Malika 16 - Maiadomu

Ieisu natovoi vaituqana

¹ We tutuyanina Kaiata Kabaveyawai gunabeida ikakava, Meli taoni Magidala waineye'eqa we Meli Iemesa inana wete Salome inaqo bunama maqaina giamaina igimwanei wayaqidi inanaqo Ieisu vovona inabunamai.

² We wiki kanakaiata gumegumetana waineye kawakawaiotoqe valavala bakamidiqa ivulaoqa inaqo ovu waineye.

³ We inaqonaqo iesipupu kedakeda kaisedi ivo, “Aitoi gileu bwaigina ovu kawaneye idavelikolikokoi paipaida?”

⁴ We tutuyanina ilekwa ikisanaqo gileunina bwaigina gunabeida ivelikolikokoi isibaleni.

⁵ Tutuyanina ilugu ovunina naqeneye tamo tomoqo tubuauna ikiseni kaleko tatatalina ikweseni kadikataqie imiabui imiamia, we ikiseni igololo.

⁶ We anelose ivesipupu waidie ivo, “Ge kwaigololo komi Ieisu tomoqo Nasaleta kwalalaualeni gumanina itutupwateni, we gunabeida wapaeqa itovoi-vaituqana, gumanina ge idamiamia dede waineye. Kwakise side waineye vovona iyatoi.

⁷ We kwanaqo kanatovemulivo kwavonedi wete Pita taiauda kwavoneni kwanavo, ‘Gumanina igumegumeta Galili. No waineye kwaikiseni base mesaida ivonemi.”

⁸ Tutuyanina inoqai no vevinenidiavo nuadi ivilele wete igololo isauyedi ovuye'eqa ilaukwavina ikiaweni. We paina igololo beqa kedeye ge tamo aitoi idavoneni.

[Basenaqaida tupwaidiavo lubulubu (kopi) Malika Navalea Giamaina paipaina imiamia. Lubulubu kailuqa tutuaiotoqidi ikakava maibala 8 waineye, we tupwaidiavo lubulubu waineye maibala 9 inanaqo 20 imiamia.] Ieisu ilausimatala Meli waidie

⁹ Tutuyanina kawakawaiotoqe wiki kanakaiata kabavelamu waineye, Ieisu gunabeida itovoi-vaituqana Meli taoni Magidala waineye'eqa waidie naqaida ilausimatala. Base dede vavinenidi waidie vaitabu kapoidi kadiyoko 7 ikwavinedi.

¹⁰ We inaqo kanatovemulivo gumanidiavo nuadi ikapo wete itaitaiqa Ieisu paipaina ivonedi vakai isauyeni.

¹¹ We tutuyanina Meli ivonedi ivo, “Kakiseni, Ieisu gunabeida itovoi-vaituqana,” we divona ge idavetumaqaneni.

Ieisu ilausimatala kanatovemulivo kadikailuqa waidie

¹² Mulineye, tutuyanina Ielusalema ikiaweni inaqonaqo, Ieisu ilausimatala kanatovemulivo kadikailuqa waidie. We ge kadisala inayagovi paina kanakisa sulina.

¹³ We tutuyanina iyagovi ivila inaqo kanatovemulivo tupwaidiavo ivonedi, we divona ge idavetumaqaneni.

Ieisu ilausimatala kanatovemulivo 11 waidie

¹⁴ Mulineye Ieisu ilausimatala kanatovemulivo 11 waidie ditutuya kani waineye. We iyaqaidi ivo, “Nuami tabodadi ge idakawabwegabwegadi wete ge kwadavetumaqanegu. Gunabeida ikisegu atovoi-vaituqana we ivemataluanimi, uvale divona ge kwadavetumaqanedi?”

¹⁵ Ivonedi ivo, “Kwasauyemi kwanaqo taoni tamoqana tamoqana pwayapwaya matatabuna waidie Valea Giamaina kwalauguguyeni tomo'otoqa puepuedi waidie.

¹⁶ Aitoi gumanina inavetumaqanegu we inababitaiso, gumanina ketoyavu inababaneni. We aitoi ge inavetumaqanegu kaimatavuloqa inababaneni nakapoina paipaina.

¹⁷ We kagutovetumaqanavo kiakiaya veluvelulunidi inavalabubunidi. Kaguwavaqaeqa vaitabu kapoidi tomo'otoqa naqedie inakwavinedi inasauyedi, we bonana sulina sulina ge idayagovidi beqa inavesipupu.

¹⁸ Gumanidiavo baisoa kapoidi dimadieqa inakavikavinidi, we siwaya inayemu ge inakavekapoidi. Wete dimadi toviqa waidie inayatodi inakavegiagiamaidi.”

Yaubada Ieisu imaseagai ilagaveni abame

¹⁹ We mulineye Tomwaya Ieisu iesipupu waidie ikakava, we Yaubada imaseagai ilagaveni abame, ivemiabuia Yaubada kataqineye vikai vekivekimatanina waineye.

²⁰ We kanatovemulivo inaqo vikai puena waidie Valea Giamaina ilalauguguyeni, we Tomwaya ikaivaisedi dilauguguya igiaveluveluluni paina naveluluna beqa kabanuavilele ivalabubunidi tomo'otoqa ikisedi.