Malika 13 - Maiadomu

Ieisu Temupolo kanaqeu paipaina ivesipupu

¹ No tutuyanina Ieisu Temupolo naqeneye'eqa isasauyeni kanatovemulivo tamo ivesipupu waineye ivo, “Tovekaivevena, kukiseni, gileu bwaigidi wete vanuqa kanakisa giamaiotoqina!”

² Ieisu ibaivila ivo, “Dede vanuqanidiavo kukisedi giamaidi! We kamukabeida me Diu kadiqaviavo puepuena inakavekapoidi ge tamo gileu inamiamia ediavo tabwadie.”

Tomo'otoqa iveviqa bwaigina, we Ieisu kanatovemulivo navekimataneni bwaigina

³ Ieisu Koya Olibe tabwaneye imiabui Temupolo ikisabaleni. We Pita, Iemesa, Ioni wete Anidulu kaisediqa imai Ieisu waineye ivelautolieni

⁴ ivo, “Kudavonema, malavia dede sakunidiavo inasauyedi. Wete vakai kiakiaya beqa naqaida inavekaivevena, matautauda inasauyedi?”

⁵ We Ieisu ivonedi ivo, “Kwavekisabodebodemi, ge tamo aitoi inakatupwaiemi.

⁶ Tomo'otoqa puedi inamai kaguwavaqaeqa, inavo, ‘Yau Mesaia,’ we tomo'otoqa puedi inakatupwaiedi.

⁷ Tutuyanina qavia butudi kwainoqaidi wete tupwaidiavo qavia valeadi kwainoqaidi, ge kwaigololo. Avonemi, dede sakunidiavo naqaida dede mesaida inasauyedi, we noko ge kabavekakava.

⁸ Paina tomo'otoqa kadiyoko bwaigina wete tamo tomo'otoqa kadiyoko bwaigina taiauda inaetalaqa, we kabaloina tamo wete kabaloina taiauda inaetalaqa. Tutuyanina waineye yoyoyo vikai puena waidie wete lase bwaigina wete valabubuna kapoidi pwayapwaya matatabuna waidie. We no valabubuna kapoidinidiavo kaia kabavelamu mesaida tutuyanina vavine mwau waidie diveviqa ivelamu kadilautovona ilalautovoni, we mulineye diveviqa inavebwaiga.

⁹ “Kwaivekisabodebodemi! Tomo'otoqa inamai inakavikavinimi inanawemi togumetavo bwaigidi waidie sivetonova paipaina, wete inanigemi kabakaipitalaeqa sinagogi naqedie Yau paipaigu. Komi kwaitovoi toloinavo wete kinivo matadie Yau paipaigu, Yau kwaivesipupuyegu waidie.

¹⁰ Kabavelamu Valea Giamaina kwaisapayavuleni kabaloina puena waidie, mulineye tutuya kabavekakava inamai.

¹¹ “We tutuyanina inakavikavinimi inanawemi sivetonova paipaina ge kwaivenuanaluqa vakai kago kwaivesipupuyeni. Mivonanidiavo ge komi kwaivesipupu, we tutuyanina waineye vonanidiavo Yaubada Vaitabuna inavelemi mesaida kwaivesipupuyedi.

¹² “Tomoqo taina inakalaqeieni toloinavo waidie inaluvewapai we tama natudiavo inakalaqeiedi waidie inaluvewapadi. We gwagwama inatovoi inadiavo wete tamadiavo waidie inaetalaqa we inakalaqeiedi toloinavo waidie inaluvewapadi.

¹³ Tomo'otoqa puedi inabailemi paina Yau kwavetumaqanegu, we aitoi inatovoi-pakalaqa, kabavekakava waineye ketoyavu inababaneni.”

Tutuya mwau'otoqina

¹⁴ Matautauda Ieisu ivo, “No tutuyanina saku kapoiotoqina komi kwaikiseni inatovoi vikainina ge nakabatovoi waineye. (Vemataluana towawa waidie: Komi kwaivekautovona kwainuakawananaqaia saku dede paipaidi!) No tutuyanina gumanidiavo Iudia waineye kwaivonedi inadeqa koya waidie.

¹⁵ We meqavoi vanuqa kanakubu beabeana tabwaneye inatovotovoi kwaivonedi ge kanasala inaobu divanuqa naqeneye saku inakewai inadeqa vedimadimanaeqa.

¹⁶ Wete meqavoi tanoqe kwaivonedi ge inanaqo vanuqe kadivaiqavu paipaina.

¹⁷ Kaiatanidiavo waineye mwau bwaigiotoqina tove'ina'inaqe wete tovesusu waidie.

¹⁸ Yaubada waineye kwaivelaukui sakunidiavo ge inasauyedi wailuku kanatutuya waineye.

¹⁹ No tutuyanina waineye kaiata mwau bwaigiotoqina. Yaubada pwayapwaya ivalabubuni imai kasiotoqa ge mesaida mwaunina, we mulineye ge wete inasauyedi.

²⁰ Veviqanidiavo kanatutuya Yaubada inalaukalakusai. Kago ge Yaubada inalaukalakusai, tomo'otoqa matatabudi inawapa. Paina wayaqina inakaivaisedi tomo'otoqanidiavo ivesinuedi paipaina beqa tutuyanina Yaubada inalaukalakusai.

^21-22 Tutuya mulineye Mesaia katupoe, wete palopita katupoe inasauyedi kiakiaya kabanuavilele inavalabubunidi. Kago kadisala Yaubada natomo'otoqa vesivesinuadi inavekautovona inakatupwaiedi. Beqa tamo aitoi inamai inavonemi inavo, ‘Kwakise! Side Mesaia!’ o inavo, ‘Sino vikainina waineye Mesaia!’ bonadi ge kwaivetumaqanedi.

²³ Beqa kwaivekisabodebodemi! Dede valeanina gunabeida avonemi, beqa no tutuyanina ge tamo aitoi inakatupwaiemi.

Mwaqitana Kanatomoqo namai

²⁴ “We no tutuyanina mwau bwaigiotoqina mulineye, “ ‘valavala inavaitomai, wetaki ge inagabu.

²⁵ Mwatuia abame'eqa inayavuta, we tovelulunavo abama waineye inavekalapeto.’

²⁶ “Matautauda tomo'otoqa puepuedi inakiseni Mwaqitana Kanatomoqo inalausimatala waumana tabwaneye, we inamaimai menaveluluna wete mata'udu'udulina.

²⁷ We na'anelosevo inavetunedi inanaqo pwayapwaya matatabuna matana pulina waidie Yaubada natomo'otoqavo vesivesinuadi inagwagwakauqidi, pwayapwaya vikaineye'eqa wete inanaqo vikaineye.”

Ieisu ivonawakedubala welavi modaba waineye

²⁸ We Ieisu ivelamu ivesipupu, “Kabakisa modaba waineye tutuyanina luguna inayatoyatodi wete inadiadia kwaiyagovi tutuya bagula.

²⁹ Beqa no mesaida dede valabubunanidiavo kwaikisedi inasauyedi kwaiyagovi Yau Mwaqitana Kanatomoqo gumai saiqanaqa ailekwa.

³⁰ Avona-mwaqitana waimie, lagata dede ge inakakava kanaketoava valabubunanidiavo avesipupuyedi waimie inasauyedi.

³¹ Abama wete pwayapwaya inakakava, we guvona ge inakakava inakeno-vaqata.”

Komi kwaivalabubuna Ieisu namai paipaina

³² Wete Ieisu ivonedi ivo, “Guvila vaituqana kanakaiata wete kanatutuya ge tamo aitoi idayagovi, anelose abame ge idayagovi, wete Yau Yaubada Natuna ge adayagovi, we kaia Tamagu kaisena iyagoyagovi.

³³ “Beqa kwaimialaugamasa wete kwaivekisabodebodemi, paina ge kwadayagovi malavia gututuya vila vaituqana inalekwa.

³⁴ Tamo kabakisa aivonemi: We kago mesaida tamo tomoqo inatauya we navanuqa kanatolituqavo inayatoi dimadie inaekisabodebodeni, wete natolituqavo tamoqana tamoqana dilituqa inaveledi inavavalabubuni, we awa kanatomiagamata inavoneni inamialaugamasa inaekisabodaboda.

³⁵ Beqa komi kwaimialaugamasa we kwaivekisabodebodemi, paina komi ge kwadayagovi malavia tonivanuqa inavila-vaituqana, oge lavilavie, o lovana gamwane, o kamukamu inagwaqegwaqe, o mamale.

³⁶ Kwavekisabodebodemi! Beqa ge inamai vedimadimanaeqa inababanemi kwaikenokeno.

³⁷ Vakai waimie avesipupuyeni, mesaida avesipupu puedi waidie, kwaimialaugamasa!”