Malika 2 - Maiadomu

Ieisu tomoqo bwalobwalogona ikavegiagiamaia

¹ Kaiata tupwaidiavo ikakava Ieisu ivila-vaituqana inaqo Kapeneumi waineye, we tupwaidiavo tomo'otoqa gunabeida inoqai imai vanuqe.

² Tomo'otoqa puedi imiakauqa vanuqa waineye vanuqa iveada'adaqeni ge tamo kabamia wete vanuqa kawaneye mesaida. We Ieisu iesipupu Yaubada valeana waidie.

³ We tomoqovo kadikumapuli tomoqo bwalobwalogona mesevusevuna ikavalai imaieni vanuqe.

⁴ Tutuyanina imaieni vanuqe yoko bwaigina ikisedi keda itutubodabodai ge kadisala inanaweni Ieisu waineye. Beqa luvewana waineye ilagaveni vanuqa tabwaneye itaviponuya ikakava. Tomoqonina bwalobwalogona mesevusevuna iveonoqi mekanabulava ivekilaloi makanuadi iobu Ieisu manawaneye.

⁵ We tutuyanina Ieisu tomoqovonidiavo divetumaqana ikiseni beqa tomoqo bwalobwalogona ivoneni ivo, “Natugu, mukapoina gunabeida anuataqonidi.”

⁶ We no waineye tupwaidiavo Mosese naloina kanatovekaivevenavo iekalamia. Ienuana nuapoudie ivo,

⁷ “Kaia Yaubada kaisena kanasala kapoina inanuataqonidi. Banikodiqa dede mesaida iesipupuyedi? Beqa ivovona-maimaiqa Yaubada isiwataoi iesipupu mesaida nigo Yaubada kadikailuqa idavesala!”

⁸ We vedimadimanaeqa Ieisu vaitabunaeqa dinuanuana iyagovi ivonedi ivo, “Komi uvale dede mesaida kwaenuanedi nuapoumie? Gunabeida nuapoumi akisedi.

⁹ Dede memeqanina tamo tobwalogo waineye anavo, ‘Mukapoina gunabeida anuataqonidi’ paina ge tamo aitoi idayagovi oge inalausimatala. We dede ge memeqanina tamo tobwalogo aivoneni, ‘Kutovoi kamusevusevu kukewai kutauya kunaqo,’ paina tomo'otoqa kadisala inakiseni vakai inasauyeni.

¹⁰ Beqa Yau aivona vakai mwauna aivalabubuni beqa kwaiyagovi loina wete veluluna Yaubada ivelegu, Yau Mwaqitana Kanatomoqo, meguveluluna kapoina ainuataqonidi pwayapwaya waineye.” Matautauda bwalobwalogona ivoneni ivo

¹¹ “Avonemu kutovoi kamusevusevu kukavalai kunaqo muvanuqe.”

¹² Tomoqo bwalobwalogona vedimadimanaeqa itovoi kanasevusevu ikavalai itauya, we tomo'otoqa puedi ietonovi wete nuadi ivilele Yaubada ididigeni ivo, “Aiaa, ge tamo yawaida waineye valabubunanina tadakiseni.”

Ieisu Libai iqoleni

¹³ Ieisu mekanatovemulivo Kapeneumi ibaileni inaqo Waya Galili vivineye. We yoko bwaigina imai waineye Ieisu Yaubada valeana iekaivevena waidie.

¹⁴ Tutuyanina saiqanaqa iveqanaqo ikiseni tomoqo kanawavaqa Libai tamana Alipio imiamia nakabalituqa naqeneye takisi ikewakewa Loma gabemani paipaina. Ieisu iveqole waineye ivo, “Kuvemuliegu.” Libai itovoi ivemulieni.

¹⁵ Mulineye Ieisu Libai navanuqe lavilavie ikanikani. Takisi kanatokewavo puedi wete tomo'otoqa kapoidi taiauda tutuya puena Ieisu itatalakwavini gumanidiavo, wete Ieisu mekanatovemulivo taiauda ikanikani.

¹⁶ We tupwaidiavo Mosese naloina kanatovekaivevenavo gumanidiavo Palisivo, ikiseni Ieisu takisi kanatokewavo wete tokapoidi taiauda ikanikani beqa kanatovemulivo ivonedi ivo, “Uvale tomo'otoqa dede takisi kanatokewavo wete tokapoidi taiauda ikanikani?”

¹⁷ Tutuyanina Ieisu divona inoqai ivesipupu waidie ivo, “Tomo'otoqanidiavo veluvelulunidi doketa ge paipaina idanuanuana. Gebuka! Gumanidiavo toviqa kadisala doketa inalaualeni. Wete mesaida Yau ge tomo'otoqa tonotonovidi paipaidi adamai. Yau tokapoina paipaidi amai aveqole beqa inanuavila dikapoina waidie'eqa.”

Velautoli vekudiqana paipaina

¹⁸ Tamo kaiata Ioni Tobabitaiso kanatovemulivo we tupwaidiavo Palisivo iekudiqana tapwalolo paipaina. No waineye tomo'otoqa tupwaidiavo imai Ieisu ivelautolieni ivo, “Ioni kanatovemulivo wete Palisivo kaditovemulivo iekudiqana, we banikodiqa komu kamutovemulivo giladi ikanikani ge idaekudiqana?”

¹⁹ We Ieisu ibaivila ivo, “Tutuyanina tomoqo vavine inanaqia tomoqonina enavo, banikodiqa iekudiqana? Gebuka! Tutuyanina enavo taiauda ge idavekudiqana, we inakani-velautaubama medimwasana.

²⁰ Tamo kaiata tomoqonina kanatalavualavo inakewai gamwadie'eqa. Kaiatanidiavo no waidie inaekudiqana paina nuadi inakapo.”

²¹ Wete ivonedi ivo, “Yau dede nuanuana kaivauna amaieni aivekaiveveneni waimie ge mibubuna tutuaina taiauda idavesala. Kaleko tutuaina ge kanasala kaleko kaivauna beqa kibwadai. Kago mesaida kailegwa waineye inakawalabuki paina kaleko kaivauna inagogova, we kalekonina tutuaina inakawalabuki.

²² “Wete mesaida ge kanasala oine kaivauna ina'iwaqi inaobu oine kaba'iwaqa kaisaya bununa tutuaina waineye. Kago no mesaida aitoi inavalabubunediqa kaisaya bununa inakawapiai paina oine inapatai inavetageyoi kaisaya bununa ge kanasala kaisena inapatai. Beqa oine wete kaisaya bununa inakapo. Gebuka! Dede mesaida ge inavalabubunediqa we tomo'otoqa oine kaivauna ina'iwaqi inaobu kaisaya bununa kaivauna waineye.”

Ieisu navona Kaiata Kabaveyawai paipaina

²³ Tamo Kaiata Kabaveyawai waineye, Ieisu mekanatovemulivo inaqonaqo witi kanatanoqa naqeneye. Tutuyanina inaqonaqo kanatovemulivo witi vuadi igadidi ikanikani.

²⁴ We tupwaidiavo Palisivo ikisedi no mesaida ivavalabubunedi Ieisu ivoneni ivo, “Kukiseni! Daketoboda imiamia ge Kaiata Kabaveyawai waineye tailituqa, we uvale kamutovemulivo ilitulituqa Kaiata Kabaveyawai waineye?”

²⁵ We ibaivila Palisivo waidie ivo, “Aa dede giligililina Buki waineye, Deibida wete enavo taiauda ivalabubuni tutuyanina ilase wayaqidi inakani beqa gunabeida kwawawai kwanoqai, we uvale ge kwadanuakawananaqaia?

²⁶ Deibida Yaubada navanuqa naqeneye ilugu ivelaukui tupwaidiavo beledi paipaidi. No tutuyanina Abiata natutuya tovelomuvo kaditogumeta waineye itagwaneni Deibida tupwaidiavo beledi iveleni. No beledinina maqemaqetana, we gunabeida ikalaqeieni Yaubada mataneye. Kaia tovelomu kaditagwana beledinidiavo inakanidi, we Deibida tupwaidiavo ikanidi. Wete ikewadi tupwaidiavo iveledi enavo taiauda imiamia ikani, we Yaubada ge idakawakapoieni.”

²⁷ We wete ivonedi, “Yaubada Kaiata Kabaveyawai ivalabubuni tomo'otoqa kadikaivaisa paipaidi. We Yaubada ge tomo'otoqa idavalabubunidi Kaiata Kabaveyawai inakaivaiseni.

²⁸ Yau Mwaqitana Kanatomoqo beqa Kaiata Kabaveyawai Yau Kana Tomwaya!”