Malika 14 - Maiadomu

Diu togumetavo wayaqidi Ieisu inakavikavini

¹ Kaiata kailuqa inakakava mulineye, me Isileli Vesikaqalataqona kananuavekavina kanakani wete *Beledi Tutubeabeana Ge Mekana'isiti Kanakani inavalabubuni. Tutuyanina tovelomuvo bwaigidi wete loina kanatovekaivevenavo kedakeda ilalauala banikodiqa Ieisu vaigavueqa inakavikavini.

² We ivo, “Kani naqeneye ge taikavekavini kago mesaida tomo'otoqa inadaba taiauda taivetalaqa.”

Vavine Ieisu bunamaeqa i'iwaqi

³ We Ieisu Bedani imiamia Saimoni Lepelo navanuqe ikanikani, we vavine bunama maqaina giamaina imaieni. Kanawavaqa nadi we kanatutula bwaigina, we botolina gileu giamaina kanawavaqa alabasita beqa ivalabubuni. We bunamanina botolina imaieni itutubaia Ieisu kunukununa i'iwaqi.

⁴ Tomo'otoqa tupwaidiavo vavinenidi ikisedi vakai ivalabubuni Ieisu waineye paipaina kadikapoka ioqala ediavo waidie iesipupu ivo, “Uvale bunama maqaina giamaina we iekamubwadodoyeni?

⁵ Kanasala idavegimwaneyeni mane kanabwaiga 300 seluba idakewai yomuyomudi idaveledi.” Dede mesaida ibwadubwaduyedi.

⁶ We Ieisu ivonedi ivo, “Kaiana! Ge kwaitalabodebodedi. Uvale kwabwadubwaduyedi? Vavinenidi saku giamaina ivalabubuni waigue.

⁷ Tutuya puena yomuyomudi komi taiauda kwaimiamia. Beqa kanasala kwaikaivaisedi tupwaidiavo kaiata waidie. We Yau ge komi taiauda taimiamia.

⁸ Vavine dede dikaivaisa waigue bwaigina we ge tamo vakai beqa inavalabubuna waigue. Vovogu ibunama-vaqateni inavalabubuni kagutavuna paipaina.

⁹ Avona-mwaqitana waimie pwayepwayeye vikai puena waidie tomo'otoqa valeagu giamaina inanoqanoqai, wete vavine vesipusipupudi inanoqai vakai ivalabubuni waigue, kananuavekavina paipaina.”

¹⁰ Tutuyanina waineye Ieisu kanatovemulivo 12 waidie'eqa tamo, kanawavaqa Iudasa Isakaliota, inaqo tovelomuvo bwaigidi waidie inaketoqiluveni.

¹¹ Iudasa Isakaliota navona inoqai imwasana-otoqa we ivo, “Mane kaivelemu.” Beqa Iudasa itauya inaqo kedakeda inalauala Ieisu inakalaqeieni tovelomuvo bwaigidi waidie.

Ieisu kanatovemulivo taiauda Vesikaqalataqona kananuavekavina ikania

¹² We tutuyanina Beledi Tutubeabeana Ge Mekana'isiti Kanakani kanakaiata kabavelamu waineye me Diu kani ivavalabubuni, kaiatanina waineye, kaisaya sipi natuvaudi inigedi imaiedi Vesikaqalataqona Kanakani paipaina inavalabubuna. Ieisu kanatovemulivo ivelautolieni, “Vakaiebe waineye wayaqimu kainaqo Vesikaqalataqona Kanakani kaivalabubuni komu paipaimu?”

¹³ Beqa Ieisu kanatovemulivo kadikailuqa ivonedi, “Kwainaqo Ielusalema tamo tomoqo bwasi kabagoi ikavalai inaqonaqo kwaibabaneni, komi kwaivemulieni taiauda kwainaqo.

¹⁴ Vanuqanina waineye inalugulugu taiauda kwailugu tonivanuqa kwaivoneni kwanavo, ‘Tovekaivevena ivo, Vakaiebe tutudabanina waineye Yau wete kagutovemulivo taiauda Vesikaqalataqona kanakani kananuavekavina kaikania?’

¹⁵ Matautauda tonivanuqa inakewami inalagavemi tutudaba bwaigina tabwaneye inavevemi vikainina gunabeida ivalabubuni, we waineye kanikani kwaivalabubuni paipaida.”

¹⁶ Tovemulivo itauya inaqo Ielusalema, sakunidiavo mesaida Ieisu ivesipupuyedi waidie ibabanedi. We kanikani ivalabubuni, Vesikaqalataqona kananuavekavina paipaina.

¹⁷ We lavilavie Ieisu mekanatovemulivo kadikuma 12 imai.

¹⁸ Kabakani waineye ikanikani Ieisu ivo, “Avona-mwaqitana, tamo waimie'eqa inaketoqiluvegu, gumanina taiauda kakanikani.”

¹⁹ We tovemulivo nuadi ikapo ivelamu iesipupu tamoqana, tamoqana waineye ielautolieni, “Oge Yau?”

²⁰ Ieisu ibaivila ivo, “Tamo komi kamikuma 12 waimie'eqa, deqoina Yau taiauda kakanikani.

²¹ We Mwaqitana Kanatomoqo inawapa mesaida Buki Maqemaqetana waineye ivesipupu. We toketoqiluva gumanina veviqa bwaigina inababaneni. We giamaina oge tutuya base toketoqiluvanina inana ge idavetubuqi beqa kaimatavuloqa bwaigina ge idababaneni.”

²² We ikanikani, Ieisu beledi ikewai ivelaukui mulineye igiatomwai, kanatovemulivo iveledi ivo, “Kwakewai, dede vovogu.”

²³ Matautauda vedi ikewai ivekaiwa Yaubada waineye, kanatovemulivo iveledi puepuedi beqa iyemu.

²⁴ Ieisu ivesipupu ivo, “Dayaqigu dede. Ilailolo tomo'otoqa puepuedi paipaidi. Yau dayaqigunina Yaubada navonadabadaba kaivauna kanagiavepakala.

²⁵ Avona-mwaqitana waimie, oine ge wete aiyemuya kanaketoava Yaubada Nakabaloina waineye oine kaivauna aiyemu.”

²⁶ Matautauda kewa tamo ikeweni isauyedi inaqo Koya Olibe waineye.

Pita Ieisu ivekeweni

²⁷ We Ieisu kanatovemulivo waidie ivesipupu ivo, “Matatabumi Yau kwaikiawegu kwaivekaladeqa. Yaubada navona Buki naqeneye dede mesaida, “ ‘Sipi tovekisabodaboda ainigei, we sipi inakalisapa.’

²⁸ Yaubada wapaeqa inasivetovoigu aigumeta ainaqo Galili mulineye komi kwaimai.”

²⁹ We Pita Ieisu waineye ivesipupu, “Oge dede matatabudi inakiawemu inavekaladeqa, we Yau gebuka.”

³⁰ Ieisu ivesipupu Pita waineye, “Avona-mwaqitana waimue, dede lovananina waineye, komu muvekewa kaitonu kunavo, ‘Yau ge adayagovi!’ we mulineye kamukamu inagwaqe kailuqa.”

³¹ We Pita menaveluluna iesipupu ivo, “Kago komu taiauda taiwapa, we ge aivekewemu!” Wete enavo puedi mesaida iesipupu Ieisu waineye.

Ieisu ielaukui Gedesemani waineye

³² Ieisu kanatovemulivo taiauda inaqo kawalawa kanawavaqa Gedesemani waineye, Ieisu tovemulivo ivonedi ivo, “Kwamiabui kwaimiamia, Yau ainaqo aivelaukui.”

³³ Pita, Iemesa wete Ioni imaseagadi taiauda inaqo. Ieisu ivelamu nuapouna iveviqa wete inua-kapo.

³⁴ Beqa Ieisu ivesipupu waidie ivo, “Yau nuapogu ieviqa saiqanaqa inaluvewapagu. Beqa dede waineye kwaimiamia we ge kwaikeno kwaimialaugamasa.”

³⁵ Ieisu itauya inaqo saiqana kanikie ilaukabubu ielaukui oge Yaubada idatagwaneni veviqa kanavikaie ge idanaqo.

³⁶ Ivo, “Tamagu, Tamagu komu saku puena kamusala kivalabubunidi, beqa veviqa kanavedi dede kikewayavuleni ge aiyemuya, we Yau ge gunuanua kivalabubuni, we komu munuanuana.”

³⁷ We Ieisu ivila imai ikisedi kanatovemulivo kadikaitonu ikenokeno, Pita waineye ivesipupu, “Saimoni, komu kukenokeno? Uvale ge kanasala kikisakisa tamo maibala paipaina?”

³⁸ We ivesipupu waidie ivo, “Komi vaitabumi wayaqina giamaina kwaivalabubuni, we vovomi ibwalogo. Komi kwaimialaugamasa wete kwaivelaukui Yaubada waineye inagiaveluvelulunimi kavagi ketotovona waineye ge kwaibeku.”

³⁹ Wete inaqo ivelaukui, vonanidiavo iluvaituqanidi.

⁴⁰ Matautauda ivila imai tovemulivo waidie ikisedi wete ikenomataiva ikenokeno paina matadi iduduna-otoqa. Beqa ge idayagovi banikodiqa bonana inabaivilai.

⁴¹ Kanavetonu waineye ivila imai ivesipupu waidie, “Komi giladi kwakenokeno we kwaeyawai? Kaiana! Tutuya gunabeida imai! Kwakiseni, Mwaqitana Kanatomoqo inakalaqeiegu tokapoina dimadie.

⁴² Kwatovoi tainaqo. Kwakise, side kagutoketoqiluva!”

Ieisu kanakavekavina

⁴³ Ieisu giladi iesipupu, we Iudasa tamo tovemulivo 12 waidie'eqa ilekwa. Mulineye yoko bwaigina medikepata wete mediwabibi. Tovelomuvo bwaigidi, loina kanatovekaivevenavo wete tomoqovo bwaigidi, ivetunedi inaqo.

⁴⁴ Kenaoye Iudasa toketoqiluva kiakiaya tamo gunabeida ivesipupuyeni yoko waidie ivo, “Kwaikisawai tomoqonina aiyaoqi gumanina kwaikavekavini kwainaweni.”

⁴⁵ Iudasa ilekwa inaqo Ieisu waineye ivo, “Tovekaivevena!” We iluaqavuya iyaoqi.

⁴⁶ Matautauda ikavekavini itoge ialakikikia.

⁴⁷ We tamo tomoqo itovotovoi vividie nakepata isiokei tovelomuvo kaditogumeta natolituqa taniqana igusuya.

⁴⁸ Ieisu ivesipupu waidie ivo, “Uvale kwamai waigue memikepata memiwabibi kwaikavekavinigu, tadavo Yau mesaida toloinabai?

⁴⁹ Kaiata tamoqana tamoqana Yau komi taiauda, tamiamia aekaivevena waimie Temupolo malewina waineye, we ge kwadakavekavinigu? Dede isasasauyeni beqa Buki Maqemaqetana naqeneye ivesipupu paipaigu kanamwaqitana inasauyeni.”

⁵⁰ We Ieisu kanatovemulivo puedi ibaileni ideqa.

⁵¹ Tamo tomoqo tubuauna kanakaleko kaia kaitamoqa-otoqina ikweseni yoko iemuliedi. Tomoqonina ikiseni nigo idakavekavini.

⁵² We kanakaleko isiyavuya dimadie we vovo kavakavana ideqa.

Ieisu Diu Kaniselevo matadie itovoi

⁵³ We tutuyanina Ieisu kanatokavekavinavo inaweni tovelomuvo kaditogumeta navanuqe, we tovelomuvo bwaigidi matatabudi, tomoqovo bwaigidi wete loina kanatovekaivevenavo imai imiakauqa.

⁵⁴ Pita ivemulieni saiqana kanikie inaqo tovelomuvo kaditogumeta navanuqe malewina waineye ilugu, maleweye imiabui tolituqavo taiauda, kai waineye ievala.

⁵⁵ We tovelomuvo bwaigidi wete Diu Kaniselevo puepuedi Ieisu kanavemwau paipaina ilalaualeni no lamunanina inayatoi wapa waineye, we ge kadisala inababaneni.

⁵⁶ Tovonakaivaisa puepuedi katupoe'eqa ivesipupu Ieisu paipaina, we divesipupunidiavo ge idavesala.

⁵⁷ We tomoqovo tupwaidiavo itovoi katupoe'eqa ivesipupu

⁵⁸ ivo, “Kima kanoqai dede mesaida ivesipupuyedi, ‘Yau dede Temupolo tomo'otoqa dimadieqa iyoqoni aiqeuyavuleni, we Yau kaiata kaitonu inakakava Temupolo kaivauna aiyoqoni, tomo'otoqa ge kanasala dimadieqa inayoqoni.”

⁵⁹ Oge dede mesaida ivesipupuyedi, we divesipupuvo ge idavesala.

⁶⁰ We tovelomuvo kaditogumeta tomo'otoqa yoko gamwadie Ieisu ivelautolieni, “Uvale komu ge wayaqimu divona paipaimu kibaivilai?”

⁶¹ We Ieisu iekwada, ge tamo vona idavesipupuyeni. Wete tovelomuvo kaditogumeta ivelautolieni ivo, “Komu mwaqitana Mesaia, Gumanina Tadididigeni Natuna o gebuka?”

⁶² Ieisu ibaivila ivo, “E'e, Yau. Dede mesaida Yaubada Nabuki ivesipupuyedi, komi Yau Mwaqitana Kanatomoqo kwaikisegu Yaubada Tabwaotoqineye kataqineye aimiabui, we waumana tabwaneye aiobuma.”

⁶³ We tovelomuvo kaditogumeta Ieisu navona inoqai kanakapoka ioqala, kanakaleko ilabuki we ivo, “Kima ge wayaqima tupwaidiavo tovonakaivaisa!

⁶⁴ Kwanoqai navona kapo Yaubada isiwataoi. Banikodiqa minuanua?” Matatabudi ivo, “Ieisu ivalabubuna-kapo beqa inawapa.”

⁶⁵ We tupwaidiavo ivelamu Ieisu igiwagiwali, wete matana kalekoeqa ipania dimadie'eqa inigenigei, we ivonevoneni ivo, “Kago komu Yaubada napalopita kivonema aitoi inigemu?” We wete tolauqaviavo ikewai inaweni itoge inigei.

Pita Ieisu ivekeweni

⁶⁶ We Pita giladi imiabui imiamia tovelomuvo kaditogumeta navanuqa malewina waineye, we tamo vavine tovelomuvo kaditogumeta natolituqa imai.

⁶⁷ We tutuyanina Pita ikiseni ievala, ikisanaqo ikisavetovetonovi ivo, “Komu wete Ieisu tomoqo Nasaleta iana.”

⁶⁸ We ivekeweni ibaivila ivo, “Ge adayagoviqa vakai kwaesipupuyeni,” matautauda itovoi inaqo kala kawaneye itovotovoi. We kamukamu lamoqina igwaqe.

⁶⁹ Tolituqa vavinena no waineye ikiseni, wete ivesipupu-vaituqana tomo'otoqa itovotovoi waidie, “Dede tomoqonina tamo iadi!”

⁷⁰ Wete Pita ivekewa-vaituqana ivo, “We ge mwaqitana.” Tutuya kalakusana waineye tomo'otoqa itovotovoi Pita iwewesa-vaituqaneni, “Mwaqitana komu tamo iadi paina me Galili.”

⁷¹ We Pita ivonedi ivo, “Avonalaga Yaubada waineye avona-mwaqitana! Kago ge aivona-mwaqitana Yaubada inakaimatavuloqigu! Tomoqonina kwaesipupuyeni ge adayagovi!”

⁷² No waineye kamukamu lamoqina igwaqe veluqai, we Pita inuani base vakai Ieisu waineye ivesipupuyeni ivo, “Naqaida komu kivekewegu kaitonu kunavo, ‘Ge adayagovi’ mulineye kamukamu inagwaqe veluqai.” Beqa ivelamu ilaumataqeu.