Malika 15 - Maiadomu

Ieisu itovoi Pailato mataneye

¹ We kawakawaiotoqe tovelomuvo bwaigidi, tomoqovo bwaigidi, loina kanatovekaivevenavo, wete Diu Kaniselevo matatabudi itagwana Ieisu inawapa. Beqa ditolauqaviavo dimana iyoqonidi ivegumetai inanaweni Pailato Loma gabemani waineye inavemwauya.

² We Pailato Ieisu ivelautolieni ivo, “Komu me Diu dikini?” We ibaivila ivo, “Vakai kuvesipupuyeni mwaqitana.”

³ Beqa tovelomuvo bwaigidi valabubuna kapoidi beqa ivemwauya.

⁴ We Pailato ivelautoli-vaituqaneni ivo, “Banikodiqa, ge kudabaivila? Kunoqai! Valabubuna kapoidi puedi beqa iemwaumu!”

⁵ We Ieisu ge tamo vakai idavesipupuyeniqa, beqa Pailato nuana ivilele.

Me Diu wayaqidi Ieisu inawapa

⁶ We diqaba tamoqana tamoqana Vesikaqalataqona Kanakani kanakaiata waineye Pailato navalabubuna tamo tomoqo gumanina deli naqeneye, aitoi gumanina me Diu wayaqidi inavelaukuieni, Pailato inayavuya.

⁷ No kaiatanina tomoqo, kanawavaqa Balabasi, deli naqeneye imiamia. Loma tolauqaviavo dede tomoqonina ikavikavini tupwaidiavo tovetalaqavo taiauda, gumanidiavo me Loma diloina ikawakapoyeni we wete tupwaidiavo tomo'otoqa iluvewapadi.

⁸ Beqa yoko bwaigina imai Pailato ivelaukuieni tamo aitoi inayavuya mesaida diqaba tamoqana tamoqana waidie ivavalabubunedi.

^9-10 We Pailato gunabeida iyagovi tovelomuvo bwaigidi Ieisu ivedebadebaguyeni beqa Ieisu ikalaqeieni waineye beqa tomo'otoqa ivelautoliedi ivo, “Wayaqimi me Diu mikini aiyavuya paipaimi?”

¹¹ We tovelomuvo bwaigidi ivona-veluveluluna tomo'otoqa waidie beqa Pailato ivoneni ivo, “Balabasi kuyavuya inanaqo, we Ieisu ge kiyavuya!”

¹² We Pailato ivelautoli-vaituqanedi ivo, “Vakai wayaqimi waigue tomoqo dede waineye aivalabubuni gumanina tupwaimiavo kwavo, ‘Me Diu dikini?”

¹³ We iveqole bonadi bwaigidieqa ivo, “Kututupwateni!”

¹⁴ We Pailato ivelautoliedi ivo, “Banikodiqa? Vakai tamo valabubuna kapo ivalabubuni?” We wete iveqole mediveluluna ivo, “Kututupwateni!”

¹⁵ We Pailato wayaqina yoko inagiavemwasanidi, beqa Balabasi iyavuya inaqo. We tolauqaviavo ivonedi beqa Ieisu inanigei inakewai inanaweni inatupwateni.

Tolauqaviavo Ieisu isaidibieni

¹⁶ We tolauqaviavo Ieisu inaweni Pailato navanuqa kabaloina malewineye iluguveni matautauda tolauqaviavo matatabudi iqolekauqidi.

¹⁷ We kaleko yaqoyaqona mesaida Kini kadivaiqavu ikewai beqa Ieisu ivesipapai. We bulava mwalamwalaqidi ikewadi imetanidi kunukununeye iyatoi

¹⁸ we isasaidibieni ivo, “Kamwasanemu, komu me Diu dikini!”

¹⁹ We utoqanaeqa kunukununeye ikakainige wete igiwagiwali. We mataneye kaqedi iveketonokuyedi iekimataneni mesaida Kini.

²⁰ We isasaidibieni ikakava vovoneye kaleko yaqoyaqona isitakia, we taunina kanakalekoeqa ivekweseni ikewai inaweni inatutupwateni.

Ieisu itutupwateni

²¹ We itauya inaqonaqo tomoqo Sailini ikiseni kanawavaqa Saimoni, Alekisana wete Lupuso tamadi. Gumanina tanoqe'eqa imaimai, we kedeye ibabaneni iloineni Ieisu kanalaukenobalabala ikavalai.

²² We Ieisu inaweni vikai kanawavaqa Goligota waineye. (Goligota kanayagova Kunukunu Kanavikai.)

²³ Matautauda oine wete mulo taiauda ivalabubuni Ieisu iveleni nigo idayemu, we Ieisu ibaileni.

²⁴ We kanakalekovo ikewadi isenai bou tamoqana tamoqana waidie. We gileu ikewadi, we tamo gova igoveni beqa kalekonidiavo bou tamoqana tamoqana ikalaqeiedi.

²⁵ We kawakawaie tutuya mesaida 9 koloki Ieisu itutupwateni.

²⁶ Bodi igililia vonanina beqa iemwauya ivo, “Dede me Diu dikini.” We bodinina itutupwateni laukenobalabala waineye kunukununa tabwaneye.

^27-28 Ieisu wete loina kanatobai kadikailuqa taiauda itutupwatedi. Ieisu kanalaukenobalabala gamwaneye, we tamo toloinabai kanalaukenobalabala kanakataqie tamo kanakelie.

²⁹ We tomo'otoqa puedi itauya inaqonaqo kenaoye ikudekude wete ilotomwasi'ieni ivo, “Ee! Kukisa! Komu kuvo, ‘Temupolo aiqeuya kaiata kaitonu aiyoqona-vaituqani.’

³⁰ Beqa taunimu kiketoyavumu kiobuma laukenobalabala waineye'eqa.”

³¹ We tovelomuvo bwaigidi wete loina kanatovekaivevenavo ediavo taiauda isaidibieni kaisekavadi ivo, “Kwakise, tupwaidiavo iketoyavudi, we banikodiqa, taunina ge idaketoyavuya!

³² Base ivona ivo, ‘Yau Mesaia me Isileli dikini,’ beqa kanasala laukenobalabala waineye inaobuma kida taikiseni taivetumaqaneni.” We kadikailuqa laukenobalabala tabwaneye taiauda itautaula kanakataqie we kanakelie Ieisu iyaqaia.

Ieisu nawapa

³³ Kaiatagamwana kanalavilavi waineye pwayapwaya matatabuna ivaitomai kanaketoava 3 koloki lavilavie.

³⁴ No tutuyanina 3 koloki Ieisu iveqole bonana bwaiginaeqa ivo, “Eloi, Eloi lama sabakitanai?” Kananuakawananaqai ivo, “Gu Yaubada, gu Yaubada vakai paipaina kukiawegu?”

³⁵ We tomo'otoqa tupwaidiavo itovotovoi inoqai ivo, “Kwanoqai oge, Ilaitia iqoleqoleni.”

³⁶ Tamo tomoqo ilaukwavina inaqo balou ikutuvi oine yuyuyuna waineye itutumwalaqeni welavi mataneye isilagai Ieisu inaveyemuya, we ivo, “Kwavekwada. Taikiseni oge Ilaitia inamai laukenobalabala waineye'eqa inasitakia.”

³⁷ We Ieisu iveqole bonana bwaiginaeqa yawaina ikakava.

³⁸ We Temupolo naqeneye kalekonina beqa tutuya matatabuna Tutudaba Maqemaqetana'otoqina ibububuliqa ikawalabukaluqedi tabwaneye iobu dibuneye.

³⁹ We tolauqaviavo kaditogumeta itovotovoi Ieisu kanalaukenobalabala lamuneye ikiseni Ieisu banikodiqa iwapedimo. Beqa ivo, “Mwaqitana tomoqo dede Yaubada Natuna.”

⁴⁰ We vevine tupwaidiavo ietonova kanikie'eqa. Waidie'eqa Meli taoni Magidala waineye'eqa, we tamo Meli Iemesa siaina we Iosese inadi wete Salome.

⁴¹ We wete vevine puedi no waineye, gumanidiavo base inaqo Ielusalema Ieisu taiauda. Base tutuyanina Ieisu Galili imiamia dede vevinenidiavo iemulieni wete iekisabodebodeni.

Iosepa tomoqo Alimadia Ieisu iyatoi naovu waineye

^42-43 Taoni Alimadiaeqa tomoqo kanawavaqa Iosepa. Gumanina ivekimataneni bwaigina Diu Kaniselevo diyoko tamo naqeneye, we ilalaugamasa Yaubada Nakabaloina paipaina. Saiqanaqa valavala inaketoniveni no kaiatanina waineye ivavalabubuna Kaiata Kabaveyawai paipaina, beqa Iosepa inuavatu inaqo Pailato ikiseni ivelaukuieni Ieisu vovona paipaina.

⁴⁴ Tutuyanina Pailato ielaukuieni itoalavunuqi ivo, “Aa, Ieisu yawaina gunabeida ikakava?” Beqa tolauqavia kaditogumetanina Ieisu itutupwateni laukenobalabala waineye iqoleni, we ivelautolieni ivo, “Ieisu yawaina gunabeida ikakava?”

⁴⁵ We ibaivila ivo, “Mwaqitana.” Pailato inoqai, beqa Ieisu vovona itagwaneni Iosepa waineye.

⁴⁶ We Iosepa kaleko giamaina igimwanei imaieni, laukenobalabala waineye Ieisu vovona isitakia iobuyeni iumai ikewai inaweni iyatoi ovu waineye, base tomo'otoqa gileu italaluguveni waineye. We gileu bwaigina beabeana vivivilina ivelikolikokoi inaweni ovunina kawana itutubodai.

⁴⁷ We Meli taoni Magidala waineye'eqa wete Meli Iosese inana Ieisu vovona iyatoyatoi we ietonovi.