inamu, taimwavo, novumwavo maleweye ilalaualemu.”

³³ Ibaivila waidie ivo, “Aitoi gumanina inagu wete meqavoi taigwavo?”

³⁴ Matautauda ikisalelele tomo'otoqa ikisedi imia-kwaikwaipipineni ivo, “Kwakiseni! Dede tomo'otoqanidiavo kaia Yau inagwavo wete taigwavo!

³⁵ Aitoi gumanina Yaubada nanuanuana ivavalabubuniqa gumanina taigu, novugu wete inagu.”